روتيڤال🌑♥️

البارت السابع..(7)

*أول يوم امتحان*
*سمر:* جاهزين للامتحان يا بنات؟
*بسنت و رسيل:* آه يا ماما.
*سمر:* طيب يلا يا بسنت انزلي الباص جه وواقف تحت.
*بسنت:* إيه دا هي رسيل مش هتنزل معايا؟
*سمر:* لأ أنا هجيبها وآجي قبل الامتحان علطول.
*بسنت:* اشمعنا بقا؟
*سمر:* ملكيش دعوة يا بسنت لو عايزة تفضلي معانا براحتك عايزة تسبقي براحتك بردو.
*بسنت:* لا وعلى إيه أنا هسبق أنا.
*سمر:* ماشي ربنا معاكي، خدي بالك من نفسك يا بوسبوس.
*بسنت:* حاضر يا ماما.. باي.
__________________________________
*في باص المدرسة*
(وصل الباص قدام بيت عمرو ورنا وعمرو راح قعد جنب نادر إلي كان مستنيه، ورنا قعدت وراهم علطول بحيث تكون قريبة من نادر)
*عمرو:* صباح الخير يا صاحبي.
*نادر:* صباح النور يا عم، مستعد للامتحان إن شاء الله؟
*عمرو:* إيه السؤال العبيط دا؟ جاي قبل الإمتحان بساعتين تسالني سؤال عبيط زي دا، لأ طبعًا مش مستعد!
*نادر:* يخربيتك، ماحنا مراجعين امبارح يجي ٧ مرات!!!
*عمرو:* أنا قلتلك ميت مرة أنا مش عايز أدخل أدبي عشان مبحبش الحفظ الكتير وانت إلي أصريت.
*نادر:* يعني كنت هتحل كويس في علمي؟!
*عمرو:* لأ طبعًا إيه الهبل دا؟! مانت عارف إني مبفهمش!
*نادر:* يعجبني فيك صراحتك.
*عمرو بانشكاح:* شكرًا شكرًا كفاية.
(وصل الباص قدام بيت بسنت ورسيل وكان نادر متحمس جدًا بإنه يشوف رسيل لأن عدّا أكتر من شهر ونص مشافهاش، ولكن اتحولت مشاعره بسرعة للحزن والإحباط لما شاف بسنت بس إلي طلعت والباب اتقفل وراها)
(من ناحية تانية بسنت كانت بتدور بعنيها على نادر ولكن اتدايقت جدًا لما لقت عمرو قاعد جنبه، فقررت تقعد جنب رنا وراهم لأنه أقرب مكان لنادر)
*بسنت:* إزيك يا نادر؟
*نادر بجفاف:* الحمد لله كويس.
*بسنت:* مستعد للامتحان النهاردة؟
*نادر:* اه إن شاء الله.
(قرب نادر من عمرو وقاله بصوت واطي:
*نادر:* اسألها رسيل مجتش ليه؟
*عمرو:* واسألها ليه ياعم ما تسألها انت.
*نادر:* اسألها وهذاكر معاك المادة الجاية "جغرافيا".
*عمرو:* بس لو مكونتش تحلف.
*نادر:* مين إلي حلف بس استنى.....
*عمرو:* هوووش.. ولد عيب خلاص انت وعدتني.
*نادر بغيظ:* حاضر يا عمرو.. حاااضر.
(وطبعًا عمرو قرر يستخدم ذكاؤه في السؤال "بس ياريته ما استخدمه الحقيقة")
*عمرو:* بسنت هي رسيل مش هتيجي الامتحان ولا إيه؟
*بسنت:* لأ هتيجي طبعًا، بتسأل ليه؟
*عمرو:* لأ نادر إلي كان بيسأل عادي مش أنا.
*نادر بصدمة:* يخربيتك!!!
(طبعًا رنا وبسنت اتدايقوا جدًا واتملكت منهم الغيرة من رسيل بسبب اهتمام نادر بيها ولكن رنا مقدرتش تسيطر على عصبيتها)
*رنا:* وبتسأل عليها ليه بقا؟! انت حتى مكلفتش خاطرك تقولي صباح الخير حتى، وبتسأل على واحدة معاقة زي رسيل!!
