♧جحيم العشق♧Reflex

♤part11♤

مشاو جهة النطاطة(ترومبولين)شافتها صفقت بيديها وهو يشوف فيها متحمسة
ايرين:وش رايك فرقصة فيها
ريفان:ههههه اما رقصة تكون هنا اممم ولبستك مناسبة لهاد شي هيا هيا ديجا تحمست
ايرين:اااااااع خامج
ريفان:ههههه هيا تعرفي ولا مرة جربتها الا كي كنت صغير رح ترجعيني للصغر
ايرين:هههه خلي نجربو رقصة سبيسيال
ريفان:رح تكون رقصة من اختراعك تعرفي حاجة ايرين خليتي هدا النهار تاع الصح ميتنساش
ايرين:اشكرني وخلينا نعممو الفايدة
ريفان طلع حاجبو :كفاه تعممي الفايدة اه
ايرين:نشوف كاش مكتئب ونعيشو كيفك باش يرتاح
تمحات الضحكة من فمو وهي شمتها شدت ضحكتها وحكات قبل ماينطق:ااااه نتمسخر انت ومعلباليش كفاه قربتلك اما شوف وجهك كفاه ولا علاه حتى ههههه
ريفان:متكونيش صامطة اصلا نشوفك ضحكتي مع واحد ولا رح يكون كاين حساب اوخر ..دخلتي للجحيم تحملي
ايرين:خوفتني وشمن جحيم
ريفان:ولا شي جبتيني نرقصو نو؟؟
ايرين:اوك هيا
ركبو فوقها فقدو توازنهم شدها من خصرها وجبدها ليه
ايرين:ههه حنا صح مهابل
ريفان:ههههه خلينا نرقصو ونكملو نهار الهبال هدا كون يشوفوني دارنا ميامنوش
ايرين:نسحقك قبل ماتبدا الرقصة تنحي الطاقة السلبية الكل وتخرج واش فقلبك تنسى الشي لي يحطمك وكل اثر سيئ عيش لحظة برك
ريفان:من عرفت وانا ناسيهم هههه مي نحب نقلك مرسي صح على كلشي
ايرين:بلامرسي بلاوالو متخلينيش نطيح
ريفان:انا ناوي نخليك تطيح ونشوف المخبي هههه
ايرين:خامج صح انت
كانو يضحكو يضحك بطريقة جامي ضحك يحس روحو طاير سعادة كبيرة غمراتو ؛يشطحو ويضحكو يقفزو وهو شادها يحاولو يكونو رقصة وكان يدور فيها وتتخبط فصدرو صورتهم مع بعض نقية ودافية بزاااف  كانو يخممو فاللحظة لي مع بعض برك مش مخممين فحاجة اخرى
ريفان:اييييريييين
ايرين:شششش يسمعونا
ريفان:خلي يسمعو
ضحكت عليه وفرحت انو شافت هدا الجانب منو واختفاء الجانب المظلم كليا
ريفان:ياااا ايرييين
ايرين:وييي
ايرين:انتي اروع بنت قابلتها فحياتي
حشمت وغطست راسها فصدرو وهو يقفزو ؛حبسها وهبطو منها بقى يشوف فيها مهبطة راسها ؛طلعلها راسها يشوف فعينيها شفافها يرجفو ؛مشاعر كبيرة كانت بينهم ؛حط جبهتو على جبهتها نفسهم طالع حكى بصوت تاع واحد غايب عن الوعي
ريفان:منين جيتي انتي دخلتي حياتي وبدلتيها فوقت قصييير ؛
ايرين:ريفان انااا
ريفان:انتي واش قوليها ..
بلعت ريقها تشوف فعينيه شفافهم يرجفو مش قادرين يكنتروليو تصرفاتهم تحس فالادرينالين طلع وفرحتها متتوصفش قرب منها اكثر وهي غمضت عينيها تستنى فيه يبوسها؛كان رح يبوسها ويشفي غليلو منها اما حس بحركة مش طبيعية ؛شاف لجهة الخيم الضو ساطع فالرجال لي غير شافو تخبى عرفهم ؛غمض عينيه بقوة بعد عليها فتحت عينيها عضت لسانها على غبائها جات تحكي مقدرتش وهي تشوف فنظراتو تبدلو وولا شيطان فهيئة انسان معلبالهاش علاه ولا هك وش لي خلاه يتبدل بين لحظة واخرى كان لباس عليه وفلحظة تقلق وتبدلت حالتو..
