روتيڤال🌑♥️

البارت التاسع..(9)

*سمر:* ها يا حبيبتي عملتي إيه؟
*رسيل:* الحمد لله يا ماما الامتحان كان فيه تكّات بسيطة كدا بس حليت.
*بسنت:* الامتحان كان كويس جدًا على فكرة انتي بس إلي مكونتيش بتذاكري كويس.
*رسيل:*..........
*سمر:* حتى لو أختك كانت لا سمح الله ما ذاكرتش كويس فهي بذلت جهدها كله، وإن شاء الله تكون حلّت كويس جدًا كمان.
*ليلى:* طنط سمر عندها حق يا رسيل وصدقيني أيّا كانت النتيجة كلنا هنكون فخورين بيكي.
*سمر:* اااه يا حبيبتي اعذريني والله نسيت أسألك انتي كمان عملتي إيه؟
*ليلى:* الحمد لله يا طنط حليت كويس جدًا.
*سمر:* الحمد لله يا حبيبتي يارب دايمًا يارب.
__________________________________
(رنا خلصت امتحانها وطلعت تجري على مدرسة الثانوي عشان تلحق نادر قبل ما يمشي، وأول ما دخلت لقت كريم في وشها)
*رنا:* هاي يا كريم.
*كريم:* هاي يا رنا، عملتي إيه في الامتحان؟
*رنا:* الحمد لله حليت كويس، أومال عمرو فين؟
*كريم:* عمرو جوا بيلم حاجته.
*رنا:* ونادر معاه؟
*كريم:* لأ نادر خلص ومشي من بدري.
(أول ما كريم قال كدا رنا سابته وجريت على تحت تدور على رسيل، لأنها لو لقتها أكيد هتلاقي نادر، وبالفعل شافتهم واقفين سوا قدام البوابة الرئيسية، فقررت تروحلهم)
*رنا:* طنط سمررر!!! إزي حضرتك يا طنط؟ وحشتيني أوي أوي.
*سمر:* إزيك انتي يا حبيبتي عاملة إيه؟ وعملتي إيه في الامتحان صحيح؟؟
*رنا:* الحمد لله كويسة يا طنط وحليت كويس جدا جدا في الامتحان.
(حسيت وقتها بالزعل والإحباط الشديد في نفسي، كلهم بمختلف المراحل ومع ذلك كلهم حلّو وجاوبوا كويس ومبسوطين، وأنا بس إلي خايفة ومتوترة)
*رنا:* إيه يا رسيل مالك؟
*رسيل:*.......
*رنا:* إنتي لابسة كمامة ليه؟ هو إنتي عندك برد؟
*سمر:* لا لا يا حبيبتي هي معندهاش برد ولا حاجة.
*رنا:* أومال لابسة كمامة ليه؟
(حسّت بسنت إن دي فرصتها تخلي نادر يقرف من رسيل فردّت هي على سؤال رنا)
*بسنت:* طلعلها بقعة في وشها فبتخبيها، بقا شكلها غريب أوي.
(خوفت واتصدمت جدًا من رد بسنت، ليه كدا!!! ليه توجعيني كداا؟!!)
*سمر بعصبية:* بسنت!! اسكتي أفضل.
*رنا بتصنّع:* يا خبر!! معلش معلش.
*رسيل:* ماما ممكن نمشي؟
*سمر:* حاضر يا حبيبتي، يلا.
*بسنت:* أنا مش جاية معاكي.
*سمر بعصبية:* قدامي يا بسنت يلا!!
(اتدايقت بسنت من عصبية ماما عليها وسابتنا ومشيت قدامنا في طريقها للبيت، شوية وليلى جريت علينا ولحقتنا)
*ليلى:* طنط سمر، ممكن أستأذن حاجة؟
*سمر:* اه يا حبيبتي اتفضلي، عايزة إيه؟
*ليلى:* ينفع أستأذن بابا وآجي أزور رسيل؟؟
*سمر:* تنوري طبعًا يا حبيبتي، بس ممكن نأجلها بعد الامتحانات؟
*ليلى بفرحة:* أكيد.
___________________________________
*رنا:* هو انت ساكت من أول ما شفتني ليه؟
*نادر:*........
*رنا:* الاه! مش بترد عليا ليه يا نادر؟
(عمرو جه من وراهم ورد عليها)
*عمرو:* طبعًا بسبب إلي إنتي عملتيه الصبح في الباص.. تؤ تؤ اخس يا رنا بجد!
*رنا:* عامةً أنا مكدبتش أنا قلت الحقيقة، أنا بحب أكون صريحة.
(قرب منها نادر بكل هدوء وكلمها بصوت هادي وقالها:
*نادر:* في فرق كبير بين الصراحة.. والوقاحة.
*رنا:* أيوة بس أنا مش وقحة يا نادر، أنا...
*نادر:* إنتي إيه؟
*رنا:* أنا... أنا بس... يعني..
*عمرو:* رنا.. روحي عالبيت.
*رنا:* مش هتيجي معايا طيب؟!
*عمرو:* لأ، يلا امشي واقفة كدا ليه!
*رنا:* ح..حاضر.
___________________________________
*ليلى بحماس:* بابا يا باابا، إزيك؟
*جلال:* اممم أنا كويس والله يا لولو ولكن..
*ليلى:* ولكن إيه بقا؟
(مسكها من ودانها)
*جلال:* مش انتي عارفة إني واقف مستنيكي برة، اتأخرتي ليه بقا؟
*ليلى:* أنا مبسوطة أوي أوي يا بابا، تخيل..
*جلال:* أيوة؟!
*ليلى بفرحة:* رسيل سامحتني وطنط سمر مامتها وافقت إني أزورها بعد الامتحانات.
*جلال:*!!!!!!!!
*ليلى:* بابا.. في إيه؟
*جلال:* افتكرتك هتقوليلي حليت كويس في الامتحان مثلّا، داا مثلّا يعني!
*ليلى:* منا حليت كويس والله.
*جلال بتريقة:* بيجاااد؟؟
*ليلى:* اه والله يا والدي، هو أحمد فين صحيح؟
*جلال:* مش هقولك إنه راح يجيب شيبسي عشان متروحيش وراه.
*ليلى:* طب شكرًا جدًا، هروح أجيب شيبسي.
___________________________________
*في البيت عند رسيل*
*سمر:* تسنيم.. تعالي هنا عاوزاكي.
*تسنيم:* نعم يا ماما.
*سمر:* أنا سبتك لحد ما وصلنا البيت وبقينا لوحدنا، وهقولك قراري إلي أخدته، وهتنفذيه بالحرف الواحد، وإن مسمعتيش كلامي هتتعاقبي.
*تسنيم:* قرار إيه؟
*سمر:* هقولك يا ستي قرار إيه، اسمعي بقا..
(حابين تعرفوا قرار إيه؟! يبقى المرة الجاية إن شاء الله)

*استنونا البارت الجااي🌚😁*