*الحب الأسير*
Doaa
(29)
الجو كان مغيم ورزاز مطر خفيف .. صوت الدفاية وزيت التحمير الجاي من المطبخ مع صوت التلفزيون الفاتح على قناة اطفال كان عامل جو عائلي جميل .. ريحة السمك جاتو ف البلكونه وهو ماسك كتاب ولابس بنطلون قماشي وفنيله قطنيه اكمامها طويله .. وخاتي جنبو كبايه نسكافي .. التفت على صوت التلفزيون وعاين ل البيبي الراقد ف الكنبه وخاتي رجل فوق رجل .. ابتسم وخته الكتاب ودخل وقف جنب البيبي وقال : بيان تعالي شوفي.
بيان جات من المطبخ وهي بتمسح يدها ب مناديل المطبخ : ايوا.
شهاب اشر على البيبي وقال : عايني راقد زي الزول كيف!😂.
بيان ضحكت وعاينت ل البيبي وقالت : نجيب ليك قهوه ولا شاي ي باشا ؟؟
البيبي عاين ليهم وخته المسند ف وشو.
شهاب بضحك : بتخجل كمان ؟
_خلي التلفزيون وتعال عشان تاكل .. يلا الاكل حيبرد ي شهاب.
شهاب شال البيبي وقال : تعالي ناكل ف البلكونه احسن.
_طيب تعال شيل معاي الصحانه.
_حاضر.
رصو الصحانه ف التربيزه الزجاجيه المختوته ف نص البلكونه المطله على شوارع نيويورك المليانه مويه بسبب المطر .. ختت البخور جنبهم وقعدت البيبي ف كرسيهو المخصص للاطفال وشهاب كان قصادها وبدو ياكلو بعد م عملت للبيبي بطاطس مهروسه.
شهاب كفكف كم الفنيله وقال : ي سلااام طولنا من السمك ياخ.
بيان بأبتسامه : حتى انا .. حاسه روحي ف السودان.
_اشتقتي لي ناسو ولا شنو؟
_شديد .. ل امي مريم .. سلمى .. بنات خالتي واهم زول ياسمين طبعا.
شهاب بأبتسامه : نرجع؟
_احسن بعد عبودي يخلص من السمستر التاني عشان حياخد اجازه ويرجع السودان .. ونحنا كمان نرجع عشان الاقيهو بالمره.
_هم قعدو هناك خلاص صح؟ .. يعني م حيجو السودان الا اجازات.
_ايوا .. والاجازه بالكتير شهر .
_ممكن يعمل الماستر ف امريكا هنا انا بظبط ليهو امورو .
بيان بضحك : ربنا يحيينا للوقت داك .
_السنين بتجري .
_فعلا .
البيبي اشر على السمك وقال : نااا.
بيان : لالا حبيبي فيهو شوك م كويس.
البيبي بكى وهو بأشر على صحن السمك .
شهاب قرب من البيبي وقال : انا بأكلو م مشكله .
_خايفه يعمل ليهو حاجة .
_لالا م بعمل حاجة ان شاء الله .
شهاب بدا يأكل فيهو وهو مبتسم وبيان مراقبه الوضع ب عيونها وف شبح ابتسامة ف وشها ....... مر اسبوع على اخر مره لاقت فيها بيسان وحكت ليها عن شهاب .. طوال الفتره د م شافت منو حاجة كعبه .. كان حنين وهادئ وكلامو حلو ومثقف وبحب عبد العزيز جدا وبهتمه بيهو .. هي معترفه ب انها بدت تميل ليهو وزي م بقول المثل النفس تميل لمن يدللها .. وم حتنكر اهتمامو بيها .. دايما مقضينها فسح وكافيهات ومطاعم واماكن كانت بتحلم ب زيارتها .. م عارفه لي بتغير من ليزا لمن تتكلم مع شهاب او حتى بيسان لمن حكت ليها عنو .. حتى انها هي وشهاب والبيبي بنومو ف اوضة النوم ود كان رأيها عشان م تحسس شهاب ب انو شخص غريب او هو م منتمي ليهم .. بتهتم ب كل تفاصيلو الصغيره قبل الكبيرة.
" سرحانه وين ؟؟ "
بيان عاينت ل شهاب وبأبتسامه قالت : لالا اتذكرته حاجة.
شهاب وجه نظرو ل عبد العزيز وقال : انتي عارفه عبد العزيز د شكلو نعساااااان.
_صاحي من النجمة .
شهاب شال البيبي وقال : حأرقدو ف السرير واجي.
شهاب طلع وهي لمت الأكل ومسحت التربيزه ودخلت المطبخ وقفت تغسل العده.
شهاب جا داخل وقال : خليها لي العده د .
_انت كل مره بتغسلها خليني انا المره د .
_لالا ي جميل معقوله اليدين الحلوه د تتبهدل .. انتي اعملي عصير تفاح وختيهو ف البلكونه وانتظريني.
بيان نشفت يدها وقالت : حاضر .
أنت تقرأ
الحب الأسير
Romanceللحياة دمعتان..دمعة لقاء و دمعة فراق..فإن لم تجمعنا الايام...فسوف تجمعنا الاحلام...فإن لم تجمعنا الاحلام...فسوف تجمعنا الذكريات وروعتها باللقاء...فاذا رست سفينتكِ على شاطئ الذكريات..... فأجعليني احد ركابها. لا تحكم على الروايه من اول بارتات ;)
