المستشفى التعاوني/ قسم التوليد
كنت ف غرفة الولادة خايفة شديييد والألم ح يقطع قلبي مؤيد ماسك يدي قال لي ريلان م تبكي حبيبي انتي ح تقومي بالسلامة، ما كنت مصدقة انو قال لي حبيبي عاينت ليهو ف عيونو قال لي بحبك يا ريلان وبحبك شدييد، طفولتك وبراءتك خلتني احبك انا حبيت كل تفصيلة منك حبيت نكدك وكلامك المتسرع حبيتك شديد بس انتي اطلعي من هنا بالسلامة وح نبدا حياتنا برانا مع ولدنا كنت ببكي والألم زايد صرخت شديد ف لحظة كدا جات الدكتورة قالت ليهو الوقت جا يا مؤيد اطلع..
م كنت عايزة افك يدو بس نظراتو طمنتني طلع وهو بعمل لي حركة القلب ب يدو، وبدت رحلة الولادة ..
من هنا انا عرفت يعني شنو أم، حرفياً امهاتنا تعبو فينا كتير ونحن عملنا ليهم شنو؟؟
كدي اي حد يراجع نفسو علاقتو كيف مع أمو هل هو راضي بيها أو لا؟
_____
كنا ف صالة الانتظار انا وسمر وأمي ومعانا خالتها اسينات، عدت ساعة واتنين ولسة عايش على اعصابي، ايوا حبيتها وشديد كمان، أنا وربلان عشنا مع بعض تسعة شهور كاملات وم احبها؟؟
كانت ف كل تفاصيل يومي وانا حالياً خايف عليها شديد، بعد فترة طلعت د.إيمان قالت لينا المريضة كويسة حمد لله على سلامتها بسس ،، هنا رجولي م حاسي بيهم شايلني قلت ليها بس شنو يا إيمان؟؟
قالت لي بس فقدتو الولد ربنا يعوضكم،، زعلت شديد وكنت متأكد انو ريلان ح تدخل ف حالة نفسية لأنها حساسة شدييد امي جات ربتت على كتفي وقالت لي ربنا يجعلو ليكم سلف م كنت قادرة أرد بس همي كلو ف ريلان، بعد حولوها الغرفة دخلت ليها لسة م كان فتحت كويس عدت شويتين كانت بتقول
ولدي مسكت يدها فتحت قالت لي مؤيد انا طلعتا!!؟
قلت ليها ايوا حمد لله على سلامتك قالت لي وينو ولدي م عرفت أقول ليها شنو قالت لي مؤيد ولدي وين؟؟
قلت ليها حبيبي ربنا يعوضنا ب غيرو، قالت لي وصوتها برجف ككككيييف يعني م فهمتكك؟؟
قلت ليها ريلان الولد مات فكت يدي وقالت لي بتكذب علي مالك امشي جيب لي ولدي مسكتها وقلت ليها اهدي يا ريلان..
وكأني قلت ليها انهاري بالبكاء، كانت بتبكي وتقول لي مش قلت لي ح نعيش مع ولدنا يا مؤيد اسي تجي تقول لي مات؟؟
كيف يعني مات م تكذب علي زح مني امشي جيب لي ولدي،، على صوتها دخلو ناس امي قالت ليها ماما قولي ليهو م يكذب علي امشو جيبو لي ولدي،، الممرضة جات شايلاهو ملفوف بقطعة بيضاء قالت لينا إجراءات الخروج خلصت ودا الولد ربنا يعوضكم..
كانت حاضناهو وبتبكي وتقول شوفو ولدي صغير هدا والله صغير كيف مات؟؟
م قدرت اتحمل منظرها طلعت خليتهم معاها، شويتين جات خالتها شايلاهو قالت لي م تدي ليها تاني خلونا نمشي علشان تدفنوهو، شلتو منها ضميتو علي كان صغير شديد قلبي وجعني عليهو بس الحمد لله ربنا يجعلوا ليها سلف ويدخلها الجنة🖤
