♧جحيم العشق♧Reflex

♤Part02♤

داخل فنص الليل دنيا ظلمة ...يمشي بهدوء باش ميديرش ضجة؛تفتح عليه الضو يشوف فيها واقفة مربعة يديها لصدرها تشوف فيه نظرة خالية من الحنية ...تبسم وهو يشوف فيها
-اوووبس خليتك نايضة حتى لدك ..ممم مش رح تسألي وين كنت ؟؟...هه خلي نقلك هاااكيي تشوفي كنت نلعب فلبالو وتوسخت ..محبيتش نحرجك قداام حباباتك وتحشمي بيا ..ودك نخليك ايا بونوي
-ريفااان الزم حدودك اعرف معمن تحكي
تبسم ومشى جيهتها بهدوء حتى لحق ليها شاف فيها من فوق لتحت
ريفان:مش أنا لي يتحطولي حدود أمي لغالية انا لي نحطهم منا وهك وانتم توقفو عندهم
-ريفان تعرف نحب مصلحتك ..واي شي يخرب مستقبلك نحيه قبل مايوصل يأثر فيك وعليك
ريفان:خليك بعيدة مش رح نعجبك هااه وننسى انو انتي امي حتى ..حضرات يستنى فيك متخليهش يقلق على حبيبتو ..وسلميلي عليه باس جبينها ومشى طالع ويدندن  ؛عوجت شفايفها وهي تشوف فابنها يفلت منها يوم بعد يوم
-خلي نشوفو هه
طلع شمبرتو هز تلفونو يحكي مع صاحبو
ريفان:شكون رح يكون فالرحلة
سامي:دفعة الاغنياء كيما تعرف ودفعة النجباء
ريفان:مممم رح نكونو مع الخباشيين خلي نتسلو
سامي:بففف رح تكون صماطة معاهم
ريفان :لأول مرة نتحمس سيرتو فبلاصة كيف هك ..خلي نبعد يامات من جو العايلة الي نكرهو
سامي:سافرت البلدان كاامل ومتحمستش قد رحلة جبلية مع خباشين هههه
ريفان:انا ميهمني حد حاب نستكشف منطقة جديدة ..مغامرة جديدة جو البنات لاعلاقة
سامي:وحتى سوزي
ريفان:لازم مقبلات ولا وش قال
سامي:نعرفك خامج ..تروح بطموبيل ولا مع البيس
ريفان:البيس
سامي:متأكد؟
ريفان:حااب كلشي جدييد رحلة جديدة
سامي:نتلاقاو عند مبنى الجامعة صباح متنساش نمشو مع 8
ريفان :صحا نخليك بونوي
سامي:بونوي
هز لي يحتاجو فكابتو دار دوش وجاا في بلاصتو حط يديه على عينيه حاب يصفي ذهنو ..حاب يخرج من القوقعة هدي
ريفان:رح يتغير كلشي نوعدكم ..لز على قبضتو دار على جنبو ورقد باش يقدر ينوض بكري
___________¤¤¤¤¤¤________¤¤¤¤___

