الحب الأسير

(34)

*الحب الأسير*
Doaa
(34)

{رجال اذا عاهدوا اوفو.. لانهم يعلمون أن العهد كان مسؤلا}

..
مرت الأيام والشهور وعبدو وعلي ودنيا رجعو تركيا بعد اسبوع من عرس ايلاف .. علاقتهم بقت سطحية جدا او بالأصح عبدو قرر ينسحب .. دنيا كانت حزينة جدا على معاملتو البارده معاها لكن د كان قرارها لانها م بتقدر تسلم قلبها ل زول لانو هو الاثبت ليها انو الخذلان بجي من اقرب شخص ليك .. هو الخلاها تخاف تثق ف اي زول .. وهي ماشه بمبدأ البتهون عليه مره حتهون عليه مرتين .
اما بيان وشهاب والبيبي فرجعو عائله متماسكه اكتر ومنتظرين متين يسمعو خبر بيان حامل من شهاب❤.
سلمى استقرت ف لندن مع زوجها وبتها ... وام علي ولدت بت وعلي م حضر الولادة بسبب الامتحانات وسب ل القراية وكان حيخليها الا عبدو مسكو😂.
أريج محمد خطبها وعقد عليها ومنتظرين دنيا وعبدو وعلي يرجعو عشان يعملو العرس ..

________________________________

ف يوم بيان قاعدة بتعمل ف الغداء فجأة راسها لفة وم قدرت تقيف .. قعدت براحه ف الكرسي وهي بتنادي شهاب .. جا ب سرعة وشالها ونزلها تحت وكلم امو ودلال وساقوها على المستشفى .. وطلعت فعلا حامل وكانت فرحة كبيرة شديد❤ .. مرت تلاته شهور على حمل بيان و انتهت امتحانات تالته ل عبدو وعلي .. اما دنيا اتخرجت وكان معاها محمد ابو بيان وابوها وحتى محمد اخوها جا حضر التخريج ..
رجعو كلهم السودان بالسلامه واول حاجة عملوها مشو بيت علي وباركو ليهم وجابو معاهم فواكه وصندوق بارد .
عبدو قعد جنب محمد البتتونس مع ابو علي(عثمان)وقال : انا بحمد الله ي خالي انو م طلعت بتشبه علي.
علي براحة شال اختو الصغيرة من ابوهو ومسح على راسها وقال : كنت حأعرسها ل ولدك لكن م ب كلامك د خليتو .
_هي لمن تشوف ولدي السمح براها حتحبو .
محمد شالها من علي وقال : تبارك الله .. سميتوها منو؟
قاطعتهم زهور الجات داخله وقالت : نرمين .
عبودي : انتو شنو الاسامي د؟ .. كان تسموها إلسا .
علي : انت شابكنا إليسا إلسا من الله خلقك .
_عاجبني مالك انت .
محمد وقف وقال : نمشي بعد د وبنجيكم مره تانية .
عثمان ابتسم وصافحو : م قصرتو والله .. فرصة سعيدة .
_انا الاسعد .

_______________________________

كانت قاعدة ف الصالة مع خالتها مريم البتورق الملوخية وبتتونس معاها .. ومحمد اخوها راقد ف الكنبة وماسك التلفون .. كانت لابسة بجامة بيت وعامله شعرها ضنب حصان .
_اها ي دنيا تخريج واتخرجتي .. بعد د عرس بس .
دنيا بضحك : لالا عايزه اخد اجازة كم شهر كد ارتاح وبعدها اعمل الماستر .
محمد عاين ليها : الناس برتاحو يوم يومين انتي عايزه ترتاحي شهور؟؟
مريم عاينت ليها : ها العويرة بكرة تكبري زول بعرسك ماف .
_والله ي خالتو مريم ماف زول اتقدم لي مناسب لحدي الان وانا زاتي عايزة اعمل الماستر اول .
محمد وقف ودخل التلفون ف جيبو وقال : ي خالتي دنيا د امي بتكلمها من متين عشان تعرس لكن راسها قوي.
دنيا : الزول على كيفو ولا شنو ي خالتي ؟
_اخير ليك تعرسي يختي ... هاك دخلي الخدرة ف المطبخ.
دنيا شالتها ودخلتها المطبخ وطلعت جناح بيان خبطط الباب وقفت ثواني بعدها شهاب فتح الباب وسلم عليها ودخلها .
دنيا : بيان موجودة ؟؟
_ايوا ثواني اناديها ليك .
شهاب دخل ل بيان ف الاوضه وجات طالعه والبيبي ماشي جنبها واول م شاف دنيا ابتسم وصفق ب يدو .
بيان بأبتسامه : ي هلا نورتي والله .
دنيا حضنتها وقالت : نورك عاكس .
ونزلت على البيبي حضنتو وشالتو : حبيبي حبيبي .. واخيرا جاييك اخو .
بيان : اخو شنو عايزين بت .
دنيا قعدت ف الكنبة وقالت : م مشكله المهم رفيق ليهو .
بيان وهي بتتوجه للمطبخ : ثواني.
دنيا بقت تلعب ف البيبي لحدي م بيان جات وقدمت ليها عصير وكيك شكلاته وختتهم قدامها ف التربيزة الزجاجية .
دنيا بضحك : انتو طبيعي الكيك د متوفر ف بيتكم ماشاء الله.
بيان قعدت جنبها وقالت : عبد العزيز بحبو شديد عشان كد دايما بنعملو.
البيبي اتوجه ناحية التربيزة ودخل يدو ف الكيك واكلها وملا وشو ب الشكلاته .
ضحكو على شكلو وهو عاين ليهم بأبتسامه ومسح يدو ف هدومو ...
قعدت معاهم شوية واتوجهت ل جناحهم .. شهاب جا طالع من الاوضه وقعد جنب بيان وقال : إيدن وليزا انفصلو .
عاينت ليهو بصدمه : ليي؟؟
شهاب حكى ليها كل القالتو ليزا .
_خسارة ياخ .. كانو حلوين مع بعض .. تتذكر اخر مره عزمونا فطور قبل م نسافر؟؟
شهاب ابتسم وقال : لمن شاكلها عشان لابسة فستان قصير والله ضحكته ضحك .
بيان بضحك : ايوا وصاحبها الاسمو ليو شاغلها وإيدن بس بعاين بغيظ والله شكلو بضحك😂.
_ولمن جينا طالعين بكورك جنب باب المطعم وبتكلم بالانجليزي ب سرعة.
_غايتو كانت ايام جميلة ياخ .
_لمن تولدي ان شاء الله حنسافر تاني .
بيان بأبتسامه : ان شاااء الله.