الحب الأسير

(18)

*الحب الأسير*
Doaa
(18)

بعد العشاء كانت الشموع مرصوصه ف الطاوله الرخاميه على شكل (1) .. والورق المقوى الملون مقصوص على شكل ورود ومختوت ف اصايص بلاستيكية .. الاشجار التفت حولها انوار للزينه والبالونات ف كل مكان .. الطاوله الرخاميه الضخمه حولها كراسي بلاستيكية كتيره .. كان الكل سعيد وهم مشغولين بتحضير عيد ميلاد عبد العزيز الاول .. واخيراً تم سنه وكانت احلى سنه بوجودو معاهم .. سلمى وشهاب واصحابو .. علي وعبودي وبنات خالتو .. دلال ومحمد وولد عمو (مزمل) .. واخيراً ياسمين .. جات طالعه سلمى واريج وهم شايلين كعكه العيد ميلاد .. ختوها ف الطاولة وهنا علا صوت عبد الرحمن اللابس زي دبدوب لونو بُني وهو ماسك الراس ب يدو : الشي د بتسخن ياخ.
علي صورو وهو بضحك وقال : اصبر لمن ارسلها ف قروب البنات.
عبودي شال البلونه الكانت مربوطه ف يد الكرسي وطقاها وهو بقول : لو رسلتها حعمل ل راسك كد .. بوووم.
اريج رفعت الفستان الازرق الابساهو شويه وقالت : انا خشمي وجعني وانت بتطقها بكل بساطه كد!!
عبودي : عليك الله اقلعيهو احسن لابساهو لي!؟
جات عليهم اية وهي شايله بوكيه ورد وقالت : عايني ي اريج .. عملتها كد حلوه؟!
عبودي بغمزه : ورده شايله ورده😉.

في جهة التانيه من الحديقه شهاب كان لابس بنطلون اسود وشاكي قميص ابيض فتحت اول زراير ليهو .. وجنبو اصحابو (الهادي) و (مجتبى) ومحمد قاعد جنبهم لابس (علي الله) وشايل رهف بت سلمى .. شهاب صلح نظارتو وهو بعاين ل محمد المركز مع اريج شديد وقال : وهي الريده شنو لو م اللابسه ازرق!!
محمد التفت عليهو ب هدوء وهو مبتسم وقال : بتتكلم معاي؟!
_لالا.
محمد قَبل منّو وقال : قايلك بتتكلم معاي عشان كنت حكسر راسك.
مزمل وهو منتبه مع التلفون : قبضوك.

__________________________

لبست فستان كريمي طويييل ب اكمام واسعه .. وكعب عالي اسود .. لفت طرحتها ب طريقه جميلة وقعدت ف السرير ب ارتياح .. كانت ف قمة الجمال والانوثه .. ياسمين جات داخله عليها وقالت : اتأخرتي ي بيان .. يلا صحي عبد العزيز سيد العيد ميلاد.
بيان عاينت ل البيبي النايم بعمق وقربت منّو ولمست خدو وهي بتقول : حبيبي .. قوم .. كفايه نوم.
فتح عيونو ببطئ وعاين ليها وتاني غمض .. عاينت ل ياسمين وقالت : تعالي شيليهو ونزليهو تحت ف النجيله وانا عندي حاجه حأعملها واجي ... ياسمين هزت راسها وشالتو ونزلت .. بيان فتحت شنطة جنز حقت البيبي وطلعت صوره مبروزه ب لون اسود وحولينها نجوم بالفضه .. كانت صورة عبد العزيز الصغير ف الاستوديو وهو لابس بنطلون بس وماسك لعبه ف يدو وبضحك .. ابتسمت وشالتها ونزلت ليهم.
اول م وصلت الحديقه لقتهم كلهم قاعدين حولين الطاولة الرخاميه .. رفعت يدها وقالت : م اكون اتأخرته.
عبودي : Sweeter than honey😍.
اريج : اشششي عليو.
سلمى : جميييلة شديد.
علي : سمحه ياخ.
مريم وهي شايلة البيبي : الصلاة على النبي.
هند : تبارك الرحمن .. طالعه خطيره.
اية : بجد حلوه شديد بالفستان.
دلال : سماحتك د مالك م مظهراها لينا .. ماشاء الله تبارك الله.
مزمل همس ل شهاب : نحن ممنوع نتغزل صح؟!
شهاب صلح نظارتو وقال : اللهم انك عفو تحب العفو فاعفو عنا.