*الحب الأسير*
Doaa
(26)
تسلل الضوء ل عيونها من الشباك البطل على الشارع .. مسحت وشها ب يدها واول حاجة اتذكرتها ليلة امبارح وكيف شهاب رفض اعتزارها بكل برود م حاولت تاني تتكلم تاني .. وقفت ودخلت الحمام عملت روتينها الصباحي وطلعت .. انتبهت ل البيبي الماف .. طلعت ب سرعه من الاوضه ولقت شهاب لابس ملابس الشغل و قاعد ف الكنبه بشرب قهوة وخاتي البيبي ف فخذينو .. اخدت نفس ب راحه ودخلت المطبخ .. عملت عصير وقعدت ف السفره وخاته يدها ف خدها وهي سرحانه .. فجأه سمعت صوت البيبي بضحك بقوة وشهاب بقول : لااا ي ولد.
ابتسمت وشربت العصير وانتظرت شهاب لحدي م جا داخل وعايز يديها عبد العزيز البكى واتشعلق فيهو .
شهاب : انا ماشي الشغل .. بعدين لمن ارجع بطلعك.
بيان وهي بتشيل عبد العزيز بالغصب : تعال حبيبي بابا ماشي الشغل م تأخرو.
شهاب اول م قالت بابا عاين ليها .. وشها كان شاحب والسواد التحت عيونها ذاد .. نزل عيونو ب سرعه وطلع وسط بكى البيبي.
___________________________________
جو راجعين من الجامعة وطلعو فوق طوالي .. اخدو دش واكلو حاجة ولبسو وعايزين يطلعو صادفو محمد .
_كدي قولو بسم الله .. جيتو متين عشان تطلعو ؟
عبودي : ي عمي نقعد ف البيت نسوي شنو عليك الله؟؟
علي : وبعدين نورا عايزه تاخد راحتها ف بيتها .
سوسن : خليهم يمحمد يتفسحو شويه.
محمد : يتفسحو شنو ديل اربعه وعشرين ساعه برا.
علي : نقعد ف البيت زي البنات ؟
محمد : هو البيت د بتاع بنات بس؟؟
عبودي : م بنتأخر ان شاء الله.
محمد استعدل ف قعدتو وقال : طبعا لقيت شقه من بكره ان شاء الله بنرحل فيها.
عبودي : جادي؟؟ ..والله كويس ياخ .. لمن نرجع بنتفاهم يلا
عبودي فتح باب الشقه ونزلو تحت حامو ف الشوارع ودخلو المحلات واتغدو وقعدو ف الحديقه شويه وبالمساء جو راجعين .. علي وقف عبودي جنب باب العماره وقال : دقيقة اربط رباط الجزمه.
عبودي سند ظهره ف الحيطه وهو بعاين ل علي البربط رباط الجزمه .. فجأه باب الشقة الارضيه القصادهم فتح بقوة وحسين جرا دنيا من شعرها ورماها برا وب صوت عالي قال : الباب د تاني م تعتبيهو سامعه؟؟
جا صوت هبه من جوه : انتي م بتفهمي قلنا ليك ابوك برا البيت وم برجع الليله .. وبعدين انتي مش مدلعنك لمن مأجرين ليك شقه براك جاياني تزعجينا ف بيتنا مالك؟؟ .. غايتو الزول الا يسافر الصين عشان يطير منكم.
عبودي وعلي بعاينو بصدمه ل دنيا الواقعه وشعرها نازل ف وشها وحسين الواقف بعاين ليها ب سخريه.
علي غمض عيونو شديد لانو عارف الحيشوفو م تمام .. وفعلا سمع طااخ وب سرعه وقف ووقف دنيا وقال : قومي قومي.
دنيا وقفت وهي بتحاول تتماسك عاينت ل عبودي النزل ضرب عنيف ف حسين نظره اخيره وسندت ف علي الطلعها شقتها وقال : م بتأخر .
ب سرعه طلع الشقه فوق ودخل وهو بنده : نورا .. نورا .. ي بت.
نورا جات طالعه من غرفتها ب سرعه : بسم الله مالك؟؟
علي فتح الباب وقال : تعالي سريع.
نورا جرت مع علي تحت شقه دنيا ودخلو .. دخلو غرفتها ولقوها راقده وبتبكي .. نورا حضنتها شديد وقالت : م تبكي انا جنبك .. م تخافي علي وعبودي حيتصرفو مع الحيوان د.
عاينت ل علي وقالت : تعال اقعد معاها انا حأمشي اعمل ليها حاجة دافية واجي.
علي هز راسو وقعد ف الكنبه وهو بعاين ليها بشفقه .. بعد مسافه نورا جات شايلة كبايه مغ فيها شراب دافي .. قعدت جنبها وقالت : امسكي د اشربيهو.
دنيا غطت وشها ب يدها وهز راسها وهي بتقول : ع...عايزه ارجع الس...السودان عايزه ارجع ل م..حمد وامي .. ما معايزه اقعد ه..هنا.