ريفان وهو منارفي :يسما لحقتيني هاد لمرة تخلاا نوعدك يكفي مادمرتي كلش
ايرين:شكون لي لحقك وعلاه تقلبت هك
مسح على وجهو وحكى بصوت حاد:مكاين والو روحي ترقدي هبطي راسك وامشي
ايرين:ريف...
ريفان:قتللللك روحي متفهميش متخلينيش نغلط روحي منيش حابك تبقاي هنا امشي ايرين
بلعت ريقها وهي تشوف فحالتو غاضتها عمرها كي نبزها ويعيط عليها شافت فعينيه حبست دموعها اما  ولاو حمر شقاتو نظرتها اما همو دك يحميها وميخليهمش يعرفوها
ريفان:ايرين روحي متقلقينيش
مشات بلاماتزيد كلمة حطت يدها على فمها تكتم فشهقتها
ريفان:رح ندمكم حتى فاحلى لحظاتي تخسري كلش نكرهك ؛دار وبدا يخبط فاي حاجة تجي قدامو ؛مشى جهة رجال وهوما بسرعة تخباو ؛راح جهة مؤطري الرحلة هد عليهم حتى تفجعو
-مسيو ريفان وش كاين
ريفان:كاين واحد عيط لدارنا من هنا؟
-اااا نننن مسيو ريفان مكان حتى حد اتصل
ريفان ضيق عينيه ويشوف فتوترهم:شكوووون خبرهاااا انطقو نحرقكم وواحد مايسمي عليكم هاااه ..تعرفوني وش نقدر ندير ودك اهدرو قبل مانفقد اعصابي
المؤطرين شافو في بعض ونطق واحد منهم خايف:الانسة سوزي طلبت تتصل بيهم
لز على قبضتو عينيه حمرين ولا يخلع :سوزي مالا وجيتي فيدي يا###
خرج من الخيمة كي الثور الهايج ؛ناوي يحرقها وتكون عبرة انو تحداتو
ايرين مشات ديراكت لخيمتها لقات وفاء راقدة غطات روحها وغمت راسها
ايرين:انا غبية وش كنت نتوقع بصح علاه صرالو هكاك بففف غبية
غمت على روحها وبدات تتحسس فالسنسال وتتذكر فالوقت لي قضاتو معاه الليلة رغم انو كمل بعياط اما كان حلو وبدات تخمم على شكون حكى مخها تحرق من تخمام
دخل لخيمة سوزي ملقاهاش نوض صحبتها
ريفان:هاااي نوضي وينها ل### لي معاك
-جاو رجال داوها معاهم
ريفان:مليييح وحاسبتها مليح مي وين هاربة ياا###
خرج يتنفس بالقاوي فسدولو ليلتو ورجعلو الحقد والكره من اول وجديد
ريفان:الا ماندمك ولوكان تتمس شعرة من ايرين نحرقك
جاه سامي يشوف فصاحبو فهيئة شيطانية باين مقلق
سامي:ريفان وش كاين؟
ريفان:مش ناقصك سامي حاب نبقى وحدي
مشى جهة الغابة بعد على المخيم وسامي وراه
ريفان:سامي خلي### دك
سامي:مش حتى نفهم وشبيك
ريفان:حاب تفهم؟؟ياسيدي لي يسموها امي بعثت رجال يتجسسو معمن راني بسبة ل### تاع سوزي ؛وشافوني مع ايرين اكيد رح تأذيها لانو متخدمش مصالحها
سامي:وانت وش راحلك في ايرين مفهمتش
دار ليه وهو ينفض فروحو سامي غير شافو هكاك مامنش انو ريفان قدامو
ريفان:وش راحلي فيها ؟؟ هي تسوى عندي واكثر ماتقدر تتصور
سامي:راك عارف  وش تحكي ؟؟لاتكون حاببها ؟؟
ريفان:معلباليش  لي نعرفو انو محال نسمح انو تتأذى بسبتي انا جحيم ومنخليهاش تتأذى بسبتي ورح نتحدى الكل باش تبقى لباس عليها حتى لو كانت امي
سامي:ياولدي راك غارق فيها اما حاب نعرف حاجة وش عجبك فيها
ريفان:هي مش مجرد جسم ياسامي الراجل لي يحس روحو ولد مع بنت هديك البنت لي تقدر تخليه فرحان ديما ..بالنسبة لايرين هي نقطة النور فحياتي فايام قليلة قدرت تخلي حياتي منورة معلباليش كفاه نشرحلك اما مستحيل نخليها تتأذى بسبتي؛وانت تعرف ماما اذا شافت حاجة ومعلباليش وش قالتلها سوزي اكيد رح تتخلص منها تخلصت من احلامي كلها ؛اما ايرين فمستحييل نخليها تقربها
سامي:هي صح شفت ريفان اوخر معاها مي تعرف عايلتك كنت لازم تخمم فيها
ريفان:وش يكونو باش يمنعوني ويديرو وش يحبو ويسيرو حياتي كيما حبو ،صدقني من ليوم كلشي يتبدل راح يوقفو كلهم ونعيش كيما حااب انا خلي نتطمن على ايرين انو مش رح تواجه اي مشكلة ونخلي الظلام لي فيا يتحرك ويصكر كل مداخلهم
سامي:هااا وشفت صاحبي عاااشق ويادلالي ستيتش خربتلك الميموار اصاحبي
ريفان:بلاهبالك سامي
سامي:اهربو
ريفان:انت هبلت؟؟ انا مقلتش نحبها انا برك ...
