كنت قاعدة مع لقاء ف بيت حلووو شديد كلو باللون الأخضر كانت خاتة رأسها ف رجولي وبتتكلم معاي فجأة قامت بسرعة وطلعت من البيت خلتني براي لحقتها بس م شفت ليها اثر، فتشت عليها حوالين المكان بس ماف اثر جاني صوت مألوف بالنسبة لي بس م عارفة حق منو..
" سمر فتحي عيونك "
الجملة اتكررت كتير وانا كنت جارية إتجاه الصوت بفتش على الزول البتكلم حسيت ب إيد دافية ماسكة ايدي 🖤
فجأة كل الحلم اختفى، الخضرة والبيت وانا برضو لمن فتحت شفت ظلال ناس جمبي رجعت غمضت تاني بحاول استوعب الحصل لي اخر حاجة كان سراج ماسك يدي ونحن ف العملية..
دقيقة!!
عملية، يعني انا ولدت فتحت عيوني براحة كانوا كلهم واقفين جمبي، ابوي سراج رئال رئبال وإياد ومؤيد وخالتو منال وعشوش و د.إيمان قلت ليها بصوت خفيف ولدي..
قالت لي ارتاحي م تفكري في شي انتي كويسة حاسة ب شي!!
انا م كنت حاسة ب شي غير اني عايزة اشم ريحة ولدي هزيت ليها راسي قالت ليهم ياجماعة ممكن تخلونا شوية عندنا إجراءات روتينية اخلصها و ح ننقلها غرفة تحت..
كلهم طلعوا عدا سراج م اتحرك من مكانوا ولسة ماسك يدي كنت بعاين ليهو شدييد ملامحو اتغيرت وباين التعب والإرهاق عليهو، م اتكلم ولا حرف بس عيونو فيها كلام كتير🖤
ضغطت على يدو شدييد وقلت ليهو انا كويسة ممكن تجيب لي ال... د.إيمان قاطعتني وقالت ليهو سراج انت برضو انتظر شوية وح ننقلها غرفة م اتكلم وطلع طوالي..
_____
طلعت من الغرفة نزلت تحت لقيتهم قاعدين امي كانت بتعاين لي لمن وصلتهم جاتني بالجمبة قالت لي لقيتها كيف!؟
قلت ليها كويسة، عايز اشوف الأولاد برجع شوية كدا عاينت لي من فوق لتحت وقالت لي انت لي لابس ملابس امس لحدي آلان؟؟
لي ذكرتيني يا أمي ف داعي اسي!
م عرفت أقول ليها شنو رديت بسرعة لانو مؤيد اتصل وم اداني فرصة أغير انا ماشي برجع شوية كدا..
هربت منها وكان واضح الهروب، يداب قدرت اتنفس لمن وصلت الحضانة، كانوا نايمين وأول مرة اشوفهم من يوم ولدوهم، مديت يدي رفعت الولد ضميتو علي شديد وبوست خدو، دموعي خذلتني كيف قدرت انفر من أولادي!؟
كيف م صبرت لمن ربنا ابتلاني ورميت اللوم عليهم؟💔
ربنا اختبرني بس م نجحت ف الاختبار💔
جا مؤيد لقاني بنفس حالتي قال لي انت ظلمتهم الاسبوع الفات بس اعمل كل حاجه وعوضهم الجاي يلا الناس كلهم شافوها وطلعوا بعد حولوها الغرفة وانت هنا من قبيل بتسأل عنك بعيونها شيلهم وامشي ليها!!
قلت ليهو فاتو وين الباقي!؟
قال لي اصلا منعو منها الزيارة لانو بكرة ح تطلع ف اليوم راحة وكل شي طبيعي م ح تحتاج تقعد هنا تاني!
