إنطفاء نجمة

البارت 13

انطفاء نجمة

للكاتبة : Hawraa

.. وعشقي لكَ أزلي، مهما اختلفت الاراء
، ومهما افترقنا ستبقى في فؤادي مُتيم.

بقلمي 🖤

تصويت لطفا احبابي🖤
.................

ترف....
من بعد كلامي ويا بابا ، واني بداخلي اتمنى جسر يرجع للشغل جنت اريد اتصل عليه بس مترردة تالي عقت السالفة خاف يكول ذابحة روحها علية غلست، وضليت بتفكير اروح وارجع للجامعة بدون واهس حتى جمان محتجية وياها متتقبل تحجي بس اتطمن عليها وعايفتها على راحتها

احس كلبي مقبوض، وبس اريد اشوفة معقولة هالكد احبة؟ يعني هو هيج الحب يصير مدا اعرف افسر مشاعري تجاهة، اطلع بليل اباوع للنجوم واتذكرة اغميض عيوني سارحة بتفاصيلة، وشكلة اتذكر مواقفنا هنا وبداخلي حسرة خاف بعد ميرجع

هسة هو هم يفكر بية؟ هم اجيت على بالة؟
اجت ببالي كلماتة هذاك اليوم من جنت نايمة، وكلبي رجف من تذكرت كلامة " اااخ يا ترافتي يالحلم البعيد الما اناله "

ابتسمت بتوسع، بلكي يحبني اني استاهل انحب ترا مناقصني شي

نمت من بعد تفكير عميق، كعدت ثاني يوم الضهر مجان عندي دوام نزلت للمطبخ كارهة البيت من ورا الحية دخلت ماشفت خالة سماح غصة بكلبي مكانها كلش خالي اول مرة تفارك البيت هالكد وما اشوفها اني كل يوم اتصل عليها اتطمن واسدة

اوف يل حية ان شاء الله يصير عندج تبول لا ارادي، ولو حرام ادعي على احد بس شسوي من حركة كلبي شفت بنية بالمطبخ من عمري تطلع ، عقدت حواجبي وباوعتلها

كالت بهدوء
... اني العاملة الجديدة، آنسة تحبين اسويلج اكل؟

ابتسمت بهدوء، وكتلها
... اهلا وسهلا، لا حبيبتي اني اسوي

ابتسمتلي جانت حلوة، وطويلة عكسي محجبة وجسمها رشيق ومرتبة محتشمة بشكل شعراية مطالعة منها كالت
... هذا واجبي ارتاحي اني اسوي

... لا خية صدك جذب دكعدي هسة اجي اتعرف عليج

طبعت جبن وحميت الجاي ابتسمت واني احمي تذكرت من سوينا اني ، وجسر ريوك شكدد حلوو

خليت خبز وجبن ولكيت زيتون هم طلعتة بدربي كلش احبة ومربى وقشطة، كعدت وصبيت كلاصين هي ابتسمت بلطف ، وكالت
... المفروض اني اصبلج مو انتي

كعدت ، وكلت بعدم اهتمام
... يمعودة هسة شكو بيها مو زين دبرتها وصبيت كلاصين جاي يلا تعاي عرفيني عليج

مبينة حبابة اني الشخص اعرفة بس اباوعلة، كالت
... اسمي شاهيناز اليوم بلشت بالشغل

خليت مربى بحلكي، وكتلها
... حلوو ، جا وين لكيتي الشغل

شربت جاي، وكالت بهدوء وصوت ناعم كلش نازكة هل بنية وخلوقة
... بابا جان يشتغل عند الباشا قبل، ومن توفى ضلينا اني وماما واخوي الصغير بدون شغل بس على الراتب ف  سمعنا محتاجين عاملة قدمت على الشغل وقبلوني