عدت علينا أسوأ ايام ف حياتنا حقيقة موت عمو احمد أثر فينا كلنا حياتنا بقت ماليها معنى اتلاشت الضحكة مننا نقول شنو عاد الموت حق وربنا أراد ف النهاية كلنا لها ،، الحياة م بتقيف بتستمر ب حلوها ومرها ...
حقيقة لقاء مرت بفترة نفسية صعبة شديد م قادرة تتقبل موت ابوها م قادرة تتواصل مع زول دمعتها م بتقيف من جفونها حاولت معاها بكل الطرق الممكنة ف النهاية قلت اخليها تطلع الفي قلبها احسن من تكتمو لاني اكتر انسان عارف يعني شنو تفقد عزيز وغالي 💔
يوم بعد يوم وانا م فارقت لقاء ولا لحظة قعدت معاها شهر كامل ودعوات كمان بتجينا وبترجع حاولنا نغير فيها وننتشلها من الحزن الفيها بدت تستجيب وبمساعدة إياد قدرنا ننجز 🖤
كان قاعد تحت شجرة وبمسح في رأس بنتو بكل حنان الدنيا وبقول ليها انتي عارفة يا لقاء شايفك دكتورة كبيرة ،، عليك الله يا بتي ما تباري الدرب الشين العملوهو فيني امك واختك ما تعمليهو وخلي بالك من اخوك زاتو خليهو جمبك م تفارقيهو ما ليكم غير بعض ،، كدي قومي شوية ماشي بنادوني
- ابوي اقيف ماشي وين سوقني معاك
** لالا انا ما راجع تاني انتي خليك عندك مستقبل
- ابوي دقيقة عليك الله سوقني
راجع منها خطوة ورا خطوة وهو بلوح ليها ب يدو " مع السلامة " وهي مادة يدها وبتبكي " سوقني معاك " لحدي م اختفى من نظرها
" ابووووي " دي كانت صرخة لقاء وهي صاحية من النوم قلت ليها بسم الله يا بت مالك استغفري انتي شكلك كنتي بتحلمي طوالي حضنتني وبقت تبكي وتقول لي فات خلاني يا سمر قلت ليها لقاء لا اله الا الله قالت لي محمد رسول الله
- بتعترضي على حكم ربنا؟! م مؤمنة انتي؟! عارفة انو الموت حق صاح ولا لا ؟! وبنفسك قلتي لي الكلام دا قبل كدا صاح ؟! ما حانة على نفسك انتي؟! طيب واخوك المسكين دا ذنبو شنو يخسر ابوهو واختو ف نفس الوقت؟! لو م دايرة تقيفي على رجلك عشان نفسك على الأقل اقيفي عشان اخوك المسكين دا شوفي الناس نزلت المدارس ليها اسبوعين وهو للان م راضي ينزل عشان حالتك دي ،، وانتي؟! ناسية حلمنا البنعافر عشانو سنين ودنين؟ نسيتي اننا انقبلنا طب وح ننزل بعد اسبوعين وللان م شايفة لي أثر لي حاجة زي دي ،، وإياد!! عارفة حالتو كيف ؟! عارفاهو بعاني قدر شنو عشانك ،، فهمتيني قاصدة شنو صاح يعني بي حالتك دي م بتتدمري براك كل البحبوك بتدمروا معاك عشان كدا يا لقاء قومي عافري الحياة مستمرة ،، يلا انا طالعة اشوف إياد برجع بعدين طلعت وقفلت الباب وراي
_____
في المستشفى ...
** المدام حملها صعب شديد يعني محتاجة راحة بذات انو دي شهورها الاولى اقل حركة ح تعرضها للاجهاض عشان كدا خليها ترتاح يلا انا بستاذن
- طيب شكرا يا دكتورة ،، بعد الممرضة طلعت سمع صوت المريضة بتقول ليهو
* هيثم انا ما دايرة الولد دا اقولها ليك كم مرة عشان تقتنع اطلعوا من حياتي قلت ليكم
