كرونيك: ❤صدفه _التقينا ❤

40

الحلقة 40
جات تجبد مفاتح الطونوبيل حتا فاقت بيه جبدها من كرشها وحطها فوق كتافو بدات تعيط :
ااا اطلقنيييي يافرخ اطلقنيي
طلع بيها لغرفتو رماها علا البنك نخلعت وهو زاد غلق الباب بالمفتاح حطو في جيبو وراح قدم ليها هي وجها مشا ألواان بعدت شويا مالبنك ترعش وحدها ركبلها الرعب ..
إلين: ش.. ش.. شتعمل .. حل الباب ولا نعيط والله
أيمن: وش قتلك انا ؟
قلبها قريب يحبس يضرب مليار وجها حمار وقاتلو بصوت يرعش : و ..ش ق قتلي ؟ مق..تليش ..
أيمن: مالا تحبي نفكرك مريڨل ..
قرب ليها عيطت وحطت يديها علا وجها : لااا والله منزييد نعاود وهاذو الحوايج منزيدش نلبسهم
تبسم وقالها : صحا وطول لسانك ؟
إلين:مشي قتلك كي جيب مرة ولا فرخة احكم فيها !
أيمن: صحا مالا متفهميش بالسياسة .. جا يقدم رجعت صاحت عليه : لااا نفهم والله نفهم ..
جات خارجة تمتمت : هذاك مكان ناقصني غير فرخ يحكم فيا ..
سمعها مشكلتو الفرخة هاذي ميقدرش يتغشش منها وكي يعيط عليها ولا يبخصها تغيضو ..
أيمن: وش قلتي ؟
إلين: لا لا والو قتلك افتح الباب برك
فتحلها الباب وقالها: بدلي واهبطي ضك نهبط ..
خرجت تجري راحت تشوف فالحوايج وتتبسم وحدها طايرة مالفرحة ..لبست صالوبات وفيستا خفيفة تع صيف لبست باسكات وصاك كرامال خلات شعرها مطلوق
هبطت لقاها بدا يتبسم .. وهي شافاتو حاط الحطة عجبها .. وهو يشوف فيها تهبل الشعر الحطة الزين . . لحقت ليه قاتلو : هايا نمشيو
فاق علا وضعو وراحو ..
____