قبل م تكمل كلامها باب الغرفة ضرب وراجلها جا داخل قال السلام عليكم رديت ليهو السلام وكنت طالعة وقفني قال لي خليك أساسا أنا م مطول ساعديها علشان طالعين على طول طيارتنا بعد المغرب
قرّب منها خُطوتين باسها ف راسها لبسها الدبلة وطلع على طول خلانا ملخبطين والعجب أنا راسي جايط شديد وم فاهمة حاجة اتلفت على دعوات طوالي
- طيارة شنووو يا دعوات .....!!!!
هي م كانت اقل صدمة مني ب حاجة ،، قالت لي صدقيني أنا زاتي م فاهمة حاجة بالنسبة للبحصل دا طيارة شنو والهبل البقول فيهو قبل شوية ،، أنا م قادرة مهبطة شديد وخايفة
ضحكت على حالتها بالجد ملخبطة شديد وضربات قلبها بتقول حكايات 😹
كُنت ح اطعمج فيها بس امها جات استعجلتنا وقالت لي خليها تجهز سريع العريس قال اطلعوا بعد كدا علشان الزمن
فعلاً ظبطتها شويتين ولبستها النقاب الماليزي تبع الفستان كدا بقت جاهزة فعلا حصنتها وطلعنا 🖤
الزغاريد ملت البيت ،، دموع الفرح والوادع من أمها وأخواتها خالاتها وعماتها ،، قدر م حاولت احبس دموعي ف النهاية خذلتني لمن حضنتها كأنو مات لينا زول بكينا على قدر م نقدر إلا فكونا من بعض
ركبها راجلها العربية وقالوا لي امشي معاها لانو ح يودوها ناس عمها اول اللي هو بيت راجلها علشان تسلم وتودع عمها وحبوبتها ام ابوها برضو كانت هناك ف اضطريت شلت شنطتي معاي
مشيت معاها نزلنا قعدنا شوية وبعديها أحمد قال ليهم نحن نمشي يا جماعة علشان الزمن ماشين للخرطوم نحن بعدا علشان نلحق الطيارة
فعلا طلعنا بس علشان م اعطلهم خليتهم ينزلوني الشارع الرئيسي بعد ودعتهم شلت شنطتي ونزلت واصلت طريقي ..🚶♀️🖤
_____
صحيت حوالي الساعة عشرة صباحاً لأني كنت مرهق شديد بالذات المستشفى يوم الخميس بتكون زحمة وعمليات كمية وخصوصاً إني م نمت إلا بعد الفجر لأنو الرفيقة م خلت لي مجال الا وعشعشت فيهوو 🖤
بعد صليت الضحى الحاج قال لي اطلع علشان المسافة بعيدة شوية نلحق العقد م يفوت ،، صدقوا نسيت اني ح اوصل الحاج عرس ود صحبو 🤦♂️
جهزت نفسي ع السريع كدا وطلعت طول الطريق ابوي بتونس معاي سيرة العرس وما ادراك
- انت يا حاج داير تدبسني لي !.
* داير افرح بيك شوف اصحابي أولادهم كلهم عرسو انت زاتك عرس وأخوك التاني داك برضو راسو قوي كل يوم بقول ليهو عرس بقول لي م جاهز الناقصو شنو !؟
- لأنو فعلا يا أبوي م جاهز وما شرط يكون م جاهز من الناحية المادية ،، يمكن م لقى شريكة حياتو المناسبة ويمكن عندو أولويات أهم من الزواج ويمكن ويمكن..
