*الحب الأسير*
Doaa
(22)
❄❄❄❄
تلبدت الغيوم فـ السماء ونزل الثلج الابيض ليعانق مدينة نيويورك .. وفـ حي مانهاتن وفـ احد الفنادق الرائعه .. علت نغمة تلفونها وكانت المتصله ياسمين.
_بيااان .. ي م بتسألي مني .. عليك الله كيف نيويورك حلوه صح؟
_ياسمينة والله اشتقته ليك ياخ .. والله ياهو بس قاعده فـ البيت م بطلع.
_لي لي .. انا لو محلك كنت حأجي البيت زولة نوم بس.
اتنهدت بضيق وقالت : ياريت لو م سافرته ياخ.
_لي حببتي مالك؟ .. شهاب كويس معاك ؟
_كويس .. لكن المشكله انا .. م قادره اتقبلو .. والله ي ياسمين انا بحس روحي بخون عزوز .. كل م اقعد براي كد ببكي ب دموعي وبقول انا لي اتزوجته شهاب اخو عزوز.
_انتي هبله .. بالعكس عزوز والله حيكون فرحان ليكم لانكم اكتر اتنين بحبهم .. هو شهاب م اتكلم معاك ؟
_بس بقول لي نطلع وكد لكن انا بقول ليهو تعبانه واصلاً م بتكلم معاهو كتير .. هو اغلب الوقت بكون بره البيت معاهو عبد العزيز.
_حاولي اتكلمي معاهو وافهميهو.
_لالا م بقدر .. انا اتزوجتو عشان امي مريم وسلمى والباقين لكن انا م قادره اتقبلو والله م بكذب عليك.
_الكلام د م صح ي بيان.
_عايني برجع ليك هسي هو جا.
_طيب يلا.
بيان قفلت الخط وبعد مسافه جا داخل لابس جاكيت اسود وشايل عبد العزيز اللابس بلوفر ابيض وشعرو الكثيف نازل على جبهتو ب عشوائيه وارنبة انفو لونها احمر.
بيان بأستغراب : د مالو عامل كد؟
شهاب بضحك : عشان البرد شديد بره.
بيان وهي بتقيف : انومو بعد د لانو صحى بدري.
ومدت يدها عشان تشيلو لكن هو دفن راسو ف كتف شهاب.
شهاب : عايز الحوامه بس صح ؟
_غايتو الولد د.
_بنومو واجيبو ليك.
شهاب طلع وبيان دخلت المطبخ تعمل قهوه بسبب الصداع .. بعد عملتها قعدت فـ السفره .. مره تشرب ومره تسرح .. وم حست ب شهاب الجا داخل .. طقطق ليها بأصابعو وقال : طبيعي سرحانه انتي.
بيان رفعت عينها وتاني نزلتها ب سرعه و بابتسامة مصطنعه قالت : البيبي نام ؟
_رقدتو كد نام.
_الحمد لله طيب.
سكت مسافه بعدها قال : انتي كويسة ؟
بيان ضحكت بتوتر وقالت : اي .. اي كويسة.
_زي المضايقه .. وبتسرحي كتير وبتشربي قهوه كتير بسبب الصداع .. لو الفندق م مريح ممكن افتش مكان تاني.
بيان بأبتسامه مصطنعه : لالا والله .. ماف شي .. بس احتمال عشان ماف زول معانا وبزهج وكد.
_عندي صحبي اسمو إيدن .. خطيبتو قدرك كد بتكون .. ممكن نمشي ليهم عشان تتعرفي عليها.
_والله م نفسي اطلع.
_لالا لازم تتعرفي عليهم .. عشان تغيري جو شوية.
بيان بتردد : طيب.
_انا حأخش انوم .. تصبحي على خير.
_وانت من اهلو.
شهاب طلع وبيان غسلت فنجان القهوه وطلعت .. فتحت باب غرفة شهاب براحه ولقتو راقد وجنبو عبد العزيز .. قفلتو ودخلت غرفتها نامت.
___________________________
تركيا ..
فـ شقة جميلة وواسعه بتقع ف الدور التالت .. ريحة السمك والدخان انتشر ف المطبخ .. وصوت الدفاية مع صوت المطر البضرب الشباك كان عامل لحن جميل .. قعدو كلهم ف المطبخ بعد م رصت ليهم الشغاله الفلبينيه الاكل.
بلع اللقمه وقال : والله ي عمتي سوسن م حتتخيلي الليلة حصل شنو!
سوسن : ان شاء الله خير بس.
علي : الموضوع جاي من عبدو يكون فيهو خير كيف ؟
عبودي لـ سوسن : معليش ي عمتي بس انا عايش ف مجتمع حاقد شوية.
محمد : احكي خلي الكلام الكتير.
عبودي : المهم انا وعلي كنا ف الحديقه و.... حكى ليها الحصل وفـ النهايه ضحك وقال : لكن للأسف الشرطي ومعاهو اتنين تاني مسكونا ودفعونا الغرامه .. والله كل م اتذكر قروشنا الاديتها ليهم بقرب ابكي.
علي : انا حذرتك .. انا حمار البسمع كلام كلب منّو؟
سوسن : ي ولد انت م نصيح .. بتلعب مع صحبك انت ؟ .. ديل شرطه.
محمد : خليهو د طبيعي عامل مشاكل.
نورا (بت سوسن) : انا بحب الاكشن والحاجات الزي د والله.
عبودي : معاك مخرج افلام الاكشن زاتو😌.
علي : احكي ليها يوم اتشاكلنا مع الاولاد ديلاك.
عبودي صلح قعدتو وقال : احممم .. تعالي احكي ليك يلا.
سوسن : بعد الاكل م هسي.
علي وقف وقال : انا شبعته الحمد لله.
عبودي : انا زاتي شبعته.
نورا : ارح فـ البلكونة.
سوسن : انت ومحمد عايزين نحضر الاخبار .. نورا شيلي التحليه الفي التلاجه اقسمي لينا انا ومحمد وشيلي الباقي معاكم.
نورا : حاضر.
محمد : انتي ي نورا كبيره ماشاء الله عليك متخرجه وبتعملي الماستر بتتابعي ليك ناس زي ديل لي؟
نورا وهي بتفتح التلاجه وبتشيل التحليه : الزهج ي عمي .. والله لو م كد م كان عاينت ليهم زاتو.
علي : عليك الله عان البت د.
عبودي : بت تركيا متوقع منها شنو ؟
نورا قسمت التحليه فـ صحن وشالتو وقالت : نتكلم فـ البلكونة .. ارح يلا.
أنت تقرأ
الحب الأسير
Romanceللحياة دمعتان..دمعة لقاء و دمعة فراق..فإن لم تجمعنا الايام...فسوف تجمعنا الاحلام...فإن لم تجمعنا الاحلام...فسوف تجمعنا الذكريات وروعتها باللقاء...فاذا رست سفينتكِ على شاطئ الذكريات..... فأجعليني احد ركابها. لا تحكم على الروايه من اول بارتات ;)
