عاشقان بقلب واحد ( مكتملة )

الفصل السادس ( خلاف )

في الصباح
سوزان وهي توجه كلامها الي احدي الخادمات : ايه ده ... البنات لسه نايمين
سعاد : تاليا هانم خرجت من شوية ... وجومانة هانم خبطت عليها مردتش عليا ... وحضرتك عارفه انها مش بتحب ندخل اوضتها
سوزان : معلش يا سعاد اطلعي صحيها عشان تلحق تفطر وتجهز نفسها للسفر

في غرفة جومانة
دخلت الخادمة الي الغرفة لعدم الاستجابة لطرقها عدة مرات ولكنها صرخت عندما وجدت جومانة مغمي عليها في ارضية الغرفة
سوزان وهي تسرع نحو ابنتها : فيه ايه ... جومانة حبيبتي مالك يا ماما ... جومانة فوقي ... سعاد اتصلي بالإسعاف بسرعة
سعاد بخوف عليها : حاضر يا هانم

في شركة مدحت للمقاولات
مدحت : نور ابعتيلي كريم بسرعة
نور : حاضر يا افندم
كريم قد وصل الي المكتب وقبل ان يجلس علي الكرسي وجد هايدي تفتح الباب
هايدي بابتسامة : صباح النور يا روحي
كريم ببرود : صباح الخير
هايدي وهي تتحرك نحوه : مالك علي الصبح ... مين الي مزعلك يا روحي
كريم وهو لا ينظر اليها : مفيش
هايدي : طيب ... ايه رأيك نخرج نتعشي النهارده مع بعض
كريم : مش هينفع ... انا وعدت تاليا ان هروح معاها الحفلة
هايدي بضيق : حفلة ايه ... مش فاهمه يعني بتفضلها عليا
كريم : هايدي انتي عارفه اني مش بقولك لأ علي اي حاجه بس النهارده مش هينفع
هايدي بغضب : تمام يا كريم
غادرت مكتبه بضيق وهي تتوعد له في نفسها
دخلت نور مكتب كريم بعد ان سمح لها بالدخول
نور : كريم بيه ... مدحت بيه عايز حضرتك دلوقتي
كريم : حاضر ... اتفضلي انتي

في المستشفي
سوزان : هااا يا دكتور ... بنتي عامله ايه دلوقتي
الدكتور : الحمد لله بخير عملنا ليها  غسيل معدة .. تقدري تطمني عليها
سوزان : يعني مفيش خطورة عليها
الدكتور : لا مفيش ... حمدالله علي سلامتها
سوزان : شكرا يا دكتور
توفيق وهو يتحرك بسرعة باتجاهها : سوزان ... جومانة مالها
سوزان : حاولت تنتحر ... بس الحمد لله لحقناها وهي كويسه دلوقتي
دخل توفيق بسرعة الي غرفة ابنته
توفيق : جومانة ... حمدالله علي سلامتك يا حبيبة بابا ...
جومانة : الله يسلمك يا بابا
توفيق : ازاي تعملي حاجه زي دي ... مفكرتيش فينا خالص
جومانة : انا آسفة يا بابا ... بس عشان خاطري مش عايزه اروح عند خالتي
توفيق وهو يحتضن ابنته : خلاص يا حبيبتي ... الي انتي عايزاه
كانت سوزان تقف خلف الباب تستمع الي حديثهما وهي تبكي ولكن لن تظهر هذا لابنتها فهي حقا غاضبة منها فكيف تحاول ان تنتحر

في شركة مدحت للمقاولات
طرق كريم باب مكتب والده ولكنه لم يجب عليه ففتح الباب ونظر منه
كريم : ممكن ادخل
مدحت : تعالي ...
كريم : قبل ما حضرتك تقولي اي حاجه انا عارف ان انا غلطان ... بس صدقني يومين و التصميم هيكون عندك
مدحت بغضب : يومين ... والمفروض ان تسلم تصميم الأرض النهارده
كريم : بابا ... انا اسف
مدحت بضيق : اتفضل يا كريم تروح تشوف الأرض النهارده والتصميم المعماري يكون عندي بكرة ... ومش عايز كلام تاني
كريم : حاضر ... بعد إذن حضرتك
وقبل ان يغادر كريم المكتب اسرع والده قائلا : كريم ...
كريم وهو ينظر اليه : نعم
مدحت : ياريت المدة الي انت احتاجت تكون فيها مع نفسك خلصت ... خلال الأسبوع ده تكون رجعت البيت
كريم : بس انا مرتاح كده
مدحت : وهترتاح اكتر في البيت
كريم بضيق : حاضر ... ان شاء الله
خرج كريم وهو يستشيط غضبا فهو لا يستطيع ان يواجه والده