♧جحيم العشق♧Reflex

⚜️part 38⚜️

كانت تايهة تشوف معاه قلبها يضرب ايرين عندها حق ريفان مش اي بنت تكون قريبة ليه هك ، يدها قلبها خايفة انو تشوف صحبتها هدا المنظر و هي تخمم في حل كفاه تخرجها بلا ماتتلاقاهم فجعها الصوت لي جا من داخل ؛ صراخ النسا طلع و الكل بدا يجري هنا و لهيه ، ريفان غير سمع الصوت شي واحد جا فبالو ، انو كاش هجوم سورتو بعد لي وصلوه ليه رجالو لبارح ،  ناض مخطوف عيط لفراس و فنفس الوقت يحاول يعرف منين الصوت
آيلا: ريييفو رصاص هدا صوت رصاص ريف خلينا نخرجو تعيش ، و دموعها بداو يطيحو و لصقت في ذراعو ، لحق فراس
: بوص كنت وراكم مكان حتى علامة لهجوم ! 
ريفان: حبيبي اهبطي منا بسرعة دك نلحقك
آيلا: لااا مستحيل رييف خليك معايا وهيا نخرجو
ريف تمالك اعصابو ميحبش يغلط معاها
ريفان:قتلك اهبطي ومتناقشينيش آيلا ، فراس ديها خرجها من
غير قالها اسمها عرفت انو جدي فهدرتو اما خايفة
آيلا: لاا نحب نكون معاك منروحش مع فراس ...
قبل ماتكمل نطق بعياط:### ### قتلك اخرجيييي وستنايني برا بسرعة ، فراااس
شدها فراس مخبيها في حضنو و خرجها بالروب لي كانت تقيس فيه و هي من فجعتها مزادتش حرف و مزادتش حتى دارت وراها ، مسح على وجهو ومشى جهة وين سمع الرصاص المرة الاولى و بدا يسمع في تكسار زجاج و صراخ غير لحق فتح عينيه صفاحي يشوف فوفاء مسمرة فبلاصتها و ترجف شاف وين تشوف و راح بالو ديراكت لايرين قلبو طاح بين رجليه
ايرين كانت رح تبدل و جات تعيط لوفاء تعاونها غير خرجت شافت وفاء مصدومةو تشوف في جيهة وحدة ، و ثم انتبهت لريفان لي طالق لاطاي في كرسي الانتظار و طفلة بظهرها و سمعتها كي قالتلو حبيبي و دلعاتو و كملتها نقزت عليه تحضن و هو بادلها الحضن و باين فرحان  و لي فهماتو كان كافي باش يحطم قلبها و ذرة الامل لي كانت عندها و يخلي كابوسها لي نهش ليلها و نومها حقيقة  ، تبسمت بمرارة لازم تبقى قوية هي تحملت اكثر و هدا الشي مش راح يحطمها ويخليها  ، هي في فترة تاع يكون معاها يفهمها يحس بيها ، يفهمها كلش و يحطلها النقط على الحروف معادتش تتحمل صدمات اكثر او تعرف وش دير وين تروح ؛دخلت قبل ماتشوفها وفاء تركزت على الحيط وهي تمتم: الغلطة منك ، هو عدو باباك تصدم في حقيقتك و بين ليلة و ختها يحن عليك و يكون معاك ، ويكت تحبسي تامني لي جا ، هههه حبك عماك و نسيتي كلشي اصلك و خدمتك ، يمكن انتي وسيلة يلحق بيها وين حاب و يكسر بيها لي حاب ، نسيتي هو شكون بن شكون ، انتي اساسا متعرفيش وش يخدم او وش جا يدير يومها و علاه خرب الصفقة ، يا ربي انا وش بيا علاه تخلط عليا كلشي و معدتش فاهمة والو عداني بتوسويسو هه يا ربي رح نهبل ، كل لي حاباتو حاجة واضحة علاه انا لي يصيرلي هك علاه ،  اوووف لازم تبقاي قوية ايرين متضعفييش بدا يضيق نفسها مررت يدها على رقبتها تجبد في النفس وتحاول تتحكم فروحها لا الوقت والمكان مناسب باش تندب على سعدها او يجوها نوبات
فتحت عينيها تشوف فروحها فالمراية لي قدامها اما فتحت عينيها على وسعهم وقت   تولهت لضو احمر ساطع منها المراية مش حقيقية !!  فآخر لحظة بعدت للجنب لآخر و الجهة لي كانت فيها تفجرت والزجاج عمر البلاصة؛ بسرعة انحنات هبطت مع لرض و جبدت سلاحها من خصرها ، بدات تقوص و تتفادى فالضربات بمهارة رغم انو مكان ضيق؛ حطت الكرسي لي ثم وقوصت على الشخص الي كان يقوص فيها و قدرت تقيسو لكنو هرب ؛ ريفان كان داخل وقت خرجت و فيدها المسدس وموجهاتو ليه ، قرب ليها وهو مفجوع يشوف فكل شبر منها ويتاكد انو متأذاتش ؛شاف فيها وفعينيها نظرة شككاتو انو لي قدامو ايرين لي يعرفها و كأنها متعرفوش او هو عدوها
ريفان:ايريناا راكي مليحة شكوون هدو وش صرا ، ### انتي كفاه تخرجي بلا حماية
كانت تشوف فيه دورت وجهها تشوف في الجهة لي كانو قاعدين فيها البنت مكانش اكييد ميخليهاش تبسمت وشافت فيه نظرة هو مفهمهاش
ريفان : ايرين ! سلاحك علاه موجه ليا !