سامي:مش قادر تعترف حتى لنفسك
ريفان:معلباليش لي نعرفو انو لازم نحميها  ؛محال نسمح انو تتأذى بسبتي و لي يقرب ليها نخليه يذوق نار جحيمي و ندفنو في ظلامي و نتا عارف وش نقصد
سامي:مدام لحقت لهاد الجملة عارف بلي لي جاي رح يكون جو تاع الحرب الباردة
ريفان:صدقني كلمة باردة متليقش ...خلي نرجعو لكلاب هربو بعد ماخسرو الليلة
سامي:اممم وشمن ليلة ياخبييث متقليش رحلة اكتشاف المعادن والثروات ؛ ايي وانا نقول , مالا نوصلو لاستنتاج انو تستاهل الحرب
ريفان:امشي امشي بركا بلاتخلااط منسمحش تحكي عليها هك
سامي:هدي الهدرة تستاهل ندير فيها زموري ونشطح لصباح اوووه انا صباح نروح نسقسي على البخوخو لي دارتولك يلزمني فحل مشاكلي العاطفية
مسمعلوش وبقى يمشي ومينداك يتبسم كي يسمع هدرة سامي ؛جا فبلاصتو جبد تريكو من من صاكودو شمو وهو مغمض عينيه ويتخيل فيها قدامو وضحكتها مالية البلاصة همس : مش رح تفقدي برائتك بسبتي يا ايرين مكانش لازم ندخلك جحيمي ؛هز سلسال يتلمس فيه ويتذكر فكلامها لي قالتهولو تبسم ؛غير تفكر الرجال لز على قبضتو حط تريكوها فوق راسو ورقد
ناضو صباح باش يتقهواو تشوف فيه شاد بلاصة جات تمشي جيهتو مقدرتش حست انو يتجاهل فيها حتى كي قربت منو بعد معلبالهاش علاش هدا التجاهل ؛بقات مبعدة عليه ووفاء نفس الشي مقدرتش تشوف فسامي ولا تحكي معاه ؛وهدا الي صار طول اليوم كمل بلامايحكو وكي تقرب منو يبعد ويتجاهلها بدا يدخل الف سؤاال لراسها علاه وش دارتلو ؛حتى فليل راحت للبحيرة ملقاتوش رجعت لقاتو واقف يتكيف ؛ غير شافها بعد وجهو لزت على قبضتها ومشات ليه
اايرين:ريفان معليش نعرف وشبيك وش درتلك باش تتجاهلني هك
ريفان:روحي ترقدي معينيش نحكي
ايرين:لالا تحكي مش بكيفك
ريفان:قتلك روووحي متخلطيش فيا ايرين انتي متعرفينيش
شافت فيه غير طلع عينيه شاف نظراتها حس قلبو يتقسم حكى فنفسو :بعديني مش حاب نحرقك بعديي ومتشوفيش فيا هك ..متعذبينيش اصلا كل مانبعد نتحرق
شافت فيه مرة اخيرة ومشات لخيمتها لاول مرة تبكي عليه ايه بكات لانو تحس فروحها ضعيفة قدامو وبعدو عليها مقدرتلوش
ايرين:لالا لازم نوالف اصلا وش راني ندير انا امسحي دموعك مش انتي لي تضعفي ونتي علبالك من لول انو هدا ممنوع
تململت وفاء وهي فيسع مسحت دموعها ودارت للجهة لاخرى حضنت تريكوه ورقدت
غير راحت ضغط على القارو فيدو حتى الحرق تاعو محسلوش
ريفان:ديزولي
تنهد ومشى لخيمتو  وليل كامل وهي عينيها بين عينيه ونظرتها لي قتلاتو من داخل
