عاينو ف الأرض للتلفون الوقع جمبهم شافو رجول سيد التلفون برضو جمبهم رفعوا رأسهم فيحاء وقفت على حيلها من الصدمة وقت شافت الشخصية
** احمد ...!!
- كدي عيدي كلامك قلتي شنو!! زهجتي منو ودايرة تشوفي غيرو ...!
انتي ... انتي فعلا مستحيل تتغيري ،، ندمان على حبي ليك ندمان على كل لحظة قضيتها منتظرك فيها ،، الله يلعن اليوم اللماني بيك ،، عارفة حاجة ؟! حياتك كلها غلط في غلط بس فيها صاح واحد عارفاهو شنو ؟!
كلامك القلتيهو لي قبل سنين ...
" أنا ما بستاهلك "
وفعلا طلعتي ما بتستاهليني 💔
ردت ليهو والدموع ف عيونها : اااحمد انت ،، انت ...
قاطعها صوت توتة وهي جاية عليهم بتقول بفرحة فيوووووحة عديل يا محاسن الصدف والله
فيحاء عاينت ليها والحزن ظاهر ف عيونها م ردت ولا حرف اتفقعت بالبكاء
أحمد قال بصوت حازم : من اللحظة دي يا آيات تنسي انك بتعرفي المخلوقة دي ولو دايرة يشيلو عليك الفاتحة خليني اسمع انك لاقيتيها بالغلط ساي أو اتكلمتي معاها ،، جراها من يدها وطلعوا
أحمد ••
ما اظن ف أسوأ من كسرة النفس والخذلان 💔
أنا قضيت عمري كلو منتظر لي سراب ،، قضيت عمري بنفخ ف قربة مقدودة ،، قضيت عمري متأمل اني ح ارجع وألقى حب حياتي اتغير بس بالجد لقيتو اتغير وشديد كمان ،، فيحاء اتغيرت للأسوأ م كنت متخيل انو كلامها الكانت بتقولوا لي ح يطلع صاح ف يوم من الأيام ...
" انا ما بستاهلك " " شوف حياتك م تتوقف علي "
كلامها كان كلام زول عارف نفسو ح يعمل شنو ،، هي كانت عارفة نفسها م ح تتغير ،، طيب م كان توريني لي خلتني انتظرها العمر دا كلو ...؟!
صحي هي ورتني قبل كدا طيب لي أنا م صدقتها ..!
هل الحب بعمل كدا...؟!
الحب بخلي الزول أعمى للدرجة دي...؟!
يلعن أبو دا حب ياخ لو الحب كدا ،، نفس الحب دا ح يخليني اطلع من البلد دي ف نفس اليوم الجيتها فيهوو..
متخيلين انو نزلنا السودان الليلة بإصرار مني طبعا علشان حضرة سيادة فيحاء ،، علشان اتزوجها ونرجع مع بعض بس الحصل شنو ...؟!
كل الأحلام الرسمتها " بح " 💔
من دربي مشيت الوكالة قطعت تزاكر الرجوع وح اخلي كل شي وراي ...
_____
فيحاء ••
انصدمت ف جية احمد !!
يعني هو مخلص للدرجة دي ،، للدرجة دي هو بحبني ،، طيب انا كنت شايفة حبو لي كنت بتجاوزو!!
وصحبة عمري آيات خسرتها برضو ؟
ياما ساعدتني ف حياتي ووقفت معاي ف أسوأ ظروفي وانا بالمقابل عملت شنو...؟!
