عدت أيام ثِقال شديد علي بقيت آلة متحركة من البيت للمستشفى والعكس، بمشي بيتنا بعد كل يومين اسلم على امي وارجع بيتي يوم مشيت ليها فتحت لي موضوع سمر..
- سراج انت م ناوي ترجع مرتك؟
* يا أمي سمر محتاجة وقت شوية ح اخليها تقعد مع نفسها يومين حتى امشي اتكلم معاها
- كدا يا ولدي م بجي امشي اقعد اتفاهم معاها وشوف البحصل شنو وان شاء الله ربنا يهدي سركم
* ان شاء الله يا حجة دعواتك بس
- وميعاد؟؟
* مالها كمان تاني بعد خربت بيتي
- كدا م صاح يا ولدي ف النهاية برضو مرتك وأم ولدك، م تنسى انتو غلطانين وبتصلحو ف غلطكم م تبقى كدا
* والله يا أمي أنا عرستها علشانكم بس وم تتوقعو مني اي شي تاني
- م ح توديها المقابلة؟
* م فاضي الايام دي خلي مؤيد يمشي معاها
- طيب الله يهديك يا سراج
طلعت من البيت بعد يومين من كلامنا دا مشيت لي سمر لقيت خالتها بعد سلمت علي وعاتبتي ونفس الكلام المتوقع اسمعو اعتذرت منها وطلبت اشوف سمر قالت لي م اظنها تسمعك راسها قوي قلت ليها انا بحاول معاها بس خليني اشوفها قالت لي ف غرفتها مشيت وطبعا كنت متوقع انها ح تسمعني ونتفاهم بس م قلت انها ح تطلع تخليني بالطريقة دي..
اول مرة اشوف سمر كدا، طول مشاكلنا بتنتهي مجرد م اعاين ف عيونها بس المرة دي حتى عيونها م قدرت افهم فيهم شنو
"ماذا بوسعي أن أفعل أكثر؟ لقد أحببتها بانبهار النظرة الأولى منذ أول لقاء حتى آخر تلويحة، لكن تلك المحبة الخالصة لم تكن كافية لانقاذنا. لقد أصبحت غربيةً عني الآن، بالكاد أتعرف عليها، حتى بريق اللهفة اختفى من عينها"🖤
اسبوع وانا عايش بين نارين من جهة سمر وعنادها حتى فرصة م عايزة تديني اشرح ليها، ومن جهة تانية أمي الواقفة لي الا اخلي بالي من ميعاد، أنا ميعاد م عارف عنها حاجة من يوم المشكلة ديك بس بشوفها قاعدة معاهم بقول سلام عليكم بقعد شوية وبطلع..
الخميس بطبعو المستشفى بتكون زحمة ف كنت شغال لحدي العشاء بعديها طلعت من الإرهاق م غشيت بيتنا طوالي مشيت بيتي نمت، صحيت الفجر صليت وتاني رجعت نمت..
صحيت مع صلاة الجمعة بعد اخدت دش كنت بلبس انتبهت ل تلفوني بضوي، نسيت اني خاتيه سايلنت كان مؤيد رديت ليهو قال لي سراج انت وين من قبيل بتصل عليك خالد دا تعب ف المستشفى تعال بسرعة قلت ليهو خالد منو يا مؤيد قال لي انت جنيت ولا شنو خالد ولدك م عارف حسيت بشنو حتى قميصي لبستو ف العربية..
وصلت المستشفى قسم الأطفال كانت سمر حاضنة خلود وبتبكي جمبها سلوان قلت مشيت ليهم بسرعة قلت ليها سمر خالد مالو الحاصل شنو؟
عاينت لي م ردت سلوان قالت لي نقص أكسجين هو جوا احدي الان م عارفين شي قلت ليها حصل شنو بالضبط قالت لي م عارفة بس بعد سمر حممتو تعب جابوهو طوالي قلت ليها لي ماف زول كلمني؟؟
