الحب الأسير

p (3)

*الحب الأسير*
doaa
(3)

عزوز رفع راسو : اخخخخ .. د شنو؟؟؟
بيان جات جاريه لمن وقعت وهو قعد يضحك فيها ويضربها ب خفه : ي حيوانه عملتي شنو انتي ف البيت د؟؟؟
بيان : د برنامج عشان الزهج الحاصل د ياخ.
عزوز رفع يدينو وقال : اللهم ان كان هذا سحراً ف ابطلهُ.
_سحر في عينك.....ارح نلعب شويه ياخ.
عزوز وهو بحاول يقوم : هدوم الشغل ي أذى.
عزوز مشى على ركبتو وهو بحاول يدخل الاوضه عشان السراميك بزحلق شديد.... وبيان جابت التلفون وعملت فيديو وقعدت منتظراهو.. م عرفت مر كم من الوقت حتى جا ڤووو متزحلق فيها😂... كان لابس شورت وفلينه بيضا...
بيان : البخش المطبخ اول هو الفائز😏.
_لعبتي مع الزول الغلط.. وطوالي رجع على الحيطه ولزا روحو شديد لحدي م وصل باب المطبخ... بيان قالت لااااا وعملت نفس حركتو وعايزه تخش مسكها من يدها ولزاها هناااااك😂...
المهم مره يلعبو ومره بتشاكلو ومره هي تضربو ومره تضحك لحدي اذان العشاء بعدها عزوز قال : خلاص كفايه تخلف حمشي الصلاة.. امشي واجي ي بيان القى البيت زي ماهو.
بيان غزت يدها ف نصها : بالله عليك؟؟؟... اللِعب معاي منو؟؟.. ولا على كيفك تنضف غصباً عنك كمان... شوف د بالله.
_خلاص م تردحي لي فهمته😂.
عزوز دخل الحمام اخد دش وطلع المساحه وقال : انا الصاله لحدي هنا واشر ب يدو...وانتي الباقي.
_كتير عليك د.
_لا ولا يهمك... بس اطلعي لي ف الكنبه.
بيان وهي بتقعد ف الكنبه : حاضر.
بقت مراقباهو ب نظراتها وهو بمسح ب اتقان :)
وهي من التعب نامت.. عزوز بعد خلص مسح وشو ب يدو وقال : اها مسحتها كلها تاني اقدري افتحي خشمك .. حبي ..عاين ليها لقاها نايمه قرب منها وابتسم ب شر ودخل المطبخ شال مويه بااارده ووقف قدامها وكشح في وشها المويه😂😭.. وهي وقفت تصرخ : ي غبي ي حيوان.... ياخ انت م عندك دم د شنو المتخلف د..عوير انت؟؟ عوير؟؟
بتكشح فيني المويه كد لي؟؟؟ وقعدت تبكي ودخلت الاوضه😭.
وهو بحاول يكتم الضحك دخل ليها لقاها ركبت في السرير واتغطت... فتح الدولاب طلع ليها بجامه نوم وختاها جنبها وقال : م ينفع تنومي وهدومك مليانه مويه قومي استحمي.
بيان من تحت البطانيه : م عايزه.
عزوز : نؤ نؤ نؤ ... وزح البطانيه وشالها ووقفها جنب باب الحمام وقال : خلافاتنا ب جهه وصحتك ب جهه تانيه💕.
بيان عاينت ليو ب طرف عينها وشالت ملابسها ودخلت وهو شال المصلايه وصلى .... طلعت لقتو راقد ف السرير وخالف رجلو وماسك التلفون..شالت المصلايه هي برضو صلت ورقدت جنبو وقبلت الجهه التانيه.
عزوز وهو بعاين ف التلفون قال : شوفي صحبي خاتي ف الاستوري شنو.. كاتب ((اجمل م قيل ف الغيرة : عندما نظر سيدنا علي بن أبي طالب إلى زوجته فاطمة الزهراء بنت الرسول صلى الله عليه وسلم وهي تستاك بعود من الأراك فقال :
حظيت ي عود الاراك بثفرها اما خفت ي عود الاراك اراكَ لو كنت من اهل القتال قتلتك ما فاز مني ي سواكُ سواكا💘)).
بيان ابتسمت وقامت وقبلت عليهو ب جسمها وقالت : كلام جميل💕.
عزوز وهو بزح ليها جنبو : تعالي❤.
بيان قعدت جنبو وقالت : عندي فكره ظااابطه حتخلينا نضحك.
عزوز ابتسم وقال : جنك ضحك.. اها شنو؟
بيان شالت تلفونو وخرفت رقم ودخل معاها واول م ردت المره بيان قالت : السلام عليكم.
المره: وعليكم السلام .. منو معاي؟!
بيان عاينت ل عزوز وغيرت نبره صوتها وقالت : معاك اخت الساحر أُم عَايذ😈.
_شنو؟؟؟
بيان بنفس نبره الصوت المخيفه : معااااك اخت الساحره ام عايذ.
المره : بسم الله الرحمن الرحيم د كلام شنو؟؟
بيان : لا م تقولي بسم الله وصرخت صرخه مخيفه كد نظام اختفت عشان قلنا اسم ربنا🌚😂.
المره طوالي قفلت الخط وهنا عزوز وبيان اتفقعو ضحكككككك... ساعه هم بضحكو وكل م يوقفو بتذكرو الموقف يضحكو😂.
عزوز شال التلفون وقال : اجرب😂.. برضو نفس الشي كتب رقم واتصل وطلع شاب.
عزوز ب صوت تخين : السلام عليكم.
_وعليكم.. منوو؟
عزوز عاين لي بيان وقال : اقول اخو الساحره صح؟
بيان عضت السبابه وهي بتأشر ليهو يعني الخط فاتح.
الشاب : الوووو.
بيان خطفت التلفون وقالت : اااا معاك اخت الساحره...
الشاب : ياا****** م ناقصك انا والله.
عزوز عقد حواجبو ب اندهاش من بشاعه الرد وشال التلفون وطلع برا وقفل الباب عشان بيان م تسمع الكلام الحيتقال ربنا يستر😂.
بيان بقت متوتره وبتفرك يدينها لحدي م عزوز جا داخل عاين ليها وابتسم وقال : يلا النوم كفايه سهر.
_نوم؟ .. لا م نعسانه.
عزوز وهو برقد : والكان نايم ف الكنبه د منو ي ربي؟
قلبت عيونها ب ملل وقالت : اوك.. طيب بكره عايزه امشي ل عبد الرحمن ف المدرسه اشوفو ماشي كيف مع القرايه!
_خلاص بوصلك وبمشي الشغل.
بيان وهي بتقفل النور : اوك.
عزوز رقد ف حضنها وقال : اها غني.
بيان وهي بتمسح على شعرو : جبته ليك غنيه جديده.
غمض عيونو وهو مستمتع ب صوتها العذب وهي بتغني (زي ما نسيتني خلاص علمني انساااكَ.. علمني انسى هواك وانسى الحزن داااكَ)

