*الحب الأسير*
Doaa
(2)
الساعه 5 صباحاً فاتحه النور وشايله الشبشب(السفنجه🌚) وبتغني : كان في الشجره تلاته عصافير.. جات الكديسه وشالت نصهم.. وجاء الحرامي وشالهم كلهم .. مشيت لي ماما قالت مهملى.. مشيت ل بابا قالي مهملى.. الضربه الاولى جات ف جنبتي... وطااااخ ب الشبشب ف كِليه عزوز😂..والضربه التانيه جات ف ركبتي ..وطااخ ب الشبشب ف ركبت عزوز .. والضربه التالته جات في... عزوز رفع راسو من المخده : خلاص قمته والله قمته😩.
بيان : د مشوارك المهم صح?!
عزوز قعد ف السرير : م هسي الساعه 6 ي بيان باقي ساعه كامله.
_والله د مشكلتك انت م حددته لي زمن.. م مشكله ارح نشرب الشاي.
عزوز ب تعب قام اتسوك ودخل المطبخ لقاها عامله الشاي ب البسكويت ومنتظراهو.. كانت لابسه تيشيرت ابيض.. وعامله شعرها ضغيره وحده.. وبنطلون بيجي.
قعد وعاين ليها : م بحب البسكويت عايز كيك.
بيان وهي بتكب ليو الشاي : ماف كاكاو وانت م بتاكل كيك الا ب الشكلاته.
_انا وجاي بجيب معاي بعدين.
_حتتأخر؟!
_بجي بعد العصر كد.
_ظابط.
بيان بتشرب ف الشاب وعزوز بعاين ليها بأبتسامه .. لمن انتبهت ليهو هزت كتفها ب معنى ف شنو؟
عزوز : بقيتي سمحه كد مالك؟!
_من يومي مكلمه السماحه😌.
_شوف البت.. الراس م يكبر.
بيان ضحكت وسكتت مسافه وقالت : تتذكر.. ايام الجامعه لمن كان في وحده قالت معجبه بيك وبتاع.. وانت اصلا م حاولته تعاين ليها.. لحدي الان مستغربه من الحاجه د والله.. مع انها سمحه وعندها قروش واي شي.. لكن انت كنت وفي شديد لي❤.
عزوز ابتسم وهو بعاين للكبايه قال : لاني م بحب المظاهر ي بيان.. اتربيت كد.. على انو الجوهر اهم من المظهر.. انتي اكتر وحده وقفتي معاي وحتى انك محترمه ومأدبه وم فيك عيب.. د اكتر حاجات حبيتها فيك .. انتي م بهمك د عندو ولا د م عندو م بهمك قروش م بتهمك اشكال زوله فاهمه وواعيه حتى لمن تمشي عيونك بتكون ف الارض .. عارفه اي ولد بحب بت عشان شكلها او جسمها او قروشها د لمن يجي يعرس حيختار البتصون نفسها وبيتها وبضمن لي اولادو وبناتو تربيه كويسه.. حتى اسلوبك ف الكلام لمن اجي للنقاشات بلقاك اسلوبك حلو وبستفيد منو.. وغير د انتي م كنتي عايزاني اشوف شكلك كيف ولا حتى ملابسك كيف ولا حتى جسمك كيف ولا قروشك ولا اي شي.. كنتي بتظهري لي الجانب الانا عايزو جانب الام الحتكون ام مثاليه ل اولادي بعدين حقيقي ليك اطلالة و هيبة و هالة غريبة .. انتي بسيطه وشكلك بسيط لكن جواك مظهر حلو شديد... انا حقيقي بشكر ربنا عليك ي بياني❤.
عزوز قام وباس بيان في يدها وقال : اهم شي راسك م يكبر بس.
بيان ضحكت ونزلت راسها بخجل.
عزوز ضحك وطلع ..بيان غسلت العده وطلعت الصاله لمن سمعت الباب بخبط ..جاتها جارتهم حنان(مره مسكينه وراجلها طلقها ومشى م جايب ليها خبر وعندها بت صغيره عمرها سنتين .. حنان شغاله ف كوفير بتمشي وتخلي بنتها عند بيان.)
حنان : والله ي بيانن عارفه روحي تعبتك بس اسوي شنو.
بيان : حنان انا اقول ليك بتك د بحبها شديد وهي زاتها م بتبكي وهاديه.. كل مره تعتزري لي بطلي العواره.
_تسلمي يارب.. يلا في امان الله.
بيان قفلت الباب وشالت البت الصغيره(امنيه)قعدتها جنب التلفزيون وجات غنيه الحديقه السريه ف اسبيستون.
بيان وقفت قدام امنيه وقعدت تغني.
_في يومٍ همست ف اذني من يمسح عن قلبي حزني يرجعني خضراء اللون اعشاشاً للاطيار.....
امنيه تضحك وتصفق وبيان تتراقص قدامها وهي متخيله روحها ف المسرح والناس بعاينو ليها💃.
الوقت مرا ب سرعه وحنان جات ساقت امنيه وبيان اخدت دش وجهزت هدومها وهدوم عزوز.
أنت تقرأ
الحب الأسير
Romanceللحياة دمعتان..دمعة لقاء و دمعة فراق..فإن لم تجمعنا الايام...فسوف تجمعنا الاحلام...فإن لم تجمعنا الاحلام...فسوف تجمعنا الذكريات وروعتها باللقاء...فاذا رست سفينتكِ على شاطئ الذكريات..... فأجعليني احد ركابها. لا تحكم على الروايه من اول بارتات ;)
