عاشقان بقلب واحد ( مكتملة )

الفصل السادس والعشرون ( لخوفي عليك )

في اليوم التالي
استيقظت تاليا ولم تجد كريم بجانبها بحثت عنه في الشقة ولم تجده وبعد دقائق فتح باب الشقة ودخل وهو عابس

تاليا : كنت فين يا حبيبي بدري كده
كريم : كنت بتمشي شوية ... تاليا عايز أتكلم معاكي في موضوع
تاليا وهي تجلس علي الاريكة : نعم يا حبيبي
كريم : مش هينفع نجيب الطفل ده .....
تاليا بذهول : نعم ... انت .. كريم انت بتقول ايه
كريم : زي ما سمعتي يا تاليا ... انا مش هقدر أتحمل مسئولية الطفل ده ... عشان كده لازم تنزليه
تاليا بانهيار: انا مش قادرة استوعب ... انت بتهزر صح ... امبارح كنت فرحان وطاير من السعادة ... ايه الي حصل دلوقتي ... ايه الي حصل فهمني يا كريم ... ايه الي حصل
كريم : مفيش حاجة حصلت ... انا مش عايز اظلم ابني معايا ...
تاليا سريعا : يعني ايه ... وإزاي تظلمه ... قابلتها صح ... طبعا ازاي تجيب مني ولاد وانت أصلا بتحبها
كريم بضيق : تاليا بلاش هبل ... ومش كل حاجة تدخلي هايدي في الموضوع ....
تاليا وهي تقف : ماشي يا كريم ... مش عايز البيبي صح .. وأنا مش هجيبه ... بس تطلقني ودا اخر كلام عندي
كريم بعصبية : نعم اطلقك الي هو ازاي ... دا انا ما صدقت نتجوز ... ايه ... فوقي كده لانك مش هتكوني لغيري ... فاهمة يا تاليا ... هسيبك يومين تفكري في الموضوع ... واكيد هتوافقي
ثم تركها ودخل الغرفة وهو في قمة غضبه فحقا لا يريد هذا ؟ ولكن لم يوجد حل اخر
تاليا ببكاء وصوت عالي : مش هنزله يا كريم الا اما تطلقني ... سمعني ... ايوه تطلقني ... بابا كان عنده حق ... انا غلطانه انا الي عملت في نفسي كده
قالتها وهي منهارة من البكاء وهو في الداخل يتقطع قلبه عليها ولكن ماذا يفعل ؟ فهو لا يريد ان يخسرها ... فهي عشقه الأول والأخير

في شرم الشيخ
في احدي الاوتيلات
يوسف وهو يدخل الغرفة : هتفضلي قاعدة كده ...
جومانة ببرود وهي تشاهد التلفاز : وعايزني اعمل ايه يعني ... خليني كده احسن
يوسف : طيب قومي ننزل نتمشي شوية
جومانة ببرود : لا مش عايزه انزل شكرا ....
يوسف : جومانة المفروض ان انا الي بعاقبك ... مش انتي ... ولا أنتي شايفه ايه ....
جومانة وهي تعتدل علي الفراش : طيب يعني عايزني اعمل ايه ... أتحايل عليك مثلا ... اااه يا حبيبي انا أسفة انا غلطانه انا مش عارفة عملت كده ازاي ... سامحني ... سامحني يا روحي ... عايز كده انت
يوسف وهو يجلس علي الفراش ويقترب منها : ايوه عايز كده ... تعرفي انك حلوة اوووي وانتي بتتكلمي كده
جومانة بتذمر : لا والله ... انا مش هعمل كده بقي ... وسبني اكمل المسلسل
يوسف وهو يهمس في أذنها : انا مش عارف اعمل معاكي ايه ... يابنتي انتي ايه ... بس الي اعرفه ان كل ده من ورا قلبك ...
جومانة بتوتر : لا من قلبي ... وأوووي  كمان ... وبعدين انت ايه الي عرفك ايه جوا قلبك
يوسف وهي قد اثارت جنونه : عارف ... عارف كل حاجة ... عارف انك دلوقتي عايزاني اخدك في حضني
جومانة بتوتر واضح : ممكن تبعد عني كده ....
اقترب يوسف منها اكتر وامسك يدها ثم اردف قائلا : مش كفاية بقي ... مش هستحمل اكتر من كده
جومانة بضيق : انت السبب في كل ده ... انت الي بعدت عني ....
يوسف وهو يضع قبلة علي وجنتها : انا اسف ... خلاص بقي انا سامحتك ... المهم انك دلوقتي ملكي
جومانة : انا معملتش حاجة غلط اساسا
يوسف بضحك : اساسا ... ماشي يا جيجي ... قومي البسي يلا خلينا نخرج نتمشي ونتغدي بره
جومانة بابتسامة : حاضر