الحب الأسير

(31)

*الحب الأسير*
Doaa
(31)

كانت رحلة طويلة استمتعو بيها جدا .. ركبو طيارة خاصه توصلهم السودان طوالي .. اول م نزلو المطار خلصتو اجراءات وعايزين يطلعو سمعو صوت تصفير من وراهم التفتو ولقو محمد ومزمل واصحاب شهاب (الهادي ومجتبى) .. جو عليهم بفرح وسلمو سلام حار ..
مزمل : بقيتو سمحين عديل وبيان زاتها ماشاء الله بقت سمينه.
شهاب ضربو ب قوة ف ظهرو وب نهره قال : مزززمل.
محمد ضحك وقال : خلونا نمشي وبنتكلم بعدين لانكم الظاهر تعبانين شديد.
بيان وهي بتمسح على راس البيبي : والله تعبانين ياخ والبيبي م نام .
مجتبى : ارح العربية برا .

طلعو واول م ركبو العربية بيان همست ل شهاب وهو بدورو غمز ليها وضحك .. واتحركو على البيت الكبير .. اصحاب شهاب وصلوهم ومشو .. كانت الفرحه الكبيرة ب شوفتهم .. ضيفوهم بعد م سلمو مريم استلمت البيبي بوس وحضن وهو اول م شافها قال : بوبه😍.
دلال ضحكت وهي بتقول : تبارك الرحمن .. وانا م بتقول اسمي ي عزوز؟؟ .. وقفت وشالت البيبي وهي بتلعبو .
رهف كانت قاعده جنب حبوبتها ونزلت وهي بتقول : خليهو يلعب معاي ي ماما.
دلال قعدتو جنبها وقالت : العبو براحه .
مريم قعدت جنب بيان وقالت : اها الحصل شنو شايفاك جاية مبسوطه😉.
بيان غيرت ملامح وشها ل عبوس وقالت : م اتفقنا ي امي مريم .. انا حاولت ب كل الطرق لكن زي م شايفه مافي اي اتفاق.
مريم ضربت صدرها ب يدها : سجمي د كلام شنو؟؟
التفتت على شهاب القاعد وماف تعابير ف وشو وقالت : ي ولد ف شنو الحاصل شنو؟؟
شهاب : انا مش قلته ليك نحنا ما لي بعض؟ .. انا غير بيسان م عايز وهي غير عزوز م بتقبل.
مريم ختت يدها ف راسها : لاحول ولاقوة الا بالله .. كان تجو وقت ماف اتفاق على الاقل كان اتصرفنا نحنا.
مزمل : ف شنو مالكم؟؟
شهاب : تتصرفي كيف؟؟
سلمى ودلال بأستغراب : شهاب انت بتقول ف شنو؟؟ .. بيان؟
فجأة حلت لحظه صمت ما بين حزن مريم وسلمى ودلال وما بين استغراب الباقين قطع شهاب الصمت ووقف واتجه ناحيه بيان وقعد جنب رجلينها ومسك يدها باسها وبنبرة مغازله قال : معقولة م اتفق مع الجميل د؟؟
بيان ضحكت بخجل ومريم وسلمى ودلال بعد ركزو ضحكو وشاكلوهم على المقلب البايخ د .
سلمى : والله خلعتونا .
مزمل : كنت عايز افتح خمشي لكن عرفتو مقلب .
محمد شبك يدينو وقال : شايفهم جايين مبسوطين شديد الحمد لله.
بيان بفرح : م شفتي ي امي مريم البيبي بقى بمشي.
مريم زغردت وقالت : حبيبي انا .. كدي ي سلمى وقفيهو.
سلمى وقفتو وهي وقفت بعيد وقالت : يلا ي حبيبي تعال.
البيبي عاين ليها بفرح وبقى بمشي براحه وهو مبسوط وكلهم بصفقو ليهو ب حماس لحدي م وصل واترمى ف حضن سلمى.
مريم بفرح : ماشاء الله تبارك الله .. بكرة تجري جري .
شهاب وقف وقال : الونسه معاكم حلوه معاكم لكن تعبانين شديد .. وطبعا على حسب طلب بيان جابت ليكم كلكم هدايا.
مزمل : انا برضو جبتي لي هدية؟؟
بيان بأبتسامه هزت راسها ..
_الزيك منو انتي ي ست الكل .
بيان وقفت وخلت البيبي بلعب مع رهف وستأذنت منهم وطلعت دخلت جناح شهاب وفتحت باب الجناح ودخلت .. كان كبير وفيهو اوضتين ومطبخ وهول كبيرر ومنظم ..
اخدت دش ولبست جلابية بيت ضيقه من الخصر بتوصل لحدي ركبتها لونها ازرق فاتح .. فكت شعرها وم عرفت تسرح شنو .. ف النهاية رفعت شعرها ب مشبك والخصل نزلت على وشها ادتها مظهر جميل جدا.
اتعطرت بالصندلية ورقدت ف السرير بأسرخاء واتذكرت ياسمين .. شالت التلفون لقت الساعه 11 مساء م قدرت تتصل ورسلت ليها رسالة ورقدت .. الباب فتح وجا شهاب داخل لابس فنيلة بيضاء مبينة عضلاتو وبنطلون قماشي ضيق بلون اسود .
قعد جنبها وقال : مالك م نمتي ؟
