الليلة جو اهلو اتقدموا لي وهو كان خلاص ف مطار الدوحة اتصل علي وقال لي برجع ليك بعد اوصل السكن..
ماف زول مشغلها لي زي مؤيد قال لي انا قلت ح اتخرج وارتاح من خلقتك تقومي تجي بيتنا حيوان خلاص😒
وأما إياد دا كمان براهو اتصل علي قال لي مبسوطة وعايزاهو عن قناعة ولا بتجبري ف نفسك؟
- إياد بتتكلم كأنو م صحبك لي انت م بتعرفو؟
قال لي انتي اختي وبتي وربيتك على ايدي كيف م اكون عايز راحتك، اعرفي انو معرفتي بيهو وصداقتي معاهو حاجة وانتي براك حاجة تانية خالص قلت ليهو والله يا إياد انا م شايفة حاجة بتخليني ارفضو وخصوصاً بعد استخرتا فيهو شرطي الوحيد كان اني اكمل قرايتي واشتغل وهو م عندو مشكلة على كدا اتوكلت على ربنا الا لو ف حاجة ل قدام م بتخليني أواصل قال لي يبقى ربنا يكتب الفيهو خير وبالمناسبة قررت ح انزل نكمل عرسنا انا وطل قلت ليهو متين ومش طل م خلصت قراية لسة؟ قال لي هي خريجة زيك قلت ليهو يبقى خليها تخلص البيت ومسؤولية القراية ح تكون جوطة م تحاول تفتح موضوع زي دا معاها خليها تخلص قال لي طيب معناها ننتظر كم شهر تاني ..
اتكلمنا مسافة وفصلت منو لانو سراج رجع لي ..
- مسا الخير يا كُل الخير 🖤
* مسا الخير وصلت كييف قال لي الحمد لله وصلت صليت المغرب والعشاء اتعشيت وحاليا ف بلكون الغرفة شايف العالم من فوق هادئ والجو ظابط شديد عايز تكون مع انسان بتحبو تكون ماسك ايدو وبتحكي ليهو عن كل الحجات المضايقاك حقيقي يا سمر أنا بتضايق لمن ابعد عن بيتنا وجو الناس البحبهم علشان اجي وأكون وحيد ،، بس ببعد علشان الإنسانية والمرضى المحتاجين لي ،، بحس انو لمن ابعد ح ارجع والقى ف ناس ناقصة ومرات بقول احتمال انا زاتي م ارجع..
سكت مسافة وقال لي م تركزي م كلامي انتِ كيف قلت ليهو لي سكت واصل ضحك وقال لي علشان م تقولي لي صحبتك كلامي كتير وفرحان مش بتعملو كدا انتو البنات؟
قلت ليهو يا ريت لو عندي صحبات واحدة الله يرحمها والتانية ف قطر انت بتتكلم عن الوحدة وانا عشتها ف وسط البحبهم ،، لو ما مؤيد م كنت متخيلة حياتي كانت كيف حقيقي هو وقف معاي ف اللحظات الكنت م بطيق فيها نفسي هو اتحملني ف أسوأ حالاتي حقيقي يعني بختك بيهو شديد والله
قال لي على فكرة انا بغير عليك حتى منك قلت ليهو ياااا شيخ قعد يضحك وقال لي وانا فخور بالجد انو مؤيد اخووي وبتمنى كل الناس تكون مؤيد قلت ليهو ربنا يحفظكم ل بعض قال لي ويحفظك لي برضو سكت م رديت واصل كلامو بالمناسبة منتظر ردك انا قلت ليهو رد شنو قال لي
" اكتشفي السر واخبريني الرد "
سكت مسسافة وقلت ليهو دقيقة خليك معاي ،، قمت طلعت الدبدوب من تحت السرير فتحت السستة البي ورا دخلت يدي وطلعت شوية من القطن لقيت صندوق صغير فتحتو لقيت دبلة ومحبس قعدت اتبسم براي شلت تلفوني وقلت ليهو سراج انت م جادي قال لي شكلك لقيتي السر طيب وريني ردك قلت ليهو انت جادي انت عامل دا كلو طيب عارف الدبدوب دا ليهو كم عندي وانا ولا مشيت جمبو بتصدق قال لي انا عايز الرد بس قلت ليهو انت سلفاً عارف الرد والدبلة جابوها لي اهلك قبيل قال لي ديك دبلة من اختيار اهلي والفي يديك دي اخترتها براي بي كل الحب الفي الدنيا والبسيهم الاتنين يلا ردي لي قلت ليهو طيب انا موافقة يا ود عز الدين والدبلة الفي يدي دي م ح البسها الا وانت قاعد أو ح اخليك تلبسها لي ب نفس الحب الجبتها بيهو وح ألبس الجابوها اهلك ف اليمين ومن الليلة ح اسميك سِر 🙈🖤
