ثم ماذا

يتبع🖤

" معظم الناس قالت انو الأسماء الكتيرة شوشت ليها راسها ف قررت انزل شوية علشان اللخبطة وكدا🖤"

"على لسان زينة"

تسعة سنوات، ربنا رزقني ب بنت بعد تسعة سنوات من زواجي م بنكر الشعور اللي كنت بحس بيه لمن اشوف أم مع أولادها سواء كانت سمر او منى او زرابي، بس كنت بردد نفس دعاء سيدنا زكريا عليه السلام

"ربِ لا تذرني فرداً وأنت خيرُ الوارثين"

حقيقة يعني شفت قدرة ربنا وكنت مؤمنة بقضاءه وقدره وواثقة انو منتظرني الأجمل وفعلا حصل الحمد لله..

باك فلاش..

قبل أربعة سنوات كنت بتكلم مع أمي وزلفة وطلبوا مني اجي عمرة وكدا اشتاقوا لي وانا فعلياً اشتقت ليهم كتيير، كنت ف طريقي ماشة ل سمر في بيتها لأنها طلبت مني اجي جاينها أصحاب سراج، في المطبخ معاها بعد جهزنا وخلصنا فجأة جاتني دوخة وهي نفس الدوخة المقابلاني ليها فترة..

سمر انتبهت لي قالت زينة انتي كويسة؟!
قلت ليها اي دوخة شوية وبتروح متعودة عليها
قالت لي متعودة عليها وساكتة؟
قلت ليها م مشكلة بتروح..

م خلتني وقالت لي نمشي الدكتور أصرت علي شديد لمن مشينا وما عارفة أوصف ليكم احساسي بعد قالوا لي انتي حامل، حرفياً سمر م قدرت تسكتني خالص ومن الفرحة بقت تبكي معاي..

رجعت البيت مبسوطة شديد منتظرة ايمن يجي بعد جهزت الوقة الكتبتها ليهوو، بعد جا خليتو اتغدا وهو راقد ف الغرفة جيت وقفت وقلت ليهو أيمن عايزة اقول ليك حاجة مهمة قعد ف نص السرير وجراني قعدت جمبو قال لي سامعك، طلعت الورقة اديتها ليهو..

ايمن بكى!!!
والله ياجماعة بكى زي الشافع بقيت اسكت فيهو واضحك ضماني شديييد وقال لي الحمد لله ربنا العالمين ربنا كريم

يوم، اتنين وشهر واتنين لحدي م انتهت رحلة وهن على وهن وجاتنا احلى بنوتة سميناها افنان حالياً عمرها تلاتة سنوات، قصتي خلتني اكون أقوى وايماني بقى اقوى وبرضى بالقدر خيره وشره ودي من أركان الإيمان 🖤

مرات الحاجات البتحصل ليك وبتأذيك بعدها فرحة فأصبر🖤.
" ربِ لا تذرني فرداً وأنت خيرُ الوارثين "

_____

"على لسان ريلان"

الحمد لله اتخرجت من الصحافة والإعلام بدرجة إمتياز، انتدبوني برا السودان محل شركة ماما وقعت معاهم عقد سنة بس علشان اثبت نفسي فيها، سافرت مع مؤيد وكنا ف نفس سكن رئبال مجرد م خلصت العقد طلبوا أواصل معاهم بس انا رفضت، م عايزة قصة ماما تتكرر فيني..

رجعنا السودان بمجرد ما تمينا شهرين اكتشفت اني حامل، كنت مبسوطة شديد وفرحت اكتر لمن رجعت السودان ح اربي طفلي هنا في بلدو قدام اهلو احسن من الغربة العشتها انا..