اسكريبتات

فى حبك لا أعرف اليأس

- عملتى ايه انهارده ؟
- زى كل يوم ... انا لحد دلوقتي مش عارفه انت بتكلمنى ليه وعايز منى ايه .. انا معرفكش
- بس انا اعرفك .. لو الموضوع مضايقك خلاص .. مش هكلمك تانى
- بسرعه :- لا مش كده .. قصدى .. مش مضايقنى ولا حاجة .. انا كان قصدى انك مهتم بيا وبتسمع منى لما بحكى مشاكلى .. كل ده وانت متعرفنيش .. ممكن اعرف ايه السبب اللى يخليك تعمل كده معايا ؟!
- ما انا قولتلك انى اعرفك
- ........
- كنتى تقدرى تعمليلى بلوك .. ايه اللى منعك ؟؟
- يعنى .. شوفتك انسان محترم وكلامك معايا بحدود .. يعنى فى نظرى انت شخص كويس جداً
- وانا زيك .. شوفتك انسانه محترمه وكويسه وكيوت وملكيش فى الكلام الفاضى بتاع اليومين دول
- بردو عايزه اعرف .. ليه بتكلمنى وبتهتم بيا كده ؟!!
- ضحك وقالى :- تقدرى تقولى بدور على عروسه
- ابتسمت وقولتله :- بس للأسف مش هتلاقى اللى يناسبك هنا
- ليه ؟!! انتى مش شايفه نفسك مناسبه ليا !! ولا المشكله فيا انا ؟!
- لا مش كده .. بس قلبى مع واحد تانى
سكت شويه وسألنى :- بتحبيه ؟!!
- ضحكت :- بحبه !! انا مش بحبه .. انا بعشقه والعشق حاجة صغيره
- وهو ؟!
- ماله ؟!
- بيحبك ويستاهل حبك ده ولا لاء ؟؟
- من ناحية بيحبنى ... مش عارفة .. انا بحبه من بعيد .. عمرى ما اتكلمت معاه .. انا حتى مسمعتش صوته .. بروح الجامعة مخصوص علشان اشوفه
- ربنا يسعدكم
- هتقفل ؟؟!
- انا فاضى لو عايزه تتكلمى فى حاجة انا سامعك
- مش زعلان !!
- من ايه ؟!
- انى بحب واحد تانى ورفضتك
- ضحك وقالى :- ده ملهوش دعوه بده .. احنا ممكن نبقى اصحاب .. ممكن ولا لاء ؟؟
- ابتسمت :- اكيد
- اوك .. هتروحى الجامعه بكرا ؟
- اممم .. علشان اشوفه
- تمام .. قومى يلا نامى علشان تصبحى فايقه .. وحاولى تركزى فى محاضراتك ولو فى اى حاجة مش فاهماها او عاوزه شرح قوليلى
- اوك .. يلا تصبح على خير يا ..
- احمد
- تصبح على خير يا احمد
- وانتى من اهل الخير
انسان غريب بجد .. بس بجد محترم جداً .. انا اول مره فى حياتى اجازف واتكلم مع شاب .. بس كلامه بيريحنى اووى .. بحس انى مرتاحه لما بحكيله عن تفاصيل يومى .. ولما بشكيله .. دايما بلاقى عنده حلول لكل مشاكلى
- صباح الورد
- صباح النور يا احمد
- صحيتى ولا انا صحيتك ؟
- لا انا صاحيه من بدرى
ماما نادت عليا ... :- يا مي .. تعالى عايزاكى
- حاضر يا ماما
- اهاا .. طيب روحى شوفى والدتك وانا هكلمك تانى لما ترجعى من الكليه
- اوك
- خلى بالك من نفسك وبراحه وانتى بتسوقى
- حاضر .. يلا باااي
حقيقى ارتحتله جداااااا .. لا لا لحظه متفهمونيش غلط .. انا مش حبيته .. انا بس اعجبت بأخلاقه وطريقة كلامه معايا لطيفه ومحترمه .. يمكن علشان معنديش اصحاب .. ايوه يمكن علشان كده خدت عليه بسرعه
- عملتى ايه ؟
- كان يوم حلو
- شكلك مبسوطه
- جداااا
- احكى
- اول مره اشوفه من قريب كده
- اتكلمتى معاه ؟
- لا .. بس شوفته من قريب .. كان قاعد على تربيزه قصادى فى الكافتيريا بتاع الجامعه .. حبيته اكتر

**************

- ايه مشكلتك مع ال word ؟؟
- مش بعرف استعمله خالص
- طب اقفلى دلوقتي و هبقى اكلمك
- اوك
بعدها بدقايق لقيته بعت فيديو بيشرح فيه طريقه استعمال ال word
- شوفى الفيديو ده .. ولما تخلصى قوليلى
- ماشى .. ميرسى يا احمد