*الحب الأسير*
Doaa
(15)
_كيف يعني م غلطان .. يعني انا هسي غلطانه ف شنو؟!
عبودي رقد ف السرير ومسك كتابو وقال : ف انك م مفهمتيهو الحصل وانا عايز اقرا .. نومي شويه عشان تريحي راسك د.
بيان قلعت الخاتم اللابساهو ودخلتو تحت المخده و رقدت قبلت على الجهة التانيه وهي بتمسح دموعها .. عبودي قرا مساافه بعدها نغمة تلفونو علت .. شالو وطلع بره رده.
_عبد الرحمن.
_ي هلا ي هلا.
_افتح لي الباب انا برا.
عبودي وهو بعاين ل أوضه بيان بأبتسامه : حاضر.
عبودي فتح الباب وعزوز سلم عليهو ودخل.
عزوز : بيان وين!؟
عبودي دخل القلم ف شعرو وقال : هسي نامت.
_ولي ساهرت؟
_عايزها تنوم مرتاحه وهي متشاكله معاك؟!
عزوز اخد نفس وقال : صحيها لي.
_خش ليها .. ابوي نايم ف الاوضه التانيه.
عزوز خته الشنطه الشايلها وقال : ممكن تفهمني الحصل قبيل مع سلمى.
عبودي حكى ليهو الحصل بالتفصيل.
عبودي : كلمة عدم الام د هي الزعلت بيان.
عزوز قام ودخل اوضه بيان لقاها نايمه .. قعد جنبها ورجع شعرها ل ورا وقال : بيان حببتي.
بيان فتحت عيونها ببطئ ومن غير م تحس قالت : عزوز!!
عزوز بأبتسامه : ايوا.
بيان قعدت ف السرير وهي بتتحاشى النظر ليهو قالت : جيت متين؟!
عزوز وهو بعاين ليها ب عيونها : هسي عبودي فتح لي الباب.
مسك يدها وانتبه ل الخاتم الم لابساهو وبـ حزن قال : بهون عليك للدرجه د؟!
بيان والدموع ف عيونها : انت قل.....
قاطعها : انا م كنت قاصد ازعلك .. انا لمن قلته ليك هي قالت شنو لي م وريتيني؟ .. خليتيني افهم غلط .. وانا اكيد كنت حأسمع منك.
بيان سكتت وم لقت تبرير مناسب.
عزوز : خليني من موضوع سلمى .. انا م عايزك تكوني كد ي بيان .. انتي كان تقولي لي ي عزوز هي قالت لي كد كد عشان كد انا قلته لينا كد .. فيها حاجه لو قلتي الكلام د؟
بيان هزت راسها بمعنى لا.
عزوز : اعتزري لي انا طيب.
بيان عاينت ليهو بأستغراب وم ردت.
عزوز : اعتزري لي عشان م بررتي موقفك وخليتيني افهمك غلط وعشان جبتي سيرة الطلاق وعشان قلعتي الخاتم وعشان كذبتي علي.
بيان عقدت حواجبها بأستغراب وقالت : كذبته عليك ف شنو؟!
عزوز قرب منها وقال : الصباح لمن قلتي م علي صلاة ... ف حامل م عليها صلاة؟؟
بيان ابتسمت بهباله وقالت : والله كنت نعسانه.
_اهاااااا .. جابت ليها كذب كمان؟!
_الصراحه انا م كنت عارفه روحي بقول ف شنو!
_انا م ركزته شديد لكن لمن اتذكرته اتخلعته والله .. وان شاء الله تكوني صليتي بعد د كلو!
_صليت بعد م انت طلعته الشغل.
_كويس تمام .. اها اعتزري لي يلا.
بيان : .......
عزوز : منتظرك.
بيان بعاين ل يدينها : اسفه ي عزوز على اي شي.
عزوز ابتسم وقال : سجل ي تاريخ بيان اعتزرت ل راجلها.
بيان : انت زاتك غلطان؟
_لو كنتي قلتي لي الحصل م كان سألتك.
_طيب اسفه.
عزوز حضنها شديد وقال : وانا مسامحك❤.