🌸🌸🌸🌸🌸
الصباح...
ف المدرسه واثناء الحصص وقف هو ومعاهو صحبو الشايل التلفون وقال : حنط.. شوف لي لو في زول ي علي.
علي عاين يمين وشمال وقال : ي مان ماف زول ياخ انجزز.
عبودي نط ونزل على الظلط وعلي ب وراو والاتنين فكوها جريه وحده لحدي المكان الاتفقو يتلاقو فيو.
علي وهو بشيل انفاسو : من الخوف وصلنا كُدر😂.
عبودي وجه نظرو للتلفون وقال : م حاسي ب رجليني والله...... ارح ندخل الكافي د وننتظرهم ظابط!
_ظابط ...يلا.
الاتنين دخلو وحجزو طاوله فيها اربعه كراسي... علي اتلفت حولينو وقال :  مالهم اتأخرو كد.... ادق ليهم؟!
عبودي رجع ل ورا ف الكرسي وقال : نديهم نص ساعه كد لو م جو ندق.
عبودي اخد نفس وقال : اها وانت حنكته مع ليماء ولا لسه؟
علي بأبتسامه : لسه والله.
_كدي دق ليهم.
علي شال التلفون واتصل على لمياء بعد مسافه ردت
_الوو
_لمياء .. اها انتو وين؟!
_وصلنا خلاص.
_اوك.. تمام
_يلا.
علي قفل الخط وقال : خلاص وصلو.
عبودي هز راسو وعلي قام عشان يطلب.
وقفت بنت لابسه عبايه والطرحه ف كتفها وشعرها بُني عاملاهو جمايكتين واصله لحدي نص ظهرها... عيونها سوداء واسعه وانفها حاد.. خشمها صغير ولون بشرتها قمحيه💕 قاده تلاته قدات ف اضانها والحلقان زي بعض💕... رجعت خصلات شعرها ل ورا لمن سمعت صحبتها بتقول : قاعدين جوا يلا ندخل.
واول م دخلت عيونها وقعت على الولد الماسك التلفون ابتسمت ومشت عليهو وهو لمن شافها وقف.
عبودي صافحها بأبتسامه وقال : مالكم اتأخرتو كد!!
دنيا وهي بتقعد : د لمياء بحنس فيها ساعه وهي بتقول لي خايفه.
عبودي ضحك وعاين ل لمياء القالت ليو : وين علي؟
وف اللحظه د علي جا وقال : اصلا مستحيل تجو بدري.
لمياء : كنت خايفه والله م متعوده اطلع وقت دوام المدرسه.
دنيا وهي بترجع شعرتها ل ورا : خوافه بس.
لمياء : الله يديني رفع الشجاعه العندك د.
عبودي : مافي داعي للمجازفات تاني د اول واخر مره.
دنيا : اوك.

