مروا شهرين واولادي عمرهم ستة شهور، سلوان دخلت ف السابع، طل ف السادس، عشوش ومشكاة وغصون سافروا زيارة للسعودية رسلها ليهم عمو عبد الرحيم وح يجي معاهم نهائي لكن غصون ح ترجع قبل التلاتة شهور لأنها ممتحنة
انا قاعدة مع ناس رئبال لي اسبوعين كدا، مقضينها ونسة وضحك حتى ريل معانا لأنها خلصت سمستر فوور 🖤
أما سراج ف ماف بينا حاجة غير الأولاد كالعادة، كان بجي كل يومين يشوفهم وبقول لي:
" ربنا عالم وشايف يا سمر ولو أنا غلطان ربنا بعاقبني، م بيأس وكل صلاة ح ادعي وبنتظر"
كنت بفكر ف اذا هو غلطان اختك برضو غلطت يا سمر بس والعملو هو نفس العملو اخوهو طيب الفرق شنو؟؟
الفرق انو راجلي، يعني انا على ذمتو مشى ل واحدة تانية وانا بين الحياة والموت يمكن اكون اتجاوزت الحصل بس م قادرة اتعامل معاهو عادي..
بعد يومين ريلان جات راجعة عملو كرامة صغيرة كدا واهلو جو فطروا معانا حتى ميعاد جات بس غير السلام لساني م خاطب لسانها، بطنها ظهرت وواضح انو حمل ستة شهور ، بعديها كلهم فاتو..
بعد اسبوع ريلان رحلت بيتها بس كانت بتتعامل معاي كأنها خايفة مني، قبل تمشي ب يوم بالليل مشيت غرفتها كانت صاحية بترتب ف كتبها عاينت لي وسكتت قلت ليها ريلان عايزة اتكلم معاك قالت لي سمر أنا آسفة على كل موقف بدر مني وبعتذر على العملتو قلت ليها انتي م تعتذري مني بالعكس اعتذري وتوبي ل ربنا هو الغلطتي ف حقو، عارفة صح ؟
نزلت راسها ودموعها نزلت، قلت ليها م تبكي يا هبلة حضنتني وقالت لي انا غلطت في حقك كتيير سمعتك كلام كتير بس برضو كنتي بتسكتي تخليني، كنت وقحة شديد بس برضو اتحملتيني يمكن لو كنت محترمة معاك كان اتعلمت الصح من الغلط وم وصلت للمرحلة دي آسفة يا سمر آسفة..
مسحت على رأسها وقلت ليها حبيبي انتي اختي الصغيرة آخر عنقودنا م بزعل منك مهما كان، كل تصرف عملتو كان من خوفي عليك ولي مصلحتك م تزعلي مني ف اي شي ولو عندك اي حاجة م تتردي اعتبريني صحبتك طيب؟؟
هزت لي راسها بمعنى اي قلت ليها ريلان حافظي على نفسك وسمعتك وفكري ف ابوك اخوانك الواثقين فيك، اي تصرف تاني م بتحسب عليهم بس بتحسب كمان على مؤيد فهمتي علي يا ريلان حافظي على بيتك شديد ومؤيد م زول بنخاف انا بعرفو شديد وعارفة هو شنو بس انتي كوني قدر العملو طيب؟؟
اتكلمت معاها كتيير بقيت برتب ليها ملابسها جات ريل شايلة خلود بتبكي قالت لي بتك فظيعة قلت ليها رفعتيها مالك انتي خليها ف الأرض دي بتلعب لعبها قالت لي م بتقع؟؟
قلت ليها خاتة ليها مساند تقع كيف اسي تاني م ح ترجع خربتي مزاجها ،، خلود كل م تكبر ملامحها ماشة ل سراج م خلت ليهو حاجة حتى رفعة الحاجب حقتو..
