حريتي

البارت الأول

حريتي ✍️فاطمه العامري

اعلن تمردي أصواته تنطق لا للظلم والاحتكار لا للتسلط والتكبر والاهانه وخاصتآ للمرأه
مراح استسلم واضعف ابقه ادافع عن مبدئي بالحياة وهي (حريتي) مو من حق اي شخص يقلل من احترامي ويقلل من شئني اني كيان مثلي مثل اي شخص متحكم
ليش اللهم السلطه والتحكم بينه بدون حته اخذ رأينه وتحديد مصيرنه باي حق بس للأسف بس بمجتمعنه او مجتمعي بشكل خاص لا رأي ولا خصوصيه ولا كيان ولا حريه

قصتي مليئه بالاحداث والمغامرات والتضحيات وللأسف بالاخطاء او بالخطأ الوحيد الي رتكبته نتيجة الضغط والعنف الي شفته صح مو عذر الي بس هذا وقع حال

يوم من حياتي راح ابدي بي وسترسللكم قصة حياتي بأكمله او بالاحرى لحد ما اني الان

كعدت كوه عله صياح ابويه العزيز ميقبل واحد يبقه نايم لثمانيه الكل بالسبعه كاعده من غير اخواني قبل السبعه علمود الشغل والحلال ابد ماتقبلت عيشتي الي وعيت عليه خاصتآ من بطلوني وسجنوني بالبيت
وعيت عله العالم الخارجي من خلال التلفزيون والمسلسلات شفت الناس وبالي وخيالي يروح الذاك العالم المتتطور والناس العايشه مو احنه عيشت البدو والمعدان امووت من هاي العيشه ماحبه ولا حبيته ولا راح احبه جنت دائما اتمنه واحلم اطلع من هالعالم الرجعي المتخلف اتمنه يجي يوم واخلص من اهلي وظلمهم وتحكمهم وعاداتهم وتقاليدهم جنت اكثر وحده بأهلي متذمره ومتمرده وتعيسه جنت اكضي وقتي عله التلفزيون رغم الصياح الي عليه انو لازم أشتغل وتعلم كلشي حته استلم الرايه بالخدمه لرجلي وجهالي المستقبلين عشتوا الي اعتبرهه خدامه بين قوسين مو انسانه اله حق الاختيار والحريه مشكلتي ماحب احد يتحكم بيه رغم قسوة ابويه واخواني وخوفي منهم بس يبقه داخلي رافض العبوديه والتزمت لان عدهم البنيه معدومة المشاعر والاحاسيس وغير مؤهله للأختيار مجبوره تنفذ وبس ممنوع تحجي او ترفص اي طلب هيه بس تنفذ وطيع وتخدم هذا نهج مجتمعنه و بيئتنه لان اهلي همه مجتمعي ميقبلون نطلع ونختلط بالناس ليش لان البنيه محد يشوفه حده ومحدوده سادس ابتدائي ونتهت حياته عن العالم بس اني تقريبآ كسرت القاعده وضليت ادك والطم و وسطت كل واحد اشوفه وخاصتآ جدو محمد جيرانه وحجه ويه ابويه ولان طالعه اولى بالسادس خلوني اكمل بس بتهديد من الوالد حدي لثالث وممنوع افتح حلكي بعد حته لو طلعت الأولى عله العراق قبلت بين الفرح والالم بس اكول الله كريم بس خلي اكمل المتوسطه

من خلصت ثالث حكموا عليه بالسجن المؤبد مصيري مثل اختي الجبيره بقت مسجونه الى ان نخطبت لابن عمتي ونقلت خدمتهه وسجنه من بيت ابوهه لبيت رجله واني لازم انتظر اي سجن راح ادخل واباشر بالاعمال اليوميه الشاقه مع فرض تشغييل أليت الُخًلفه المزعجه يعني الزعاطيط اووف من اشوف اختي تركض من واحد لواحد متعرف شنو كعده امموت قهر احس هذا مصيري ماريد ماريد هاي العيشه شباوع واتفائل لامي الي كضت عمره تخدم ومحد راضي وبس تحاول ترضي ابويه
لو مرة اخويه لو اختي يعني البنيه مضطهده والمرأه نفس الحال مع كثرة الاعمال والمسؤليه احس يشوفونه اله يستخدموهه لاغرضهم لازم منعارض ونتدخل نفذ فقط
جنت دائما اسأل نفسي ليش هيج يعاملونه مثل السجناء بعدين فتهمت من عرفت
عدهم البنيه تجيبلهم العار حته لو مو هيه الغلطت هيه الي تتعاقب وتنكتل
وهيه المسؤله الاولى والاخيره جم مره ومره نسمع بنات اهله ذابحيه لو راميه طلقه بمنطلق
او معتقد غسل العار فالبنيه متهمه بنظرهم تسجن بدون اي ذنب قبل لا تجيبلهم حجايه
وصاحب المشكله الرجل او الشاب يبرروله بكلمه وحده فقط انو هو (رجال) يعني عادي رجال كلشي يسوي رجال بعد