روتيڤال🌑♥️

البارت الثامن..(8)

*نادر بخضة:* عمرو.. يا عمرو.. انت يا أخي!!
*عمرو:* إيه بس فيه إيه؟؟
*نادر:* جت.. جت أهه، رسيل جت!
*عمرو:* وبعدين؟؟
*نادر:* ولا قبلين.. يا بايخ (وراح ضربه على قفاه) "مهزق أوي عمورة دا!!"
*المراقب:* يلا يا جماعة أوراق الامتحان وصلت، كله يقعد مكانه لو سمحتم.
*عمرو:* شد حيلك، ربنا معانا إن شاء الله.
*نادر:* يلا توكلنا على الله.
__________________________________
*رسيل:* نعم، عايزة إيه؟
*ليلى:* ممكن أدخل معاكي؟
*رسيل:* لأ أنا هدخل لوحدي.
*سمر:* مين دي يا رسيل؟
*رسيل:* دي ليلى يا ماما إلي سحبت الشّال من عليّا.
*ليلى:* والله يا طنط أنا آسفة والله ما كنت أقصد حقيقي أنا كنت بهزر معاها بس أنا إلي بالغت شوية أنا آسفة والله.
*سمر:* طب خلاص خلاااص حصل خير والله.
*رسيل بصدمة:* ماااماااا.
*ليلى بحزن:* ممكن تديني فرصة واحدة طيب أنا آسفة بجد!
(بصيت لماما علشان أشوفها هتوحيلي إيه بنظراتها، ولكن لقيتها بتبصلي بابتسامة رقيقة على وشّها، ودا معناه إنها عايزاني أتعامل بالحسنى أيّا كان الوضع، مفيش حاجة تستاهل نزعل من حد بيها، في النهاية مفيش حاجة عند ربنا بتضيع.. ونِعم بالله)
*رسيل:* يلا ندخل علشان الامتحان ابتدى.
*ليلى بفرحة:* حاضر يلا بينا.
(دخلنا من البوابة الرئيسية وأول حاجة عيني وقعت عليها المدرسة الثانوية، كان في واحد واقف في الشبّاك فوق، تقريبًا بيبصلي، بيبصلي ليه دا؟ شكله مستغرب شكلي وأنا بالمنظر الغريب دا، لابسة شال وكمامة وجوانتي ولا كإني في الاسكيمو)
___________________________________
*بسنت:* ممكن أسألك سؤال محيرني؟
*رنا:* اتفضلي، عايزة إيه؟
*بسنت:* إنتي ليه متدايقة من أختي؟
*رنا:* أختك! اختك ااه، بسنت بلاش الشوية دول عليا إنتي مبتحبيش أختك أصلًا وبتدايقي لما حد يقول أختك.
*بسنت:* مش هجادلك لأن دا حقيقي، أنا بس عايزة اعرف منين كنتي عندها من فترة وبتواسيها على إلي ليلى عملته، ومنين مش طايقة سيرتها دلوقتي؟
*رنا:* أولًا ملكيش دعوة، ثانيًا أحب أقولك إن كلنا عارفين إن إنتي إلي قلتي ل ليلى تعمل كدا فالذنب في الأصل ذنبك إنتي.
(بصتلها بسنت باحتقار شديد وكانت على وشك إنها ترد عليها ولكن لفت أنظارها دخول ليلى ورسيل اللجنة سوا، وكذلك استغرب الجميع من ولاد وبنات لأنهم فاكرين الموقف إلي تسبب في تغيّب رسيل عن الحضور للمدرسة فترة طويل ودا كان بسبب ليلى)
*المراقب:* يلا يا شباب يلا يا حلوين كله يقعد مكانه، كله يستعد خلاص كدا، الامتحان وصل والوقت بدأ)
___________________________________
*بعد مرور ساعتين*
