"بعضُ الأحداث"
تلاتة اسابيع مرت وانا دخلت في التاسع بقيت بتعب من أقل حركة ود كان سبب لي سراج انو يمنعني الشغل قال لي بعد الولادة ارجعي شغلك ،، اتصل علي إياد بعد اتصلوا عليهو ل موضوع مشكاة وريل قال لي م ح يقدر ينزل لانوو الشغل كان كتير يداب سافر علشان يلحق الأتراكم أيام العرس علشان كدا الموضوع ح يكون عند ناس رئبال ح تكون خطوة خطوبة ليس إلا وبعد الدراسة ح يشوفو الببقى ،، قفلت منو اتكلمت مع سراج علشان يوديني لانو الليلة الجمعة ماف شغل فعلا الخطوبة كانت بعد الصلاة طوالي ،، مي اكتر واحدة مبسوطة قالت لي كنا صحبات بقينا اخوات ونسايب قلت ليها شفتي القدر دا كيف،، بعد فاتو والبيت اترتب كنت ح ابيت بس عشوش قالت لي ماف طريقة سوقي راجلك واتوكلي..
طلعنا بعد العصر ونحن ف العربية قال لي عايزة حاجة قلت ليهو لا بس خلينا نمشي نسلم على ماما منال اشتقت ليها قال لي الليلة البيت ملان ح يكونوا كلهم قاعدين م بتقدري تاخدي راحتك معاها ف الكلام قلت ليهو وأنا مستغربة لي م قلت لي من امس؟؟
قال لي انا زاتي م عارف كلمتني هي قبل شوية اتصلت ووريتها اننا م بنقدر نجي مع خطوبة اخواتك وكدا وبعدين الاجواء بقت متوترة بعد موضوع مؤيد دا حركات ابوهم واضحة شديد بس الله يستر من القنبلة الحتتفجرر قلت ليهو عيب والله يظلم بنتو ومؤيد ، اقلاها يفكر ف بتو وسعادتها و...
فجأة شفت انسانة قطعت كلامي، كانت قاعدة قدام مبنى كبير وماسكة لعبة ف يدها شعرها منكوش وبترجف بتتلفت يمين وشمال قلت ليهو بسرعة سراج اقييف دقيقة!!
داس فرامل قال لي بسم الله مالك الحصل شنو!!
فتحت الباب نزلت وهو كان وراي بقول لي سمرر اقيفي ماشة وين، م كنت فاهمة شي بس بقول ف نفسي معقووولة دي هي زاتها!!
لقيت نفسي قدامها كانت بتقول شال مني محمد ولدي ،، هو قال جاي منتظرة محمد يجي دموعي م وقفت رفعت راسها عاينت لي مسافة وقفت على حيلها وقالت لي جييتي توديني لي ولدي مش يا لقاء؟؟
سامحتيني وقلتي لي بجي بسوقك ليهو امس كلمتيني نسيتي ولا شنو ؟؟
ضميتها علي شدييد وكنت ببكي بكل ما أوتيت من قوة فجأة سمعت صوت بقول لقيناها يا دكتور تعال فكتني ومما شافتهم بقت ترجف اتدست وراي قالت لي م تخليهم يسوقوني م عايزة امشي معاهم...
وصل الدكتور قال لي بتعرفيها؟؟
البت دي معانا ف المستشفى النفسي قريب لأربعة سنوات ماف زول سأل منها طالما أهلها موجودين لي رميتوها بالطريقة دي؟؟
كنت مصدومة من السمعتو قلت ليهو كيف يعني بتقول ف شنو انت م فاهمة قصدك فيحاء مريضة نفسية؟؟
قال لي هو اكتئاب اكتر من مرض نفسي،، كانت محتاجة جو أسرة اسبوعين تلاتة شهر ح تطلع من حالتها دي لانو حكت لي حياتها بالتفصيل انا عارف كل شي بإستثناء الأسماء، لمن حكت لي كانت شخصيات بدون أسماء م قدرت اوصل ل زول من اسرتها..
