فجأة ومن دون اي مقدمات وقعت ف حضنو واتفقعت بالبكاء ،، إياد قعد على رجولو مع انو كان موجوع من الطعنة دفن وشها بين يدينو بس هي كانت أسرع منو ورجعت حضنو ،، ف م كان عندو حل غير الاستسلام ضماها عليو خلاها تبكي قدرتها كأنو بقول ليها فضي الجواك ،، انا كنت متابعة الموقف من سكات وحاسة بكمية الألم الكاتماهو جواها وبرجع اقول انو الحاجة الخلت لقاء تبكي ما هينة ،، لقاء قوية حتى في عز انكسارها ربنا يربط على قلبك يا اختي
* لقاء كفاية بكى ،، عايني لي ف وشي بتكلم معاك ،، مش بتسمعي كلامي يلا بطلي الشي البتعملي فيو دا انتي اقوى من كدا مهما كان سبب بكاك لازم تواجهيو وانا معاك ف كل شي يلا حبيبي بطلي بكى ،، سمر سوقيها تغسل وشها وترتاح يلا اسمعي الكلام
فعلا بعد كلام إياد سوقتها غسلت وشها وشربت شوية موية وعلى طول رقدت م اتكلمت معاها ولا كلمة حتى هي نفس الشي شويتين كدا نامت غطيتها فتحت التكييف طفيت الضو وطلعتا طوالي لقيت إياد واقف ف وشي داير يتكلم طوالي سكتو
* هشش نامت ارح من هنا م نصحيها ،، زحينا من غرفتي ومشينا غرفتو قال لي مالها يا سمر ممكن افهم ف شنو؟!
* والله يا إياد م عارفة ،، علمي علمك ،، جات من الصباح كدا الليلة بنفس شكلها القبيل داك وم نطقت ولا حرف مع زول حتى الحصص من سكات ولا منتبهة زاتو ،، اتكلمنا معاها انا ودعوات بكل الطرق بس ماف نتيجة ف النهاية قررت اجيبها واهو الحصل انت عارفو
- ما ساي اكيد ف حاجة ،، سكت مسافة واتزكر يوم شاف اختها ،، بتكلم ف نفسو معقولة تكون عرفت ؟! لالا يا إياد انت مجنون بجد طيب مالها اخخخ يا رب
* هااا انت سرحان وين وريني
- شايل همها والله ،، ما قادر اشوفها كدا وانا يديني مكتفة بالطريقة دي هتمرض
* الحاجة الكويسة انها بكت على الأقل طلعت الجواها والا م كانت هتنوم ،، اسي خليها ترتاح شوية وبعدين نشوف البحصل شنو وان شاء الله كلو لي خير
- امشي انتي زاتك ارتاحي ونشوف بعدين
* انا البقول ليك الكلام دا لأني عارفاك م هتوقف تفكير وم تنسى انك لسة عيان و ...
- م عليك بي انتي امشي ولي بعدين هأتمشى جمب الباب شوية
طلع خلاني واقفة ،، م جديد علي لمن إياد يزعل طوالي بعمل كدا ومستحيل يسمع من زول عشان كدا كل العملتو اني مشيت غيرت هدومي صليت الظهر وفتحت المصحف
_____
- الله ياخدك يا حسين انت عملت في بتي شنو ،، مش كلمتك قبل كدا بناتي خط أحمر ،، مستحيل اخليك الله ينتقم منك دمرت لي بتي الله يدمر بناتك ،، م فكرت فيها قبل تعمل كدا لي يا حسين لي بس
* هيي حيلك حيلك بتك براها الجاتني انا م جبرتها على حاجة ،، ونقطة تانية اوع تقارني بناتي بي بناتك لانو بنات حسين أشرف منك ومن قبيلتك كلها ،، وتاني اوع تتصلي علي عشان كلام فارغ زي دا وبعدين انا صبرت ليك كتير عندك اسبوع بس اتصرفي تعالي لي الشقة وإلا ح اجي نص بيتك وافضحكم انتي وبتك سامعة ولا لا يلا مع السلامة ،، فقل الخط في وشها وقبل ياخد نفس زي الناس جاهو اتصال من بتو الصغيرة رغد في تالت ثانوي ،، رد عليها جاهو صوتها وهي بتبكي