"وانا مسامحكم عشان م خليتوني اقرا"
الاتنين عاينو ل عبودي المقرب منهم وهو مبتسم.
بيان شالت الشبشب : ي قليل الادب انت.
عزوز بضحك : عبودي اجري الشبشب د حاار والله.
عبودي مسك منها الشبشب وقال : اي اي مجربو.
بيان : عشان تاني تعمل حركتك البايخه د.
عزوز : اتذكرته حاجه .. عبودي امشي جيب الشنطه الفي الصاله.
عبودي طلع جابها وجا .. عزوز فتح الشنطه وقال : كنت عايز اجيب ليك هديه لكن م لقيت حاجه تفرحك غير د.
عزوز طلع هدوم بيبي كتييره .. وفرشه ومشط صغار .. وجزمة بيبي صغيره معموله من القماش .. وشكلاتات كتيييره.
بيان نطت حضنتو شديد وقالت : عزوززززز😍 .. ياخ انا بحبك بحبك بحبك شدييييييييد😍.
وبقت تشوف ف الهدوم ومن الفرحه قربت تطير.
عبودي شال فرشه الشعر حقت البيبي .. وهو بسرح بيها قال : د م بتسرح حواجب زاتو.
عزوز طلع سندوتشين بيرقر وادا واحد ل بيان وقال : د اخر مره تاني ماف ليك اكل غير الفواكه والخضروات.
عبودي : وانا حقي وين؟😒
بيان وعزوز : ماف.
عبودي : م اتوقعتها منك ي عزوز لكن .. البينا اسكريم وساح.
عزوز غمز ليهو وهو بطلع سندوتش تالت : معقوووله انسى عبدو ياخ😉.
عبودي شالو وقال : الاسكريم بنختو ف التلاته بجمد تاني م تشيل هم.
بيان وعزوز : 😂😂😂😂.
عبودي وهو بقعد ف نصهم : د شكل زول بعد ساعات عندو امتحان عربي وهو م قاري حاجه!
عزوز طلع سندوتش رابع وقال : ي عبودي امشي دخل السندوتش د ف التلاجه ل عمي محمد.
عبودي : ابوي م بياكل.
بيان وهي بتشيل السندوتش : د كلو عشان م يقوم .. جيب بوديهو انا.
عزوز اداهو ليها وقال : امشي ي عبودي اقرا خليني اتونس مع مرتي شويه.
عبودي دخل اخر لقمه ف خشمو وقال : قايم قايم.
بيان جات داخله وعبودي قال : قبل م اقوم .. اسمعو النكته د حكاها لي علي ولازم احكيها ل زول.
بيان وعزوز : اها!
عبودي : كان ف مره راجلها ضاع ف السوق .. مشت ل الشرطي كلمتو .. قال ليها وصفي لينا راجلك .. قالت ليهو لونو ابيض واشقر وعيونو خضراء .. ولدها قال ليها ي امي ابوي م عامل كد قالت ليهو اسكت دايرين نبدلو.
عزوز وبيان : 😂😂😂😂.
عبودي وهو بقوم : يلا تصبحو على خير.
بيان وعزوز : وانت من اهلو.
عبودي طلع وعزوز قال : خاتمك وين؟
بيان : تحت المخده.
عزوز شالو من تحت المخده ولبسو ليها وقال : مش كان زعلتي ..كان انفجرتي يكون ف يدك سامعه؟؟؟!
بيان بأبتسامه : حاضر.
____________________
بعد تلاته يوم ..
بيان وهي بتقطع البطاطس : ي عزوز جيب لي تلفوني عايزه اتصل على عبودي اسألو شغال كيف لانو الليله اخر امتحان.
عزوز وهو راقد ف الكنبه : كويس.
شال التلفون وقام دخل المطبخ مداهو ليها : اتفضلي.
بيان غسلت يدها وقالت : شوف البطاطس الفي النار د مسافه اتكلم.
عزوز شال الملعقه وقال : طيييب.
اتصلت عليهو ومن اول جرسيت رده ..
_عبودي .. اها اشتغلته كيف!!
_جانا حلو زيك كد.