(وصل جلال وأحمد قدام بوابة المدرسة مستنيين خروج ليلى من الامتحان، وتصادف وجوده في نفس مكان سمر إلي كانت مستنية رسيل بردو، حب جلال إنه يتكلّم مع سمر لحد ما البنات يخرجوا)
*جلال:* السلام عليكم.
*سمر:* وعليكم السلام ورحمة الله وبركاته.
*جلال:* معلش أنا آسف لو بزعج حضرتك بس كنت عايز أسأل عن الساعة بس.
*أحمد بتلقائية:* مانت في إيدك ساعة يا بابا.
*سمر:*!!!!!!
(حس جلال بالحرج الشديد ولكنه أنقذ الموقف بردّه السريع)
*جلال:* أنا آسف جدًا أنا لسة بلبس الساعات جديد فنسيت إني لابس واحدة.
*سمر:* ولا يهم حضرتك.
___________________________________
*نادر:* أنا خلصت، أقدر أسلّم ورقتي؟
*المراقب:* ااه اتفضل هات ورقتك وتعالى.
(راح نادر وهو متوتر جامد وسلّم ورقته ووقّع عالاستمارة ونزل جري على أساس يقف عند الباب عشان يشوف رسيل وهي خارجة من الامتحان، ولكن تصادف إن سمر مامتها شافته، فندهت عليه، حس نادر وقتها إن دي فرصة ليه وإنه بكدا يقدر يكلم رسيل عادي)
*سمر:* إزيك يا نادر عامل إيه؟
*نادر:* الحمد لله كويس يا طنط، إزي حضرتك وإزي رسيل دلوقتي؟
*سمر:* الحمد لله كويسين والله.
(لسة كانوا بيتكلموا لقوا بسنت وراهم)
*بسنت:* ماما!
*سمر:* بسنت إزيك؟ عملتي إيه في الامتحان؟
*بسنت:* الحمد لله كان كويس جدًا.
*سمر:* طب اختك فين؟ مستنتهاش ليه؟
*بسنت:* وأنا مالي يا ماما أنا خلصت فخرجت وهي لمّا تخلص هتخرج، المهم انت عملت إيه في الامتحان يا نادر؟
*نادر بجفاف:* كويس الحمد لله.
*بسنت:* طب واقف مستني مين؟
*سمر:* ما يقف براحته يا بنتي، الله!
*نادر:* عمرو عشان هنروح السنتر سوا.
(إجابة نادر كانت منطقية إلى حد ما، ولكن بسنت شكّت فيه وقالت في نفسها إنه أكيد مستني رسيل، قررت وقتها إنها هتفضل معاهم عشان تعرف المواجهة بينهم هتكون شكلها عامل إزاي)
____________________________________
*ليلى بصوت واطي:* خلصتي؟
*رسيل:* ااه.
*ليلى:* طب يلا.
(روحنا أنا وليلى سلمنا ورقنا سوا وخرجنا مع بعض)
*رسيل:* لمّا إنتي مخلصة من بدري مخرجتيش ليه؟
*ليلى:* كنت عايزة استناكي عشان نمشي سوا.
*رسيل:* بس أنا مامتي مستنياني برة.
*ليلى:* اي دا بيجاد؟
*رسيل:* ااه.
*ليلى:* تعرفي فين المشكلة؟
*رسيل:* فين؟
*ليلى:* إن أنا كمان بابايا مستنيني برة.
___________________________________
*أحمد:* هي ليلى اتأخرت كدا ليه يا بابا؟
*جلال:* مش عارف بس إن شاء الله هتطلع دلوقتي.
*أحمد:* ممكن تكون خلصت وواقفة مع صحابها جوا؟
*جلال:* لأ المفروض إنّها عارفة إننا مستنيينها برة.
*أحمد:* بابا يا بابا بص، أهي جت أهه.
*جلال:* فين يا أحمد؟
*أحمد:* أهه يا بابا جاية مع رسيل هناك أهه.
*جلال:* رسيل!!!

*استنونا البارت الجااي🌚😁*