وفاء:ايرين مليحة شكون هدو حسبت جاتك نوبة كيما قبل !
ايرين:خلينا نروحو بسرعة وفاء دك يجيو الشرطة مش حابة نعلق معاهم معندي طاقة ولا قدرة نتحملهم و منبعد نتفاهم مع ### لي حط راسو معايا
كان يشوف معاها مبهم و دايخ فيها خلاتو يشك في روحو ادا هو ريفان نفسو ، علاه تجاهلت سؤالو بل تجاهلاتو هو كل ؟!!  ؛كبس على يديه وجا يقرب حبسو صوتها لي فشلو
ايرين: مسيو ناصري معندك علاه تقلق شي يخصني و يخص عايلتي .. نتلاقاو فالاجتماع
ريفان:### بيا تسمعي فروحك وش تقولي ، انطقي يا ### كنتي في خطر و تقوليلي معندي علاه نتقلق ، وشبيك شكون هدو ، وفاء شبيها صحبتك وش صرالها ,  اما غير دور وجهو لوفاء لقاها تشوف فيه من فوق لتحت ونظرة اشمئزاز  على وجهها ، مفهمش وشبيهم وعلاه دارو عليه و علاه هاد العدوانية كل
خبات سلاحها هزت حوايجها شافت من ومن لقات الطابق فارغ فيه غير رجال ريفان لي باين هدا وين لحقو ، تبسمت وهي تشوف فيه  شدت وفاء من يدها ومشات بلا حتى ماتقيمو ، الدم جمد في عروقو ماعرف وش يدير فلحظة كلش تخربط الهجوم المفاجئ و تعاملها معاه ، مدارولها والو معناه كان تحذير ليها او المقصود اكبر و هي قدرت تتفادى الضربة !  وشكون هدو من جيهتها و جيهة منصف او كاين لي عرف باهميتها عندو و علاقتها بيه و حب يلعب معاه هدا يعني عرف انهم في نفس المكان  ، اما لي كلالو راسو علاه تصرفت معاه بهديك الطريقة ؛علاه هديك النظرة بالذات مستعد يموت الف مرة و ميشوفش نظرتها هدي
جاو الأمن يجريو باش يشوفو لي صرا قابلوهم رجال ريفان لي يوقفوهم و مخلاوهمش يدخلو للطابق ،
فراس عاود رجع ليه بعد ما طمن على آيلا و خلاها مع حماية ، شاف فريفان واقف و تايه باين يخمم فشي كبير : بوص خلينا نروحو ، الامن جا ، جا خارج وقفو واحد من الامن
-مسيو انت علاه جاي هنا تقدر تتفضل معانا لانو انت كنت في موقع الحادث و لازم تقدم افادة و زيد واش الرحال هدو كامل تخساب راك في مسلسل جاو رجالو يقدمو وقفهم باشارة ، شاف فيه من فوق لتحت و زفر على هدرتو وحكى بصوت قاوي : المشكلة هدي ماتتعمقوش فيها و هنا تموت القضية و شي ميخرج و قرب منو نسمع انو تحلت قضية و تحقيق و ### ندمكم واحد واحد
- كفاه تتجرأ تحكي معانا هك و شكون انت تحسب الدنيا سايبة و..
قلب عينيه قرب منو اكثر شدو من فكو وهمس في وذنو بعدها رماه طاح في لرض يرجف و مشى و لحقوه رجالو ،، و هداك من الخلعة مقدرش حتى يطلع راسو  او ينوض ، : ري ريفان ناصري بشحمو و لحمو مستحيل يبلع فريقو ويدعي انو ميديروش في راسو
قرب ليه صاحبو ينوض فيه  - : شبيك وش قالك ، شكون هدا و علاه رجال هدو كامل ، طوقو المول كل
- تقدر تقول انو نوع خاص من المافيا و مش أي مافيا !! البذرة الفاسدة في عايلة الناصري
غير خرج لقى آيلا دايرة شنوفة على عياطو عليها و رجالو معمرين المكان ، مشى ليها اعصابو تالفة مش قادر على دلالها
ريفان:آيلا الرجال دك يوصلوك ديراكت للدار و منبعد نتلاقاو
آيلا:اماا انا ....
