- يعنى ايه تخرجى من البيت بالليل ؟!
- فى ايه يا مازن ! هو انا خرجت لوحدى ! ما انا خدت معايا آلاء و ياسمين ، وبعدين احنا كنا رايحين نشوف الفستان و نجيب بقيت حاجتى اللى ناقصانى قبل الفرح
- وانا مالى بكل ده ، لما انتى عايزه تشوفى الفستان و تجيبى حاجاتك كنتى قوليلى ، مش تخرجى بالليل و كمان من غير ما تقوليلى !
- مازن انت مكبر الموضوع كده ليه ! مفيهاش حاجه يعنى خلاص مش هتتكرر تانى
- لا والنبى كرريها تانى ، ما ده اللى كان ناقص
قال الكلمتين دول و قفل السكه فى وشى .. انا فضلت باصه للتليفون و عنيا مدمعه ؛ مش مستوعبه هو ليه اتعصب كده ! ده كله علشان روحت اظبط فستان الفرح !!
- مالك يا اروى ! انتى اتخانقتى انتى ومازن ؟!
- ايوه يا ماما ، علشان خرجت بالليل و من غير ما اقوله
- ما انا قولتلك يا بنتى .. قولتلك اتصلى بيه وانتى اللى مسمعتيش كلامى
-ما انا اتصلت بيه و هو مردش .. و انتى عارفه ان الفرح بعد خمس ايام و لسه فى حاجات كتير مخلصتش
- معلش يا حبيبتي .. انتوا لسه فى بداية حياتكوا يا اروى .. مينفعش الخناق اللى كل يومين ده ! اسمعى كلامه يا بنتى ، هو جوزك و لازم تطيعيه
- حاضر يا ماما
عدى يومين و هو متصلش و لا حتى بعتلى رساله .. فى اليومين دول انا كنت محتاره .. اتصل بيه ولا لاء ؟! ..
- بتتكلمى جد !! قالك كده فعلاً ؟!
- ايوه
- ايه ده يا اروى ؟! هو هيتحكم فيكى من دلوقتي ؟!
- يا آلاء ما احنا كاتبين الكتاب .. يعنى جوزى و ده حقه
- بس بردو انتى لسه مروحتيش بيته علشان يعمل كده .. امال لما تتجوزوا هيعمل ايه ؟! يعنى كمان احنا كنا رايحين معاكى و كنا بنجيب بقية حاجتك مش رايحين نتفسح
- يلا اللى حصل بقا .. المهم انا محتاره .. اكلمه ولا لاء ؟ متصلش عليا من يومين و شكله زعل
- اوعى تتصلى بيه يا اروى .. متكلميهوش .. هياخد على كده و كل ما يزعل او يتخانق معاكى مش هيعبرك و هيستناكى انتى اللى تتصلى و تراضيه
- قلبى مش مطاوعنى اسيبه زعلان منى يا آلاء
- اهو قلبك الحنين ده هو اللى موديكى فى داهيه .. ما تسيبه يا اروى .. ما هو كمان مزعلك ، متصلش ليه امال ؟!
- بس انا اللى غلطت مش هو
- انتى مغلطتيش لما نزلتى تجيبى حاجتك .. بعدين انتى اتصلتى عليه و هو مردش يعنى انتى عملتى اللى عليكى
- يعنى انتى رايك كده !
- ايوه .. اجمدى شويه و سيبك من شغل الحنيه دى .. لو خد على كده مش هتعرفى تعدليه بعد كده
