عاشقان بقلب واحد ( مكتملة )

الفصل الرابع ( عقاب )

في المساء
في احدي المطاعم الفخمة التابعة لممتلكات توفيق الهادي
مدير المطعم : أهلا وسهلا يا توفيق بيه ... اتفضلوا
توفيق : أهلا بيك يا طارق
طارق : انا مع حضرتك يا فندم ... بعد إذنك
توفيق : اتفضل

تاليا : ماما هي جومانة فين
سوزان : عند حلا ... جايين في الطريق
تاليا : تمام ... طيب وكريم
سوزان : مش عارفه ... صحيح يا توفيق كلم كريم وشوفه فين
توفيق : آه صح نسيت أكلمه
ثم اخرج هاتفه لكي يحادثه

عند كريم
كريم يجلس في السيارة امام العمارة التي تسكن فيها هايدي
امسك كريم هاتفه عندما سمعه يرن وهم بالإجابة
كريم : الووو .... ازي حضرتك يا عمي
توفيق : انا بخير يا حبيبي ... انتو فين دلوقتي
كريم : انا عند هايدي ... نص ساعة ونكون عندكم ان شاء الله
توفيق : تمام ... خد بالك من نفسك
كريم : ان شاء الله
وبعد ان أغلق معه وجد هايدي قادمة نحوه ولكنه ذهل من منظرها فهي شبه عارية
كريم بغضب بعد ان نزل من سيارته : ايه القرف الي انتي لابساه ده
هايدي وهي تقترب نحوه : ماله يا حبيبي ... انا قلت هيعجبك
كريم بضيق : هااااايدي
هايدي وهي تحاول ان تضع يدها علي وجهه ولكنه ابعدها بسرعه : فيه ايه يا كريم ...دا استايلي وانت عارف كده كويس
كريم : اتفضلي اطلعي غيريه
هايدي : لو طلعت مش هنزل تاني
كريم : تمام
توجه كريم الي سيارته وفتح الباب وقبل ان يصعد
هايدي بسرعة : خلاااص  .... هطلع أغيره
كريم وهولا ينظر اليها : اتفضلي بسرعة لانهم مستنينا
هايدي : حاضر يا قلبي

في سيارة ادهم
جومانة التي تجلس في المقعد الخلفي : حلا انا هقول ايه لماما ... انا خايفة اوي
حلا : متخافيش انا هتكلم معاها بس اما نروح البيت لان كريم وخطيبته هيكونوا موجودين ومش هينفع نتكلم قدامها
جومانة : تمام ... ربنا يستر

نظر أدهم الي زوجته التي تجلس بجواره بحب فهو حقا يعشقها ويشتاق اليها في كل وقت ثم ابتسم اليها بادلته الابتسامة ثم امسك يدها وظل علي هذا الوضع الي ان وصلوا المطعم فهو لا يريد ان تبتعد عنه ابدا

عند ساره
علي وهو يقف في مكانه : نعم ... انتي بتقولي ايه
ساره : ممكن تهدي وتعد عشان نعرف نتكلم
علي بصوت عالي : أهدي ايه حضرتك ونتكلم في ايه ... انتي مستوعبة الي بتقوليه ... يعني ايه تسكني معاهم مش فاهم ...
ساره :  انا طبعا مش عايزه كده بس انا عايزه حقي ... عايزه ورث بابا
علي : وطبعا عشان تاخدي حقك لازم تسكنوا مع بعض في نفس البيت
ساره : آه دي وصية ابوه
علي : انا مستحيل أوافق علي كده انتي فاهمه
ساره : علي بس افهمني انا بس ....
علي : دا اخر كلام عندي ... سلام
ثم خرج من البيت واغلق الباب بغضب كاد ان يكسره

في المطعم
سوزان وهي تقف في مكانها : جومانة حبيبتي ... قلقتيني عليكي
ثم اقتربت منها واحتضنتها بشدة
جومانة بقلق : انا كويسه يا ماما ...متقلقيش
سوزان : واحدة صاحبتي كلمتني وقالتلي ان بنتها معاكي في الكلية وشافتك وانت بتعيطي ومنهارة ... انتي كويسه يا ماما
جومانة : آه يا ماما كويسه ... ممكن يكون شبهتني بحد تاني
تاليا وهي تتصنع الغضب : يا سلام يا سلام دا انا اعيط بقي في الكلية عشان تحبيني كده
سوزان وهي تضحك : بس يا بنت
تاليا وهي تضع يدها علي فمها : حاضر سكت