إنطفاء نجمة

البارت 21

إنطفاء نجمة

للكاتبة : Hawraa

.. الباب مكسور ، ونافذتي
دَوت قُل للرياح العابثاتِ
تمتعي...

...........

ترف...
دخلت للبيت روحي مسلوبة اباوع للجدران المخملية
والصالة الملكية الفخمة مابيهااا روح حسيتة صار يقبض روحي ويخنكني اكثر من قبل ، مشيت بخطوات متثاقلة ما ودي ادخل بس مجبورة اباوع آثار الخراب كلها راحت

شكو شي مكسور انشال ورجع طبيعي، خفو آثار الجريمة وكل شي ينص على بشر انقتل هناا !

صعدت لغرفتي ويا شاهيناز الي ساندتني ووجهها شاحب بخوف، دخلت وهي راحت لغرفتها رادت تبقى يمي ماقبلت بس وصيتها تقفل الباب عليها انزع بملابسي ابجي وافكر انو هو مراح يتعاقب ولا راح ينال جزاءة ولو ليش استغرب قابل وين عايشة اني بفلسين يكدر يغطي على جريمتة،

جزت نفسي من عندة اضعاف مستعدة اشوف ابليس وما اشوفة ، غسلت وجهي عدة مراات اباوع بالمراية احاول استجمع نفسي بس ماكدرت خايفة جسمي كلة يرجف

طلعت من الحمام تلفوني ماسكت من الاتصالات شفتة جسر حاارك التلفون علية اول مافتحتة اجاني صوتة يرعد
... لج بابا انتييي صااااحية شلون تخليني هيج محموس هم عندج رب انتييي

محجيت ناقصني اني؟!
اخذ نفس وتنهد، وكمل كلامة بهدوء
... ترافتي يابه احجيلي شصاير عليتي گلبي
منو وياج

حجيت بصوت مخنوك و دموعي تنزل واني اهمس
... ماتت جسر ماتت

... منو هي عيون جسر انتي، منو مات بس لتبجين دمرتيني

شهكت، واني اهمس بخنكة
... خايفة جسر كلش، ككدامي ماتت ماكدرت اسويلها شي تباوعلي تريدني اساعدها وماكدرتت

سكت وصوت سيارة يمة، كال يهدئ بية بنبرة
ماكدر اوصف كمية الحنية الي بيها
... اشش هاي هية انتهى كلشي لتخافين
جايج انه فتحي الشباك

جان صوتة ملهوف، ردت اسدة مالي حيل اسوي كلشي
كال
... لتسدي ترف خليچ وياية

كتلة بتعب
... لتجي جسر اخاف عليك اذا شافوك ميرحموك

... انعل ابو جسر، راح اوصل لتخافين عيوني انتي

همست بخوف
... ماريد اخسرك ارجع جسرر

مارد علية شوية، وانسد الخط انوب ضل بالي
اريد اتحرك بعد مابية اباوع على حالتي يرثى لها
مدري بروحي حتى شلابسة

حسيت على حركة بالسطح بالكوة ساعدت نفسي وسندتها حتى اكوم افتح الشباك اكيد وصل اخ يا جسر هيج انسان ذرة خوف بكلبة ماكو اني مشايفة، فتحت الشباك قابلتني عيونة الضاهرة من اللثام

نزلت دمعتي دخل بسرعة وهو يسحبني لحضنة
، وهنا جانت محطة انهياري مدري منين صارت تجيني الدموع ايدية تشد على قميصة واعصرة بقوة كاتمة صرختي وهو يمسح على راسي ويهمس
... انه يمچ عمت عينة اليغثج، وانه اشم الهوى.