كان وقت الفجر مزال مايطلع النهار ومزال الحال باش ينوضو ؛كان فبلاصتو النوم مجافاهش يسمع فصوت حتى يشوف فظل عبد يمشي من قدام خيمتو فتحها شوي يشوف فايرين ماشية جهة الغابة ؛عقد حواجبو :وين رايحة فهاد الوقت ؛لبس وتبعها بقى بعيد باش متحسش بيه ؛حتى يشوف فيها دخلت للبحيرة المجمدة وبدات تتزلج ؛لابسة فيزو مبين طايها ؛عقب عينيه مالقى والو تبسم انو مكان حتى واحد يشوفها عض شفتو وهو يتفحص فيها وطريقتها البارعة فالتزلج ؛رجع هز مزلاجتين ورجع ليها ؛غير شافتو تصدمت انو راه هنا ويشوف فيه ؛غير قرب منها بدلت وجهها وجات ماشية شدها
ريفان:مكانش بونجوغ تقابليني بتشنيفة
ايرين:انت حبيت هك نظن انا دخيلة خلي نروح
ريفان:خليك ايرين
ايرين:انت صح عندك انفصام شخصية
ريفان تبسم:ههه تقدري تتحمليني ، ودك تسمحيلي برقصة جليدية؟
ايرين:منيش تحت امرك دك
ريفان:لالا طلب
مدت يدها ليه ؛شدها وجبدها ليه حتى تخبطت فصدرو شاف فعينيها ؛بداو يرقصو على الجليد مرة يدورها مرة يحضنها من لور حتى دوخها
ريفان:ايرين
ايرين:امممم
ريفان:كي نرجعو للمدينة ملازمش تبقي قريبة مني ونتمنى متفهميش غالط
ايرين:ههه نعرف
ريفان:قتلك متفهميش بالغالط؛على مصلحتك
ايرين:اوك
ريفان:ممم نفهم بلي مش حابة قربي
ايرين:لا اما افضل حتى انا منقدرش نقربلك اكثر خصوصي كي نرجعو
ريفان:محكيتليش على عايلتك
ضيق عينيه ويستنى فجوابها تبسم كي شافها ضغطت على يدها بلاماتحس
ريفان:براحتك منعرفش يجي نهار وتقوليلي
طلعت راسها تبسمت وتاهت فعيونو السود شاف فيها نيفها وخدودها حمر ؛ قرب منها اكثر وبلا مايستنى غطس في شفافها ؛هي مافاقت بروحها الا وهي غاطسة فبوسة طويلة معاه ؛كان يستنى فيها تتفاعل اما شي بقات جامدة جا يبعد عليها دارت يديها ورا رقبتو وقربت ليه اكثر؛فرح من قلبو على خطوتها وجبدها ليه اكثر وتفنن فبوستو معاها ؛بوسة كان حاب يوصل بيها بزززااف مشاعر ؛باسها بطريقة كانت حنينة وتبين انو ضعيف قدامها عكس البنات لخرين لي عرفهم فحياتو ؛بوسة طيرتهم وخلات قلوبهم تدق بقوة وجسدهم يخونهم ؛بعد عليها وحط جبهتو على جبهتها يردو فالنفس
ريفان:متعرفيش تبوسي
ايرين بحشمة:بوستي الاولى راهي
غير قالتها قلبو دق بقوة حس روحو ملك الدنيا وبلاما يخمم  طلع راسها حتى قابلاتو وعاود باسها بشغف كبييير؛حتى ترخفت بين يديه تحس فرجليها خانوها من قوة لي تشعر بيه
يحس فروحو اول مرة يعيش هاد لحظة ولا يبوس بنت ؛قدرت تخلي كل شبر منو يتفاعل منو ؛جبدها عليه يشوف فيها مغمضة عينيها شفافها يرجفو '؛
حط جبهتو على جبهتها ووجهها بين يديه ؛كبشت فيه مش قادرة توقف مليح وحاشمة منو
ريفان:ايرين متزعفيش مني مينداك تحسيني اقرب ليك من روحك وفي اللحظة لي بعدها نكون قاسي وبارد وبعيد بعد النجمة ونعرف انو هدا التناقض رح يسبب بزااف اذى لينا وليك خاصة
ايرين:ريفان علاه....
