- هتفضلى قاعده هنا كتير ؟
رديت عليها بتعب و حزن :- عايزه ايه يا احسان ؟
- عايزاكى تقومى تروحى وكفايه بقا .. حرام عليكى نفسك واللى بتعمليه ده
- سيبينى هنا شويه كمان .. واحشنى اووووى
- فوقى بقا يا سارة ، حسام خلاص مااات .. مش هيرجع تانى
غمضت عينى بألم وحزن على امل ان ده كابوس وهصحى منه .. فكرة انه مات وسابنى دى فى حد ذاتها عذاب ليا .. انا بتعذب اووووى من يوم ما مشى وسابنى لوحدى
- يلا يا ساره قومى
- لا .. سيبينى انا عايزه اقعد معاه شويه كمان
- يا بنتى افهمى بقا .. حسام خلاص يا ساره .. مش هيرجع تانى
- رديت عليها بانفعال :- لا ما ماتش .. حسام لسه عايش .. هو وعدنى انه مش هيسيبنى .. انا عارفاه مبيخلفش وعده ..سيبينى هو هيجى دلوقتي
- بصيتلى بحزن والم :- ساره .....
انا مقدرتش اشوف نظرات الشفقه اللى الكل بيبصهالى .. انا عارفه انه مات ومش هيرجع تانى .. ورغم انى عارفه الحقيقه الا انى رافضاها .. دايما بقنع نفسى انه لسه عايش .. هو فعلا ما ماتش ... حسام عايش جوايا ..
- بصراخ وانهيار :- آآآآآآآآه ...ليه كده يا حساااام ليييييييه ... ليه سيبتنى ومشيت وانت عارف انى مليش غيرك ... انا اتكسرت من بعدك يا حبيبي
- اهدى يا حبيبتي متعمليش فى نفسك كده
- آآآآآآآآه ... قلبى وجعنى اوووى ... طب ارجع قولى انساك ازاى طيب ... يعنى يرضيك وجع قلبى ده ! .. يرضيك العذاب اللى عايشه فيه فى بعدك ده !!
احسان اخدتنى فى حضنها و فضلت اعيط لحد ما لقيت الدنيا اسودت ومبقيتش حاسه بحاجة .. يعنى باختصار اغمى عليا
فتحت عينى ببطئ و انا حاسه بوجع فى قلبى ... قلبى اللى اتكسر بعد ما سابنى .. رغم ان فات على وفاته سنتين الا انى دايماً شايفاه حواليا ودايما حاسه بوجوده معايا .. من يسكن الروح كيف للقلب ان ينساه .. هو مش بس سكن روحى .. ده سكن قلبى وعقلى و حياتى و كل حاجة ..
عدت ايام وشهور بطلت احسبها من كتر وجع قلبى فقدت النطق فتره .. الدكتور عبد الرحمن اللى كان بيعالجنى زى ما تقولوا كده اعجب بيا وطلب ايدى من ادهم اخويا ...
طبعاً ادهم كان متردد يفاتحنى فى الموضوع لأنه عارف انى هرفض
- احم .. ساره عايز اتكلم معاكى فى موضوع مهم
- قول يا ادهم
- بصراحه عبد الرحمن طلب ايدك منى .. و انا شايف انه شاب كويس و هيحافظ عليكى .. ف .. كن...
- قاطعته بهدوء عكس النار اللى جوايا :- بس انا متجوزة يا ادهم
- بصلى بدهشه وصدمه ..
- رفعت ايدى وشاورت على الدبله :- متجوزه .. و عمرى ما هقلع دبلته
- ساره .. حسام خلاص مات .. حبيبتي انتى لسه صغيرة والحياه لسه قدامك .. وبعدين انتى مخلفتيش منه ..
