*في نهاية اليوم الدراسي*
*رسيل:* سيبي الشال بتاعي، سيبيه بقولك.
*ليلى:* حد يلبس شال في عز الحر، شيليه كدا.
*رسيل:* ملكيش دعوة بيا ابعدي عني.
*ليلى:* مش هسيبك لازم كلنا نعرف انتي مخبية إيه.
*رسيل:* ابعدي عنييي.
*ليلى:* لااا.
(وبالفعل سحبت من عليّا الشال بالعافية، وأنا وقعت على الأرض بكل ضعف قدام كل إلي كانوا واقفين بيتفرجوا على إلي بيحصل، كانوا مصدومين من إلي شافوه، كله اتفاجئ من شكل جسمي، كإنهم أول مرة يشوفوا حاجة زي كدا، حسيت ساعتها إني اتعرّيت قدامهم وإنهم بيشوفوا حاجة ميصحش يشوفوها، الكل وقف ساكت ومصدوم، أنا بس إلي خايفة، أنا بس إلي اتوجعت)
*رسيل:* مبسوطة دلوقتي؟ هاا؟
*ليلى:*.......
*رسيل:* ردي عليا مبسوطة دلوقتي؟
*ليلى:*.......
*رسيل بعياط:* صدقيني لا يمكن يجي يوم واغفرلك إلي عملتيه.
(أخدت شنطتي وجريت من قدامهم، حتى مرضتش أركب معاهم الباص وأخدتها جري لحد البيت)
___________________________________
*في الفصل*
*نادر:* ممكن أفهم ليه عملتي كدا؟
*ليلى:* صدقني أنا مكنتش أقصد.
*نادر:* مكنتيش تقصدي!! أومال كنتي تقصدي إيه؟ كنتي هتعملي إيه أكتر من إلي عملتيه؟
*بسنت:* ممكن أعرف انت عصبي ليه؟
*نادر:* بسنت؟ لسة فاكرة تظهري؟
*بسنت:* أنا موجودة علطول بس انت إلي مش بتاخد بالك.
*نادر:* أنا مستغرب برودك دا الحقيقة.
*بسنت:* عايزني أعمل إيه يعني؟
*ليلى:* الله! ما تقوليله الحقيقة، خايفة من إيه؟
*نادر:* حقيقة إيه؟
*بسنت:* سيبك منها دي بتخرّف.
*الباب خبّط*
*عمرو:* نادر هنا؟
*نادر:* أيوة أنا هنا أهو، في إيه؟
*عمرو:* أنا لقيت الشّال دا في الساحة تحت.
*ليلى:* دا الشّال بتاع رسيل.
*بسنت:* هاتي الزفت دا.
(كانت هتاخد الشّال من ليلى بالعافية ولكن نادر سبقها)
*نادر:* لأ دا هيفضل معايا، إلي زيك ميؤتمنش على أي حاجة.
*بسنت:* انت واخد عني فكرة وحشة أوي.
*نادر:* ياريتكو تحسوا بحجم الذنب إلي عملتوه.
___________________________________
*في البيت عند رسيل*
(وصلت قدام باب البيت وأنا بنهج وبعيط، بخبط عالباب بكل خوف خايفة حد من الجيران يشوفني كدا)
*رسيل:* افتحي.. افتحي يا ماما افتحي بسرعة.
(الباب اتفتح)
*سمر:* رسيل!!
(سبتها وجريت على أوضتي وقفلت الباب)
*سمر:* فيه إيه؟ إيه إلي حصل طيب؟ افتحي الباب يا رسيل.
(قومت فتحتلها الباب وقعدت أعيط بانهيار شديد، أخدتني في حضنها وطبطبت عليا)
*سمر:* بتعيطي كدا ليه بس قوليلي؟ حد دايقك في المدرسة؟
*رسيل بعياط:* متجبليش سيرة المدرسة، أنا مش عدت هروح المدرسة دي تاني.
*سمر:* طب خلاص معلش معلش، بطلي عياط يا روحي خلاص اهدي بقا.
(هديت بسرعة في حضن ماما، كنت عايزة أقولها إني مش عايزة أخرج منه تاني، العالم برة وحش وبيتكابر على بنت صغيرة زيي، أنا معرفش لا طعم الفرحة ولا الراحة في وجود الناس دي، كل إلي بحس بيه الخوف والقلق من إنهم يكتشفوا حقيقتي، ويكتشوا السر إلي قعدت أخبّي فيه سنين، معرفش ساعتها هواجه العالم إزاي، للأسف كانت لحظة محتومة ملحقتش أعمل حسابها)
*بعد وقت قليل*
*سمر:* هديتي؟
*رسيل:* اه.
*سمر:* بقيتي كويسة؟
*رسيل:* لسة شوية.
*سمر:* طب إيه رأيك لما أجيبلك تتغدي؟
*رسيل:* مليش نفس.
*سمر:* دا ناجتس والبطاطس المحمرة إلي بتحبيها على فكرة؟
*رسيل ببراءة:* في كاتشب؟
*سمر:* اه.
*رسيل:* طب متخصلهوش من غيري.
___________________________________
*عمرو:* هنعمل إيه؟
*نادر:* مش عارف، أنا متعصب أوي من إلي حصل.
*عمرو:* تيجي نروحلها؟
*نادر:* هنروح لها إزاي ياعم! لا طبعًا مينفعش.
*عمرو:* أومال هنعمل إيه؟
*رنا:* أنا هقولكم نعمل إيه..
___________________________________
*في البيت عند رسيل*
*رسيل:* بس يا ماما دا إلي حصل.
*سمر:* متزعليش نفسك حقك عليا أنا.
*رسيل بحزن:* أنا مش عايزة أروح المدرسة دي تاني.
*سمر:* صدقيني هنشوف حل سوا.
(ماما علطول بتأكدلي إنها أطيب حد في الدنيا، هي الركن الهادي إلي برمي فيه كل مشاكلي وهي إلي بتديني الحب والحنيّة طول الوقت، وبسببها ولا مرة زعلي كبر ولا حتى أخد وقت طويل، كل حاجة وحشة بتنتهي في وجودها)
*سمر:* عملتي الواجب؟
*رسيل:* ليه كدا أنا لسة كنت بشكّر فيكي.
*سمر:* قدامي يا توحفة نعمله سوا.
(جرس الباب رن وكالعادة أول ما بسمعه بجري على أوضتي عشان محدش يشوفني، ماما إلي بتروح تفتح الباب)
_ السلام عليكم.
*سمر:* وعليكم السلام ورحمة الله، مين حضرتك؟
*استنونا البارت الجااي🌚😁*
أنت تقرأ
روتيڤال🌑♥️
Lãng mạn"السلام عليكم ورحمة الله وبركاته" ممكن قبل ما نبدأ نستغفر مع بعض بنية الفرج.. يلا نقول مع بعض: 🧡أستغفر الله العظيم رب العرش العظيم واتوب اليه🧡" ______________________________________ يلا نقول "بسم الله".. "لازم كلنا نبقى عارفين حاجة مهمة أوي، وهي...
