كرونيك: ❤صدفه _التقينا ❤

41

الحلقة 41
فاق علا وضعو تبسملها وقالها هايا نروحو ..
ركبو فالطونوبيل وهي طايرة مالفرحة اعطيها خرجة وخليها .. مدت يدها تبدل فالغنا دارت وحدا تع راي وبدات تغني وتشطح مالغنية وهو مينداك يتلفتلها يسرق نضرة يضحك عليها ..
إلين: بوراص وين رانا رايحين ؟
ضحك ضحكة من قلبو وهي تشوف فيه سرحت فيه يهبلل كي يضحك شحال بوڨوص وعندو غمازة ولحيتو وسموريتو زادو فيه النص وهذاك الشعر كي يجري فالطريق يديه الريح ومينذاك يجي علا عينيه .. فيقها من سرحتها كي قاللها ..
أيمن: متحشميش علا عرضك تقوليلي بوراص ؟
ضحكت لتحت لتحت ذبلت عينيها وقاتلو بصوت هادئ: شحال تعجبني ..
أيمن: اممم شكون بالضبط ؟
وجها حمار مكنتش تقصد مبعد قاتلو : ا.ه .. اكييد الكلمة ..
ضحك عليها وقالها : تعجبيني كي تسكلي كي الشعرة مالعجين ..
ضحكت عليه : ههههههه هايا قولي وين رايحين ؟
أيمن: ريسطورون هايل نعرفو ..
عيطت : لالا لالا لالا كرررهت مالريسطورونات حبيت حاجة جديدة سبيسيال ..
أيمن: كيما وشنو ؟
إلين: مثلا ناكلو فالشارع ..
أيمن: هههههه متشردة نتي ؟
إلين: لا قصدي ههههه نشرو سندويش وناكلو برا هاياا ايمن بورااص ..
ضحك عليها وعجبو اسمو من فمها حس روحو اول مرة يسمعو ..
أيمن: اوكي ..
كملو يضحكو حتا وصلو لبلاصة علا شط البحر .. ڨارا الطونوبيل فالباركينغ وهبطو هي غير لحقو للبحر بدات تصوطي وتغني وحدها ميتة بالفرحة مبعد راحت سبقاتو وهو ميت بالضحك عليها تبان كيما صغار .. بدات تبعد راح يزرب لحقها وشدها من يدها دارت ليها بدات دير كيما صغار :
إلين: هااياا انيي جيعاانة ..
أيمن: هايا نروحو نشرو .. راحو لقاو بائع متجول شراو عليه سندوش وقعدو علا شط البحر .. شوية حتا دار لقاها كملت سندويشها ..
إلين: مزلت جيييعاانة (دارت شفافها كي تع صغار)
أيمن: استناي نقطعلك رجلي كوليها ..
إلين: لااا سامحني نكلش رجلين تع الحمير ..
شاف فيها بنص عين ورجع ياكل ..
إلين: هاياا مييمو روح جيبلي واحد انا نحشم
ضحك عليها بالسيف وقالها : كي كنتي تاكلي كي المتوحشة مقلتيش نحشم ..
ضحكت عليه : ههههه زيد احسبلي اللقمات لي كليتهم ..
ضحك عليها مبعد ناض حطلها السندويش في يدها : هاكي شديه وردي بالك نلقاك كليتي منو ..
إلين: هههه تخاافش ناكلش ماكلة الوحوش ..
راح يضحك وهي قاعدة تتأمل في البحر ومواجو .. وتشوف في القمر ونجوم ..