__________________

_ي بت م تطلعي .. لو كانت عروس كان جهزت.
بيان وهي بتفك رباط الجزمه ب زهج : ي عزوز ياخ الرباط د معايز يتربط لي.
عزوز وهو بقعد جنبها ف الارض : انتي اصلا من متين بتعرفي تربطي رباط الجزمه؟
_بعرف بس ربطه الفيونكه د م بعرف ليها .. امي كانت بتعملها لي وانت جيت يعني م لقيت وقت واتعلمتها.
عزوز بعد ربطو قال : م تتعودي كد حاولي اتعلمي تربطيو.
بيان وقفت وهي بتعاين ل الربطه ب رضى وقالت : شوكراً .. انت معاي اتعلم اربطو لي؟
_انا م دايم ليك.
بيان مسكت من يدو وهي بتطلع قالت : ربنا يخليك لي.. يلا عشان م نتأخر.
_يلا طيب.

في المدرسه ...
عزوز وصل بيان ومشى الشغل وهي دخلت مكتب الوكيل سلمت وسألت من فصل علمي هندسيه💕..
الوكيل : الطابق التاني على يدك اليمين.
_تسلم.
طلعت من المكتب ركبت السلم وهي طالعه لقاها ولد وقفتو.
بيان : لو سمحته بسأل من عبد الرحمن محمد لو معاكم ف الفصل؟
الولد مرر يدو ف راسو وقال : والله.. عبد الرحمن د جا قبيل الصباح لكن تاني م لاقيتو.
_كيف؟ .. م دخل معاكم الحصه؟
ف ولد جا وقف ورا الولد وقال : ف شنو ي خالد واقف هنا؟
خالد التفت عليو : بتسأل من عبدو .. شفتو؟
الولد بصوت هامس : عبد الرحمن دكه المدرسه مع علي.

يتبع.......