تمشي وتجي فالغرفة توجد فحوايجها حبست وبدات تخمم وش ناقصها..خبطت راسها كي تفكرت نظاراتها
-اااع تقول رح نتزوج ..ياااي شحال متحمسة
-يااروحي رح تخلي امك ؟
دارت تشوف فامها واقفة عند لباب باين فوجهها الحزن ؛وعينيها مذبالين قربت منها وحضنتها
-ياغاليتي يااجوهرتي فالدنيا تعرفي بلي رحلة جامعية ونرجع ونكون معاك منخليكش
-نعرف اما انتي ولا مرة بعدتي على الدار ؛تعرفي انو انتي النور فظلمة حياتي وفغيابك رح تعتم دنيتي
--منروحش؟نبقى معاك ومنخليكش ابدااا المهم رضايتك ياحلى واروع ام فالدنيا
-لالا ؛انا حاباتك تروحي وتعيشي حياتك ويارييت بيدي نخرجك من هدا المستنقع لي رانا فيه؛انا مقدرتش نخلصك من هاد لحياة نتمنى تسامحيني
بقات تشوف فأمها تعباو عينيها بالدموع
-ماما متقوليش هك؛انتي عطيتيني الحنان لي اي واحد يتمناه ؛عوضتيني على كلش؛واذا كان هدا المستنقع فيه انتي وحياة اخرى مافيهاش رح نخير نبقى فالمستنقع المهم تكوني معايا وكي نحضنك نحس انو انا فدنيااا اخرى فيها كان انا ونتي بلاصة هاادية وفيها جنينة كيما نحلمو ديما ؛نتمنى انو يجي هداك النهار ونخرجك منا ونكون انا ونتي برك بعيد على كلش وعلى هاد المعيشة
-شوفي فياا نقلك ونوصيك
-ماما علاه تحكي كأنو آخر مرة نشوفك ؛مجرد رحلة 17 يوم او اقل ونرجعلك ونلقاك تستناي فيا ونرقد فحضنك ولانقلك خلاص بطلت منبعدش عليك
-ايرين ياروحي  ؛اي ام فالدنيا تحب مصلحة ولادها وتحب تشوفهم فرحانيين ومهنيين ..للأسف انا مقدرتش نخليك تعيشي كأي بنت مثلا شوفي رغم جمالك وعيونك لي يسحرو تخبي كلش وتباني بأبشع حلة مقدرتش نخليك تعيشي كأي بنت وهدا كلو بسبة عايلتنا
ايرين:متقوليش هك ماما الكل يختار كيفاه يسير حياتو..مي مش احنا لي نختارو فاي عائلة نكونو وانا بالعكس فرحانة انو انتي امي بغض النظر على بابا والعايلة
-طول عمرك عقلك كبير ولسانك يجذب اي حد بحديثك ؛نتمنى يجي نهار تلقاي الي يخليك تنساي هدا كل ويرجعلك حريتك المسلوبة والي مقدرتش نمدهالك انا ...ايرين برائتك متفقديهاش خليك الانسانة المتواضعة الي تقدر تخلي اي انسان يلجأ ليها
ايرين:بابا سماني بالعاصفة مكانش لي يلجأ لعاصفة ياماما
-متنسايش انو العاصفة كي تكون هادية تجي كيف  نسمة خفييفة وباردة تنعش الروح ؛ايرين متخليش الظلام والحقد يدخل قلبك والا رح تتدمري خليك نقطة النور ديما الي تجي فالظلام وتخليه ينقشع
ايرين:ماما خوفتيني علاه تحكي هك بمجرد رحلة؟
-هههه ياروح امك لالا تعرفيني نحكي برك ؛هيا ترقدي غدوة تبداي تجربتك نتمنى تكون مليحة ومتتنساش
ايرين:اكيد متتنساش يااي ياريت تكوني معايا
-ياللله لازم ترقدي هيا ؛ربي يحميك ..رقدت ايرين وامها تغطي فيها ..بقات تشوف فيها متعرفش علاه حاسة بشي مش مليح وانو متزيدش تشوف ايرين هدي لي قدامها..قلبها فيه مغص لكن محبتش تبين حابة بنتها تدي فرصة تشوف الحياة وتعيش كيما حابة ومتربطهاش بهاد السجن لي فيه ..بقات تشوف فيها وكانو تودع فيها ايرين طلعت عينيها فامها لي تشوف فيها مام هي مش حابة تبعد على امها وتخليها وحدها اما حبت تجرب وتغامر والا رح تندم طول حياتها
ايرين:ماما معليش نرقد فحضنك؟
-ههه اكيد
تسطحت بجنبها وايرين رقدت فحضن امها وهي تمسح على شعرها بحنية وتبوس فراسها ..شوي وقت حتى رقدت ايرين وامها تشوف فيها
-رح يجي يوم وتكرهيني فيه لاني امك اما رح تبقي بنتي لي نحبها ديماا؛لازم نتحرك ونوريك الطريق الصح وتخرجي مناا  وتتحرري من العالم الفاسد هدا
~~~~~~~~~~●●●●●●●●●●●~~~~
رايكم فاول الحلقات نعرف كلش سري ومابان والو ان شاء الله تعرفو فالحلقات الجاية رايكم بنوتات