_الحمدلله يارب.
_يلا ل بعدين لاني طالع مع علي.
_م تتأخرو طيب؟!
_كويس كويس يلا.
_______________________
قبل سنه ..
كانت قاعده ف الكنبه بت جميله جداً .. شعرها بُني كثيف واصل لحدي اكتافها .. عيونها رماديه واسعه .. انف حاااد وفم مكتنز .. بشرتها بيضاء ولابسه فستان ابيض بوصل احدي نص ساقينها .. رجعت شعرها ل ورا ومسحت دموعها النزلت.
جات مره ف بدايه الاربعينات .. ملامحها جزابه وشعرها طويل وظاهر عليها التكبر .. عاينت ليها وبحده قالت : انا لبسته امشي البسي عشان م استعمل معاك اسلوب تاني.
البت ببكى : ي ماما انا قلته ليك انا م عايزه اطلق .. مااااااااعاااااايزه.
قاطعتها بصوت عالي : شنو؟؟ م عايزه تطلقي؟ .. على كيفك هو؟ .. شوفي هنا ي بيسان انتي لمن م قبلتي ب ود خالتك قلنا معليش وانا لحدييييي هسسسي خجلانه من اختي .. لكن لزوم راجلك شنو ؟ .. اطفال م بقدر يجيبهم.
بيسان ببكى : انا عايزاهو ي امي .. م عايزه غيرو .. ربنا اراد كد وانا قبلانه.
مروة (امها) : ليييي شنو؟ .. انا م عندي غيرك وعايزه اشوف احفادي وانتي تحرميني من شوفتهم عشان راجل عقيم؟ .. انا من الاول قلته ليك احسن ليك ود خالتك لكن انتي م بتسمعي كلام امك.
مروة وقفت وهي مواصله كلامها : حنتظرك ف العربيه.
بيسان بعد امها طلعت قامت غسلت وشها ولبست شبط اسود وطلعت ركبت معاها وطول الطريق هي بتبكي .. بعد م وصلو نزلو ضربو الجرس مسافه بعدها جا عزوز فتح الباب .. عاين ليهم وبأبتسامه قال : اتفضلو.
مروة مسكت بيسان من يدها وقالت : امك وين؟
عزوز زحى من الباب وقال : قاعده ف الهول.
مروة وبيسان دخلو وسلمو على مريم القامت من المصلايه.
مريم قعدت معاهم بعد م كلمت سلمى تجيب ليهم عصير.
مروة : م عايزين حاجة .. جايه عشان الموضوع الكلمتك بيهو ي مريم .. انتي عارفه بيسان بتي الوحيده وانا عايزه اشوف احفادي قبل م اموت .. واي شي زي م عارفه قسمه ونصيب .. وشهاب وبيسان م من نصيب بعض.
مريم بحزن : اي انا كلمته شهاب .. وزي م قلتي هم م من نصيب بعض.
بيسان والدموع ف عيونها : ي ماما عايزه امشي الحمام.
مروة حمرت ليها وقالت : م تتأخري.
بيسان هزت راسها ومشت واول م وصلت السلم طلعت ب سرعه غرفة شهاب ... مسحت دموعها ب قسوه وعايزه تخبط الباب فتح .. كان لابس ترينينق وتيشيرت بُني .. شعرو منكش وعيونو لونها احمر والسواد التحت عيونو زاد .. بيسان قبل م تنطق ب كلمه مدا ليها ورقة الطلاق .. بيسان زحت يدو وحضنتو شديد وببكى قالت : م تسيبني ي شهاب...ك...كلمهم...انا عايزاك...عليك الله م تسيبني💔.
يتبع........
أنت تقرأ
الحب الأسير
عاطفيةللحياة دمعتان..دمعة لقاء و دمعة فراق..فإن لم تجمعنا الايام...فسوف تجمعنا الاحلام...فإن لم تجمعنا الاحلام...فسوف تجمعنا الذكريات وروعتها باللقاء...فاذا رست سفينتكِ على شاطئ الذكريات..... فأجعليني احد ركابها. لا تحكم على الروايه من اول بارتات ;)