(الكل اتصدم من طريقة كلام رنا وتصرفها، لكن نادر ما أظهرش أي اهتمام بكلامها، لإنه كان مستني رد فعل بسنت على الكلام إلي اتقال عن اختها، ولكن رد فعل بسنت كان كالآتي:
*بسنت:* على رأيك بجد أنا مش عارفة أنتو مهتمين بيها كدا ليه؟
(كانوا وصلوا قدام بوابة المدرسة، قام نادر من مكانه وبص لبسنت نظرة سخرية واستحقار وقرّب منها بهدوء وقالها:
*نادر:* للأسف كنت مستني منك رد فعل محترم، سلام.
(زعلت جدًا من طريقته وأسلوبه معاها وتعليقه على كلامها، ودا اتسبب في كرهها من أختها أكتر، في الجانب التاني رنا كانت مبسوطة من تصرف نادر ناحية بسنت ولكن في نفس الوقت كانت خايفة من عمرو أخوها، لأنه كان متدايق منها بسبب كلامها السيء عن رسيل، واتوعدلها بالشر عن طريق نظرات الغضب إلي ظهرت على وشه.)
__________________________________
*في البيت عند رسيل*
*سمر:* يلا يا رسيل.. معدش إلّا نص ساعة بس عالامتحان.
*رسيل بخوف:* ممكن نستنى كمان شوية؟
*سمر:* لأ يا رسيل يدوب المشوار، لسة عمّا نلاقي مواصلات.
*رسيل:* بس أنا لسة مش مستعدة خالص وخايفة.. أنا خايفة أوي.  
(قربت عليّا بكل هدوء وحضنتني جامد، ساعتها أنا هديت خالص وارتحت، كنت عايزة الزمن يقف بينا شوية، لسة عايزة استمد طاقتي من ماما أكتر من كدا بكتير، أكتر من اللازم، آمان كفاية لوقت كبير قدام)
*سمر:* طول ما ماما جانبك متخافيش من حاجة، لازم نحب ونرضى بنعم ربنا علينا، ونرضا بقدرنا ونصيبنا عشان ربنا يراضينا بعد كدا بالأحسن، اتفقنا؟
*رسيل:* اتفقنا.
*سمر:* يلا بينا؟
(مسكت إيدي بإيد ماما و رديت عليه وأنا قلبي مرتاح ومطمئن)
*رسيل:* يلا بينا.
___________________________________
*في مدرسة الثانوي عند عمرو ونادر*
*نادر:* فاضل قد إيه عالامتحان؟
*عمرو:* ١٠ دقايق تقريبًا.
*نادر بتوتر:* وإزاي رسيل مجتش لحد دلوقتي؟؟؟
*عمرو:* مش عارف والله انت بتزعق في وشي ليه ياعم!
(فضل نادر متدايق ومتوتر وخاف لتكون رسيل بتخطط متجيش الامتحان، بس سرعان ما كريم زميلهم جه من وراه وقالوا:
*كريم:* بسس.. عم نادر.
*نادر:* فيه إيه؟
*كريم:* بدل مانت رايح جاي كدا روح أقعد مكانك يمكن تلاقي إلي بتدور عليه.
*نادر:* ياعم بقا مش ناقصة هزار عالصب... الشبّاك!!!! أيوة صح صح انت معاك حق، شكرًا جدًا شكرًا يا صاحبي.
(مستناش يسمع رد كريم وجري قعد مكانه جنب الشبّاك إلي بيطل على البوابة الرئيسية ومن هناك هيعرف بقا إذا بسنت جت أو لأ)
__________________________________
*رسيل:* ماما أنا خايفة أوي.
*سمر:* لأ يا حبيبتي متخافيش، البسي الماسك بس وادخلي على امتحانك علطول وأول ما تخلصي هتلاقيني واقفة برة هنا مستنياكي، اتفقنا؟
*رسيل:* حاضر.
(كنّا قريبين من المدرسة وقبل ما أوصل علطول لقيت صوت من ورايا بينادي ويقول:..)
_رسيل.. استني يا رسيل.

(تفتكروا مين كان بينادي عليّا؟؟)

*استنونا البارت الجااي🌚😁*