عاشقان بقلب واحد ( مكتملة )

الفصل الثالث والعشرون ( اشتقت اليك )

في يوم الحناء
اثناء تناول الفطار 
كريم : اجهزي عشان أوصلك عند مامتك قبل ما اروح الشركة
تاليا وهي تنظر الي الطبق الموضوع أمامها : لأ ... قصدي مش هروح
كريم باستغراب : ليه ... ما انت كنتي معاهم في كل حاجة
تاليا بضيق : طيب يا كريم ... كنت معاهم بس كل حاجة كانت عند حلا ...إنما الحنة عند بابا ... ولو نسيت هو طردني ... يعني بمعني اصح اعتبرني مش موجودة ... يبقي اروح ازاي
كريم : تمام براحتك ... بس لو غيرتي رأيك متروحيش لوحدك كلميني أوصلك ... تمام ... تاليا ....
تاليا : تمام يا كريم خلاص ....

في فيلا توفيق
سوزان : حلا ... كلمي تاليا شوفيها هتيجي امته
حلا : حاضر يا ماما

حلا علي الهاتف : ايوة يا بنتي ... هتيجي امته
تاليا : مش هاجي يا حلا ... لو كده بكره في القاعة هاجي شوية انا وكريم
حلا : تاليا ... اكيد بتهزري صح
تاليا : لا بجد ... عشان بابا اكيد مش هيتقبل وجودي
حلا : براحتك يا تاليا ... بس انتي حرة مع ماما
تاليا : خلاص هكلمها ... سلام

في غرفة جومانة
جومانة وهي تقف امام المرآة : يا ربي ... هي الحبوب بتعرف منين ان عندنا مناسبه ... اعمل ايه يا ماما ... ايه رأيك نأجل الفرح
سوزان : ايه يا جومانة متكبريش الموضوع ... المكياج هيخفي كل حاجة يا حبيبتي

حلا وهي تدخل الغرفة : فيه ايه يا ماما ...
سوزان : شوفي اختك الهبلة ... عايزة تأجل الفرح عشان حبوب ظهرت في وشها
حلا بضحك : عندها حق برده يا ماما
سوزان وهي تخرج من الغرفة : انا ربنا رزقنا بشوية مجانين
ثم استدارت واردفت قائلة : صحيح كلمتي اختك
حلا : اه كلمتها ... بس ... مش هتيجي
سوزان : يعني ايه
حلا : هي قالت هتكلمك
سوزان : تمام خليكي مع اختك ... وأنا هروح أجيبها واجي بسرعة

في مكتب كريم
هايدي وهي تفتح الباب : ممكن ادخل
كريم : اتفضلي ....
هايدي : ايه رأيك في تقديمي للمشروع ... عجبك
كريم : اه طبعا عجبني ... وعجب كل الموجودين
هايدي : فرحت كتير انه عجبك ... كريم ... ايه رأيك نتغدي مع بعض النهارده
كريم سريعا : لأ مش هينفع ... لازم اروح البيت بعد الشغل علطول ....
هايدي وهي تقف : اه أكيد عشان حنة جومانة ... خلاص تمام مرة تانية ... انا هروح بقي مكتبي
وقبل ان تخرج من الباب استدارت اليه قائلة : كريم ... ياريت تتكرر زيارتك ليا مرة تانية ... انت مش متخيل انا كنت وقتها اسعد واحدة في الدنيا
ثم غادرت مكتبه وهي تضحك بينما هو لم يظهر اي اهتمام او حتي تتغير تعابير وجه

في المساء
تاليا وهي تبكي في حضن والدتها : امته هيسامحني يا ماما
سوزان وهي تملس علي شعرها : هيسامحك اكيد يا روحي ... انتي عارفة هو بيحبك قد ايه يا تاليا ... قومي كده اغسلي وشك واجهزي عشان أخواتك قرفني مكالمات
تاليا وهي تمسح دموعها : ماما مش هعرف اخرج من غير ما أقول لكريم ....
سوزان : طيب كلميه دلوقتي ...
وما ان أمسكت الهاتف وجدت كريم يفتح الباب
كريم وهو يدخل : أهلا يا سوزان هانم
سوزان : أهلا يا حبيبي... تاليا انا هستناكي تحت في العربية ...