ريفان:اشششش خليني نكمل لازم تعرفي حاجة انو انتي اروع انسان دخل حياتي وقدر يبدلها حتى لو لايام قليلة ؛اما التناقض لي فيا صدقيني مش متعمدو ؛اعرفي بلي روحي في مد وجزر و انتي الشاطئ الوحيد لي تحملني واحتواني ؛انا منيش اناني وعلى هدا الشي نتمنى تسامحيني وتبعديني بعدي على الجحيم لي راني فيه رح تتأذااي حتى وتتأقلمي فيه ؛شضاياه رح تأذيك وانا منحملش نشوف الوردة لي عرفتها تذبل لانو انا دخلت حياتها وعكرت مسارها ؛حاس بأحساسيس مخلطة ولأول مرة نحس روحي ضعيف متكونيش نقطة ضعفي ويستخدموك ضدي ايرين نوعدك  نهار نقدر نكوٌن روحي ونكون بالقوة المطلوبة رح نرجع لحياتك ونعطيك تأشيرة دخول الجحيم ورح نبدلو عنوان القصة ؛رح يكون عنوانها يخدمنا ومكانش لي يدخل
طاحت دمعتها تحس فقلبها يرجف كل كلمة تدخل لقلبها كيف السهم ؛ماعرفت تحسبو اعتراف بمشاعر او لا المهم شعووور مخلط فرحة خوف فرحة انو عاشت معاه هدو اللحظات وخوف من لي جااي ماقدرت تحكي حتى كلمة ؛حس بدمعتها نزلت لصبعوو غمض عينيه يتمالك فنفسو  تنهد وجبدها لحضنو حاس باحساس مش مليح ؛خايف ايه خاايف انو يخسرها بعد مالقى اليد لي تشدو بلا أي مصالح بلا أي شروط بعدما لقى نور دخل يضوي ظلامو
ايرين:مرسي بزااف  ولا واحد قدر يحسسني اني انثى اما بصحبتك قدرت نكون بلا تحفظ ؛الكل شاف بشاعتي اما انت خليت ايرين كانت مدفونة تحييا ؛رغم انهم لحظات وايام الا انو قدرت تخلي حياتي تتبدل فوقت كانت امي الوحيدة لي تقدر تخليني نضحك ونكون بنت صغيرة دخلت انت وديت حق امي ورجعتني لطفلة عمرها 10 سنين
ريفان:هههه غبية ؛مش انا لي خليتك هك انتي لي شديتي يدي فوقت الكل يخافوني ونحيتي قيود الظلام ودخلتي وعشتي وعيشتيني الطفولة لي نقدر نقول انو تسلبت مني فالصغر
ايرين:متخلينيش نبكي دك اافففف
ريفان:غير يطلع النهار ومع اول خيوط بزوغ الشمس خلي هاد العلاقة تكمل ومتقربينيش رح ناذيك
ايرين:خليني نودعك مالا
ريفان:متسميهش وداع رح نرجع والمرة الجاية انا نشدلك يدك
ايرين وهي شادة روحها بالسيف حابة تقلو انو علاقتهم ممنوعة وحتى ورجع شي نهار محال يقدرو يكونو مع بعض كبست روحها ونطقت:ههه رح نشوفو
حضناتو ودخلت راسها فرقبتو تشم فريحتو عندها احساس انو اخر مرة تشوفو او هدا الشي بسبة انو لازم تتعود انو ميكونش معاها فالايام الباقية من الرحلة ؛غطس خشمو فراسها يشم فريحتها النقية يحس فقلبو يوجع فيه كبس عليها  اكثر حاب يشبع منها ؛بعدها عليه ومشى بلا مايشوف فيها وبلامايدور وراه ؛هبطت وقعدت فالجليد حتى برودتو
ايرين:مكانش لازم تغلطي يا ايرين ماشي بلاصتك مي ..مي ...نحبك ياريفان ايييه نحبك يااريت نقدر نقولهالك ياااريت