نورا حضنتها شديد وقالت : حبيبتي اوعدك عبودي وعلي حيتصرفو وحيخلوهو يندم .. م تبكي عليك الله خليك قوية زي م بتقولي لي.
علي وقف وطلع برا نزل لقى الجيران حاجزين عبودي من حسين النخرتو بتنزف وهبه سانده ولدها وبتكورك .. عبودي جرا يدو من الراجل وصرخ وهو بقول : زحووو .. خلوني اقتلووو الحيوان الم راجل د.
علي مسكو وقال : ي عبدو اهدى خلاص ياخ .. دنيا كويسه م تخاف .. ارخ م عايزين مشاكل .
عبودي غمض عيونو وهو بحاول ينظم انفاسو .. بعد خمسه دقايق هدا وقال : دنيا وين؟؟
_ف شقتها .
عبودي طلع فوق وفتح باب الشقه ودخل ليها لقاها راقده ف السرير ونورا بتمسح على شعرها ب حنيه .. وقف قصاد دنيا وربع يدينو امام صدرو وقال : عاجبك؟ .. عاجبك البحصل ليك د؟ .. م من حقي اقول عليهو فقر صح لانو ماف فقر اكتر مني؟؟
دنيا نزلت عيونها ورفعتها اول م سمعت عبودي بقول : نورا لمي ليها حاجاتها.
نورا وعلي : لي؟
عبودي ببرود : نحنا بكره حنرحل ومستحيل اخليك مع ال****** ف مكان واحد.
دنيا بلعت ريقها وقالت : لك...
_هشششششش .. انا م جاي استشيرك اصلا.
دنيا كشرت وشها وقالت : انا م حمشي معاك اي مكان.
عبودي ابتسم ب سخريه وقرب منها مسك فكها ب يدو الضخمه وضغط عليه وقال : لسانك د انا بقطعو ليك .. وحتمشي غصبا عنك.
نورا زحت يد عبودي بدهشه وقالت : عبد الرحمن.
عبودي عاين لي دنيا الدموعها نزلت وطلع.
علي : معليش ي دنيا عبدو هسي زهجان شويه .. وانتي لمن ترحلي من شقتك حتكوني بعيده منهم ود افضل ليك طبعا.
نورا طفت النور وقالت : نومي شويه .
دنيا قعدت وقالت : م تخلوني براي.
نورا بأبتسامه : م حمشي م تخافي .. انتي نومي وانا بلملم ليك ملابسك.
دنيا هزت راسها ورقدت وغمضت عيونها.
علي طلع الشقه فوق ودخل غرفتهم لقا عبودي بتكلم بالتلفون واول م شاف علي طلع البلكونه .. علي عاين ليهو بأستغراب لانو م من عادتو يخبي عنو حاجة .. رقد ف السرير ومسك التلفون .. بعد مسافه عبودي جا داخل وقفل باب البلكونه وقعد ف السرير.
علي : انت هسي ضامن حيحصل ليك شنو بعد العملتو ل حسين؟
عبودي ببرود : يعملو العايزنو .. دنيا د خط احمر .
علي هز راسو وعبودي ابتسم وقال : قررت لمن ارجع السودان اتقدم ل اية.
علي بأستغراب : نعمممم؟؟؟
عبودي رقد ف السرير وقال : السمعتو.
_اية د مش زي اختك؟؟
_اية م زي باقي اخواتها .. كلامي معاها مختصر وبعدين هي اعترفت لي ب مشاعرها وانا م حقدر اقول حاجة.
علي بأستغراب : انا م فاهم .. طيب ودنيا؟؟؟
_يعني انت على امل دنيا ترجع لي؟
_طيب انت مش بتحبها؟
_م عارف بحبها ولالا .. هسي المهم اني حأرتبط مع اية وحأتقدم ليها طوالي .
_حاجة غريبه والله.
_الغريب شنو؟
_اية د العارفو انك معتبرها اختك ودنيا انت لو م بتحبها حتختصرها لكن انت بتعمل العكس .. بتحاول تقرب منها وتدافع ليها وبتغير عليها وهسي قلته لي دنيا خط أحمر .
عبودي هز كتفو وقال : برضو بحب اية.
_من متين بتحبها ؟؟ .. والمفترض انك بتحكي لي اي شي.
_هسي وريتك.
علي جرا البطانية وقال : طيب .. كويس .. ماف مشكلة .. تصبح على خير.
عبودي ابتسم و همس ب : وانت من اهل الخير .
أنت تقرأ
الحب الأسير
Romanceللحياة دمعتان..دمعة لقاء و دمعة فراق..فإن لم تجمعنا الايام...فسوف تجمعنا الاحلام...فإن لم تجمعنا الاحلام...فسوف تجمعنا الذكريات وروعتها باللقاء...فاذا رست سفينتكِ على شاطئ الذكريات..... فأجعليني احد ركابها. لا تحكم على الروايه من اول بارتات ;)