ريفان: آيلا الطموبيل قدامك
آيلا : اوك اما خلي فراس يديني
شاف فيها شوفة معناها تنفذ وتسكت مشات ركبت وهي تشيع فيه بعينيها ؛ تنهد شاف مع فراس
ريفان:نسحق نعرف لي اصل و فصل لي صرا في المول  بسرعة و لازم تلقالي شكون ورا هدا الهجوم شوف سامي يعاونك
تأفف وهو يحك فراسو : شكون هدو ، احتمال يكون اعداؤو هو ضئيل جدا ،  اااه يا ايرينا وشمن مستنقع غارقة فيه، لازم نزرب في ### خططي و نخرجك و باقصى سرعة حتى لو لزمني نلغي كلشي ، هز روحو وديراكت للشركة من جهة باش يفري الامور و يسهلها على عمو كي يشد الشركة في بلاصتو ميحبش يتعبو معاه  ومن جهة لازم يحكي معاها ويفهم علاه تقلبت هكا من جيهتو
وفاء  فهمت انو ايرين شافت ريفان و كانت تسب فيه دارت كثر من سامي كي يبدا يحكي و ميسكتش ،
اما ايرين كانت هادية على غير العادة و تشوف مع الطريق تنهدت وحكات : رح ندمو على كلشي متخافيش خلينا نكملو مهمة غدوة و لباقي معادش يهم بففف مش حابة نشوف وجهو ، وفاء نتمنى خالد ميعرفش بالهجوم تقولي سمع !
وفاء: مستحيل هو يعرف كل صغيرة وكبيرة عليك ، عينيه ديما عليك ،و  مشفتيش هدرتو صباح
ايرين: رغم خيانة ريف .... هههه اامااا سيريوسلي خيانة ؟ انا ### فمخي ، هو قال انو ميحبنيش و خلط مليح في الهدرة و انا ركزت غير فلي حابة نسمعو ،  وش نتوقع منو؟ هو بفمو قال انا لي دخلت حياتو ، لازم نتحمل و هو يبقى راجل حتى و واشم اسمي على صدرو ميعنيش اني كلش فحياتو و الاهم من كل هاد الشي انو منعرف عليه ولا شي ولااا شي من غير اللي يخص عايلتو و هدا الجزء كانو ميخصوش عايلتو و هو لا علاقة بينهم ،  هو مأسس عالمو وحدو ، و محبش يعطيني ولو تفصيل صغير يخصو ،  يسمى منتوقع حتى شي ، و اصلا خلينا من لكلام هدا كامل انا وش كنت نتوقع انو رح نحب ونتحب ونعيش بسلام معاه عقلي وين كان لهدي الدرجة حبو خلاني منخمم فحتى شي ؟ نسيت واقعنا نسيت عايلتو ، نسيت حقيقتي ،  وليت نحس اني صح ظالمة خالد معايا ، انا وهو فنفس الكفة و نليقو على بعض ،  ريفان يمكن الشي هدا  فرصة باش نحمي حياتو  و خلاص ..
وفاء تشوف فيها كفاه تلعب بصباعها و رجفة متمكنة منها ، كفاه تخلط في الهدرة تدي و تجيب و تحاول تعطي مبرر باش تقوي روحها و تصبر ، كل الافكار فبالها خلطتهم و حطتهم ورا بعض ؛ اما كلامها الاخير خوفها ،
وصلو للشركة نزلو ،  كانت رح تدخل اما تبسمت و بقات واقفة عند لباب
وفاء:مش رح تدخلي؟
ايرين:رح نستنى خالد
وفاء:خالد؟ هههه خاالد من نيتك خالد تاعنا !
ايرين: ادخلي دك نلحق
وفاء:ايرين راكي تغلطي ، ايرين خليك من اللعب هدا ريفا...
ايرين : وفااء قتلك دك نلحقك
كبست على يديها و دخلت وهي بقات واقفة عند لباب و لسوء حظها ريفان لحق قبل خالد ؛ لزت على يدها وهي تمتم: بففف كفاه لحق بالسرعة هدي
شافها واقفة عند لباب تبسم ، حسب انو تستنى فيه ريقل شعرو و نزل من سيارتو يمشي جيهتها و يشوف في ملامحها كفاه مقلبة اما فيسع ترسمت ابتسامة على وجهها وقت شافت طموبيل تقدمت من لور ، يشوف في خالد يمشي بتكبر كيف عادتو و ابتسامة خفيفة على وجهو و يقرب لعندها فات عليه طلعو و هبطو و كمل طريقو لعندها
ربفان بقى واقف فمكانو يشوف معاها مباشرة  ويتحلف فيها بعينيه انو تخليه يقرب منها
خالد : حمامة ديزولي طولت عليك !
ريفان : حما حمامة !
مد يدو طرطق رقبتو و قدم ليهم عينيه مظلمين
____&_
شهور من الغياب والله مافهمت هاد رواية علاه صعيبتلي بش حطيتها مالغري راه الجزء الاول مكتوب كلو من فيفري 🙄المهم ليلة نحطو كل ان شاء االله بش نبدا نكتب الجزء الثاني