ثم ماذا

66

الجمعة 1:00 ظهراً

كانت الزغاريد تملأ كل المكان، كل الموجودين تغمرهم السعادة الا هي واختها، كانت تسرح لدرجة انها لم تسمع من تلك الزغاريد شي حتى شعرت بيده وهو يمسك بها ليتجها ناحية "الجرتق"

"على لسانها"

الليلة عرسي أو ممكن أقول موتي من مؤيد، للآن متذكرة لحظة جاني رئال ف غرفتي قبل اسبوع هو نفس اليوم الوقعت فيه بس بالمسا..

- عاجباك الدراما العملتيها دي يعني قولي من الأول انتي ومؤيد بتحبو بعض وخلاص الا يجي هو يتكلم معاي ويستعجلني للعرس يقول عايز يعقد الجمعة لأنو مسافر السبت حيقعد شهرين وما عايز يتأخر ولا ثانية..

كنت مصدومة من السمعتو قال لي اها موافقة؟؟
انا عارف ردك بس جيت اكلمك واسمعو منك قال ح يعمل عرس الجمعة وحيكون عرس زي سمر جرتق بس قلت ليهو وأنا بعاين للارض موافقة يا رئال..

هو افتكرني خجلانة بس انا مكسورة شدييد💔
مكسورة ومخذولة لأبعد الحدود، م عارفة الحصل شنو وكيف بس لقيت نفسي فجأة لابسة توب الجرتق وفي جنينة بيتهم ماسك يدي وببشر كأنو فعلا مبسوط بعديها لقيت نفسي ف العربية وكان سايق سراج، ونحن ف الطريق كانو بتونسو وانا ساكتة سراج قال ليهو طيارتكم متين؟؟

مؤيد قال ليهو ح نقعد هنا فترة اسبوع او اتنين وبنسافر قال ليهو اصلو المستشفى ادتك اجازة كم؟
مؤيد قال ليهو شهرين ،، كلمة من دا ومن دا لحدي م وصلنا شقة سراج قال ليهو جهزت كل شي ح تستلم مفتاحك بس قول ليهم رقم الشقة مؤيد قال ليهو طيب تسلم يا مااان ربت على كتفو م كنت مركزة معاهم بس شوفت سراج أدى ظرف ل مؤيد وبعديها دخلنا الشقة..

كنت ف السرير بعد مؤيد دخل الحمام بدون حرف من واحد فينا، شريط حياتي مرّ علي بقيت ببكي بدون صوت، كيف ريلان الكان همها بس م تفوت عليها حصة لأنها ممتحنة حاليا همها انو ربنا يخلصها من اللي هي فيها؟؟

كيف طموحاتي تتغير بالسرعة دي طيب قرايتي؟؟
انا ح اقيف هنا وخلاص كدا حلمي اني ابقى زي ماما انتهى؟
طيب حق ماما الكنت ناوية اجيبو اعمل شنو ؟

لقيت نفسي انهرت بالبكاء مؤيد جا طالع على صوتي قال لي ريلان بتبكي ليه!!

عاينت ليهو وقلت بالجد انت بتسألني ببكي ليه!
م شايف ف حاجة بتستدعي البكاء صاح؟؟
المفروض اضحك وأكون مبسوطة لأني اتزوجت بالطريقة دي ..

قاطعني وقال لي ريلان بغض النظر عن القلتيه نحن الاتنين عارفين انك غلطانة وما بقول ليك كدا علشان تحسي اني اتزوجتك مجبور بالعكس يا ريلان انا اتزوجتك بكامل قواي العقليه وانا مبسوط شدييد كمان، وم طالب منك غير انك بالجد تكوني عرفتي غلطك يا ريلان وترجعي ل ربنا، عارفك ف لحظة طيش ومراهقة عملتي كدا بس بتمنى انك اتعلمتي درس وم ترجعي تفكري ف الماضي لو عايزة بالجد نمشي ل قدام..