كرونيك: ❤صدفه _التقينا ❤

53

الحلقة 53
تبسم عليها هو بحد ذاتو معلابالوش وش يحس من جيهتها بالضبط..
_______________
قعدت تتقلب يمين يسار مقدرتش ترقد .. كان أيمن في مخها قامت ضربت وجها : اففف إلين بهلولة ؟ علاش نخمم فيه هذا ؟ طردت افكار انو هي تحبو وعارفة روحها جيب غير الكوارث نفخت وراحت هبطت تقعد فالجنينة حتا شافت ضو الكوزينة شاعل شافاتو خارج وفي يدو كاس حليب .. شافو في بعضاهم خدودها حمارو وقلبها ولا يدق بالزربة تلبكت وهدرت بصوت ضعيف: ج..انيش الن..وم
تبسم .. أيمن: حتا أنا جانيش النوم ..
شافت الساعة فالحيط حكت شعرها ..
إلين: الوحدة ونص تع الليل .. رفدت كتافها وقاتلو : الله غالب ..
أيمن: ارواحي نديرو حاجة ..
قلبها ولا يدق مليار : ااه ؟؟
أيمن: انتي قاعدة وانا قاعد خلينا نعملو حاجة ..
رفدت راصها بإيه بالزربة ..: ايه عندي شطرنج ..
أيمن: ههه جيبيه واطلعي لبيتي ..
غزرتلو مصدومة: بيتك ؟
أيمن: ايه هاني نستنا فيك ..
طلع وخلاها مصدومة ضربت خدها : افف شبيني حسن نيتي خير رح نلعبو شطرنج برك نحبس التخمام الناقص خيرمن يرقد الراجل ونبقا نبوم وحدي كي المهبولة ..
طلعت جبدت الشيطرنح وراحت للكوزينة جابت الشيبس والسقايط وراحت ليه جبدت نفس وطبطبت فالباب ..
أيمن: ادخل ..
قلبها دق بالقاوي حلت الباب ترعش .. افف الين ربي يهديني كلما ندخل لبيتو نعمل هك ولا كيفاه ..
يسمع فيها تمتم عند الباب : من وقتاش تطبطبي علا البيبان ؟
دخلت وقالتو: اسكت اسكت ..
تربعت فوق البنك وهو مقابها ..
إلين: كان ربحتني ؟
أيمن: هههه اوكي نتراهنو ..
إلين: امم عليمن ؟
أيمن: شوفي نتي ..
إلين: ههه لي يخسر يعمل لاخر لي يحبو 3 ايام
أيمن: ههه ثقة بالنفس
إلين: تعرفنيش
أيمن: مريقل ..
بداو يلعبو مركزين مع اللعبة ويهدرو مع بعضهم في نفس الوقت ..
إلين: علاش تمسمس انتا ..
أيمن: العبي وبلعي فمك ..
إلين: متزيييدش تقلي هكا نضن العبد يتبدل غير يلا صارتلو حاجة ..
أيمن: هههه كيفك
إلين: وش تقصد ؟
أيمن تمتم: هههه يكشغل نتي كنتي عاقلة من قبل
ضحكت عليه إلين : العب العب ..
إلين: حقا قلي وش كنت داير فالقراية ؟
أيمن: علاه تحوسي تعرفي ..
إلين: ههههه جاوب دين وجهك
شاف فيها بنص عين : تلميي خييرلك ..
خرجتلو لسانها وشافت فاللعبة بعدها صاحت : يااااا ربحتك طلعت فوق البنك تسوطي ..
شاف لقا روحو حرك القطعة بالغالط ..
أيمن: غير متفرحيش مزالو زوج براتا ..
قعدت .. : هههه معلييش