- اسمعنى يا ادهم و افهم كلامى كويس ... انا كلى لحسام وبس .. ملكه هو بس ... وعمرى ما هسمح لحد غيره انه يلمسنى او حتى يحط دبلته فى ايدى
- يعنى ايه ؟ .. هتفضلى كده ؟!! .. ساره انتى عندك 25 سنه...يعنى لسه شابه والحياه قدامك .. لازم يكون ليكى راجل يحميكى ويحافظ عليكى
- انت عندى بالدنيا يا ادهم .. ربنا يخليك ليا
- اتنهد بيأس :- يعنى ده آخر قرار ؟
- ايوه .. ده قرارى النهائى .. لا عبد الرحمن ولا غيره
************
- طب ليه موافقتيش ؟
- علشان انا متجوزة
- لا يا ساره انتى مش متجوزه .. انتى ارمله ... ساره انتى لسه صغيره .. يعنى عاجبك نظرة الناس ليكى على انك ارمله ! و يا عالم بيقولوا ايه من وراكى ... ما انتى عارفه يا ساره .. مجتمعنا هنا بيبص للأرمله ازاى .. لازم يكون ليكى راجل علشان تكونى فى حمايته
- انا عندى ادهم يا احسان
- ادهم متجوز وعنده عياله وبيته يا ساره وانتى كمان لازم تتجوزى ويبقا ليك بيت واسره .. انتى من امتى وانتى كئيبه كده يا ساره .. من 3 سينين وانتى لسه .....
- مش قادره انساه يا احسان .. مش قادره .. كل ما اغمض عينى افتكر كل موقف كان بينا .. انا عمرى ما هكون غير ليه .. هو ده اللى ملكنى وملك قلبى ... مفيش حد يقدر يعوضنى عن حبه .. انا ساعات كنت ابص فى عينه اشوف صورتى .. ده كان بيعشقنى عشق .. عايزنى بعد كل اللى عمله ليا ده اخونه و اروح اتجوز غيره ؟ .. لا .. لا انا عمرى ما هسمح لحد يمتلكنى غيره
- ساره اللى بتعمليه ده غلط
- وانا حابه الغلط ده
- انتى بتعاندى فى مصلحتك
- انا لو سمعت كلامكوا يبقى بدمر نفسى وحياتى
- طب ادى نفسك فرصه معاه .. يمكن تحبيه وتنسى الماضى بأوجاعه
- هخونه .. لو اتجوزته هخونه يا احسان
- بصيتلى بذهول و صدمه ...
- انا عمرى ما هنسى حسام ابدا وعمرى ما همنع نفسى اشوف صوره كل يوم و ازور قبره ، و لو وافقت اتجوز عبد الرحمن يبقى كده بخونهم هما الاتنين .. هبقى جسديا مع واحد وروحى وقلبى مع واحد تانى
*********
- كده يا حسام ! .. ليه سيبتنى لوحدى .. طب قولى انساك ازاااى بس .. آآآآآآآآه .. انا عارفه ان حبك مش هيطلع من جوايا غير بطلوع روحى .. ليه .. ليه علقتنى بيك و فى الآخر سيبتنى ومشيت .. بقالى 3 سنين بتعذب فى بعدك عنى .. انا عشقتك من اول مره شوفتك فيها ، وقفت حياتى كلها علشانك .. انت خلاص سكنت روحى وقلبى يا حسام .. رغم المده اللى عدت دى كلها الا انى مش قادره انساك ، وعمرى ما هنساك .. بيقولوا المرأه فى الجنه بتبقى لآخر ازواجها ، اوعدك انى عمرى ما هخلى حد يلمسنى او يقربلى بعدك .. اوعدك انى هفضل ليك انت ، ملكك انت ، ملك حسام عزام
قمت مسحت دموعى و حطيت باقة ورد قدام القبر وروحت وانا بحلف جوايا انى عمرى ما هنساه او اخلى حد يمتلكنى بعده .. حتى لو كان ده على حساب حياتى .. الزمن بيعيد نفسه تانى .. نفس القصه حصلت مع امى .. بس الفرق ان انا وادهم كنا بنصبرها .. كنا لسه اطفال منعرفش حاجة .. بس كانت دايماً لما تبصلنا تشوف صورة بابا فى عينينا
ربنا يرحمك يا حبيبي .. هتفضا دايماً حبيبي و زوجى الوحيد .. بدعى ربى انه يجمعنى بيك فى الجنه
# وما كان حبك الا بأمر ربى
وما كان قلبى الا عبد مطيع ♥
# Rahma Reda