_كنت عايزه اتصل على ياسمين لقيت الوقت متأخر .
_هي عارفاك جاية الليله صح؟
_ايوا.
_احتمال تجيك بكرة.
_ان شاءالله .. البيبي وين؟؟
_مع امي مريم بتنومو .
_حيتعبها خليهو يجي ينوم هنا.
شهاب بأبتسامه : امي مشتاقه ليهو م حتديني ليهو .
بيان بأبتسامه : كلامك صح .
رقدت وشهاب رقد جنبها .. فجأة قعدت وقالت : اتذكرته حاجة مهمه شديد .
شهاب اتكأ على يدينو وقال : د شنو الحاجة الاهم مني د؟؟
م ردت وطوالي فتحت الشنطة الكبيرة شالت كيس صغير ونزلت تحت ... جات بعد ربع ساعه شايلة كباية.
شهاب عرف حتكون شايلة شنو وطوالي غطى وشو بالمخده : م حأشرب الحاجة د .
بيان ختت الكباية ف الكوميديا وقالت : حتشرب.
شهاب وهو دافن راسو ف الخده : م حشرب امشي دفقيها.
بيان رفعت ليهو راسو بالقوة : عشاني بس عشاني.
شهاب عاين ليها وقال : هسي احتمال د سم انا العرفني شنو؟؟
_م عندي مصلحة ف حاجه زي د .😂
شهاب شال الكباية وقال : لو م واثق ف م كان شربته.
بيان ابتسمت وقالت : اشرب يلا .
شربها مره وحده وقال : د اخر مره اشربو خلاص.
بيان بضحك : نششوف.
رقدت وهو رقد قصادها .. غمضت عيونها وفتحتها لمن حست ب يدو بتبعد خصلات شعرها عن وشها ..
شهاب بصوت نعسان : عارفه شكلك لمن تصحي من النوم بكون حلو شديد.
بيان بضحك : عزوز بقول لي بتشبهي افلام الرعب.
شهاب : .....
بيان بأستغراب : مالك؟
هز كتفو : مالي؟
_م رديت!
_اقول شنو؟
_انسى .
غمض عيونو وقال : طيب نومي خلاص .
غمضت عيونها وفتحتها تاني : شهاب.
_مممممم.
بيان بضحك : تتذكر يوم حضنتك بالغلط؟
شهاب عقد حواحبو بأستغراب وقال : شنو؟؟؟
_ياخ لمن كنت جنب الكولر وانا جيت ضربتك وحضنتك من ورا.
شهاب بأبتسامه : اي اي اتذكرته .
_عملته شنو ؟ .. يعني قصدي فهمتني غلط او كد؟
_لا ابدا والله .. بمجرد م انتي مشيتي انا نسيت الموضوع.
_طيب حسيت ب شنو؟؟
_من اي ناحية ؟؟
_يعني اول احساس حسيتو كان شنو ؟
شهاب بضحك : فاقد حنان .
سكت وواصل : قصدي يعني ... ممم .. م حتفهميني.
_حأفهمك انت قول .
_يعني رجعت ل ذكرى بيسان لانها اول واخر بت حضنتني .. بس عشان كد .. لكن من ناحيتك انتي الموضوع كان عادي ونسيتو وعرفتك حتكوني فاكراني عزوز .
سكتت مسافه وقالت : ايوا .. طيب عندي سؤال تاني .
_اتفضلي .
_بتحب بيسان ؟؟
_حأحول السؤال ليك .. بتحبي عزوز؟؟
_اكيد .
_وانا كمان بحب بيسان .
حست ب يد بارده اعتصرت قلبها .. العبرة خنقتها وقالت : طيب لي قلته لي بحبك؟
_الشعور الحسيتي بيهو انا حسيت بيهو اضعافو لمن قلتي بتحبي عزوز.
_ف فرق وبعدين هو اخوك .
_الغيرة م بتعرف اخوك ولا ابوك .
دموعها نزلت لاراديا : لا ف فرق .
شهاب استعدل ف قعدتو ومسك يدينها وقال : اسمعي .. انا م بحب غيرك واقسم ليك م بحب بت غيرك .. بس ف حاجات م بنقدر نتحكم فيها وانا مقدر الحاجه د .. انا عارف انك بتحبي عزوز وم حتخلي زول يصل ل مرحلة حبك ليهو .. بس انا زوجك والايام الجاية كلها حتكون معاي .. ب اختصار انا عايزك تحبيني انا وبس.
بيان مسحت دموعها وقالت : ف حب اسير جواي م بقدر اتحكم فيهو .. اي نعم انا بحبك وبغير وم عايزاك ل بت غيري .. انت بتقول ف حاجه انا م عندي يد فيها .. انا م بقدر اقتل الحب الأسير الجواي ل عزوز .. م بقدر .
شهاب مسح دموعها وقال : نفس الانتي حاسه بيه انا حاسي وم قادر اوصل ليك المعلومة .. انا اقوى منك وقدرته اتغلب على الحب الأسير عشانك وعشان احبك واديك كل الحب والاهتمام .. عايزك تعملي زي م انا بعمل.
همست ببكى : اعمل شنو؟
مده يدينو وحاوطها وجذبها ف عناق قوي .. سكتو دقايق بعدها شهاب نزل على رقبتها وقبلها قبل حانية وهي بدورها استسلمت برضى ..