*الحب الأسير*
Doaa
(8)
دنيا م قدرت تعبر وغطت وشها ب الطرحه وبكت من الفرح💕.
الغنيه وقفت وعبد الرحمن قعد على ركبتو ومدا ليها بوكيه الورد وبأبتسامه قال : خلاص كبرتي وليك سبعتاشر سنه.. عمر الزهور عمر الغرام عمر المنى.. اتمنى يوم تجمعنا جنات حبنا تبقي الاميرة والبطيع قلبي انا❤.
دنيا مسحت دموعها وشالت البوكيه وقالت : م معارفه اق اقول ليك شنو والله.
علي صففففررر والاولاد كلهم صفرو وهنا دنيا وعبد الرحمن ضحكو💕.
___________
_الو خالتي.
_بيان حببتي كيفك كويسه؟؟
_الحمد لله ف نعمه والله كيف انتي صحتك وامورك؟
_والله كلوووو تمام الحمد لله.. تسلمي يارب.
_خالتي عبد الرحمن لو جنبك اديني ليو لانو بتصل عليو م برد.
_اي هسسي جا داخل كان عندهم كورس.
_لحدي الوقت د الساعه ماشه على تسعه ونص.
_والله ي بتي القرايه يسوي شنو عاد ربنا يوفقو بس.
_اميييين دعواتك ي خالتي بس.
_والله دايماً داساهو ف دعواتي ربنا ينجحو... هاك ليو هدا جا... هاك بيان بتسأل منك ي عبدو.
عبودي : الووو.
_اي عبودي كيفك؟
_تمام الحمد لله كيف انتي؟
_تمام والله .. قريت كويس؟
_اي كويس اسي جيت راجع من الكورس.
_ادوكم شنو؟
_يعني حيكون شكلاته وحفله ب بيانو ومعاها بوكيه ورد مثلاً ؟ .. اكيد دروس.
_اي عارفه قصدي هندسيه ولا كيمياء ولا رياضيات ولا شنو بالضبط.
_امممممم قصدك كد يعني .. هندسية .. انتي مش عارفاني عايز ابقى باشمهندس زي شهاب اخو عزوز؟
_بدل تخش كورس وتتعب تمشي وتجي خلي شهاب يشرح ليك.
_ف بيتهم الكبير داك قصدك؟
_ااي.
_شكراً جزيلاً م عايز الاقي وش الشؤم ديك.
_منو وش الشؤم؟
_اخت عزوز الشينه ديك ب بنتها الفرحانه بيها د.
_سلمى.
_اي ياها زاااتها.
_م تقول كد هي اكبر منك.
_بتعمل لي حركات زي الم عايزاني اجي.
_م تشتغل بيها كتير بس.
_حاضر .. انا ماشي انوم تصبحي على خير.
_وانت من اهلو .. م تنسى تتصل على ابوي تسلم عليهو قبيل اتصلته عليهو بسلم عليك.
_حاضر .. ادي عزوز بوسه قولي ليهو د من عبد الرحمن.
_امشي ي قليل الادب.
عبودي ضحك ب صوت عالي وقال :كررر البتخجل وقفل الخط عشان م تسمعو كلام كتير😂.
بعد قفل من بيان طلع فوق وطفى النور رقد ف السرير وشال تلفونو واتصل على دنيا.
_دنيتي .. اشتقته ليك.
_حتى انا والله .. م حتتخيل قدر شنو فرحتني ربنا يخليك لي.
_العفو د اقل حاجه اعملها ليك ي مزه.
_بس انت كيف قدرته تفهم الفصل كلو يعمل شنو بجد جات حلوه شديد💕.
_البنات صحباتي وهم العملوها معاي والاولاد علي حنكهم.
_السته بنات صحباتك؟
_اي ويعني؟
_كيف ويعني؟
_عااادي ياخ م عندي ليهم شي.. م واثقه فيني انتي؟
_اكيد واثقه.
_اي انا اصلا م عايز غيرك وم شايف غيرك عشان كد م تشيلي هم.
دنيا سكتت مسافه بعدها قالت : اوك .. طيب تصبح على خير لاني نعسته شديد وبكره ماشه المدرسه.
_ظابط ي حبي وانتي من اهلي.
_بحبك شديد.
_وانا اكتر واكتر.
_يلا.
عبودي قفل الخط وعاين جهة الباب البخبط وقال : ادخلي.
اية دخلت وقالت : اريج قالت ليك تعال اشرب الشاي.
عبودي عاين للساعه الفي تلفونو وقال : ممكن تجيبيو لي هنا؟
_طيب.
عبودي قعد ف السرير لحدي م جابت الشاي ختتو قدامو وعايزه تمشي وقفها : اية.
التفتت عليهو.
عبودي وقف قدامها وبأبتسامه قال : اسف عشان امبارح كوركته فيك.
اية ضحكت بتوتر وقالت : لا .. عادي.
عبودي مده ليها يدو وقال : اصحاب اصحاب؟
اية صافحتو بأبتسامه : طيب💕.
_يعني عامليني زي اخوك عادي .. م تختي حدود بيناتنا فهمتي خليك زي اريج وايلاف.
اية هزت راسها بأبتسامه.
عبودي فكه يدو وقال : تصبحي على خير.
_وانت من اهلو.
طلعت وعبودي اتصل على ابوهو اتكلم معاهو شويه بعدها قفل ورقد نام.
أنت تقرأ
الحب الأسير
Romanceللحياة دمعتان..دمعة لقاء و دمعة فراق..فإن لم تجمعنا الايام...فسوف تجمعنا الاحلام...فإن لم تجمعنا الاحلام...فسوف تجمعنا الذكريات وروعتها باللقاء...فاذا رست سفينتكِ على شاطئ الذكريات..... فأجعليني احد ركابها. لا تحكم على الروايه من اول بارتات ;)
