روتيڤال🌑♥️

البارت الرابع..(4)

*في البيت عند جلال*
*ليلى:* أيوة يا بابا، حضرتك عايزني؟
*جلال:* فينك يا حبيبة بابا مجيتيش تقعدي معايا زي عوايدك ليه؟
*ليلى:* أنا آسفة كان عندي مشكلة بس وقعدت أفكر في حل ليها.
*جلال:* و وصلتي لحل؟
*ليلى بحزن:* لأ.. لسة.
*جلال:* طب ما تحكيلي يمكن أساعدك وأفكر معاكي.
*ليلى:* موافقة.
*جلال:* يلا، أنا سامعك.
__________________________________
*في البيت عند رسيل:*
*رسيل:* ماما.. أنا خلصت مذاكرة وهدخل أنام.
*سمر:* ماشي يا حبيبتي، تصبحي على خير.
(كنت عايزة أقول حاجة بس مكونتش عارفة أقولها إزاي، ولكن من كرم ربنا.. ماما قفشتني)
*سمر:* عايزة تقولي حاجة صح؟
(هزيت راسي بمعنى أيوة)
*سمر:* تعالي اقعدي، ها بقا في إيه؟
*رسيل:* بصراحة أنا نفسي أجيب تليفون.
*سمر:* تليفون؟
*رسيل:* اه، بصراحة أنا نفسي أجيب واحد عشان أبقى أكلم صحابي وكدا وعايزة ألعب عليه وأتصور... إلخ.
*سمر:* بس عشان أجيبلك لازم أجيب لأختك بردو، وبصراحة المزانية صعبة اليومين دول.  
*رسيل:* مهو أنا كنت عايزة أقول يعني إني هحوش أي فلوس أخدها فوق إلي أنا محوشاه، وبكدا تبقى نص المشكلة اتحلت.
*سمر:* طب عندي فكرة.
*رسيل:* إيه هي؟
*سمر:* بلاش نفكر في الموضوع دا السنادي عشان عايزين مجموع كبير عشان تدخلوا ثانوي، ومتنسيش بردو انكم في مدرسة انترناشونال "مدرسة لغات" يعني محتاجين مجهود كبير.
*رسيل بإحباط:* حاضر يا ماما.
*سمر:* وعد مني لو جبتوا نِمَر حلوة هجيبلكم كل واحدة تليفون جديد، وهيكون إصدار جديد كمان مش هجيبلكم حاجة قديمة.
*رسيل بفرحة:* بجد؟؟ أنا مبسوطة أوي أوي، أوعدك هذاكر كويس.
*سمر:* طب يلا روحي نامي بقا.
*رسيل:* بووونوووييييه.
__________________________________
*عمرو:* اااه ضهري بيوجعي أوي ااااه، هعيط.
(مامته طنط جيهان ورنا أخته قعدوا يضحكو عليه) 
*عمرو:* منك لله يا نادر منك لله والله، شمّت العيلة فيا، أشوف فيك يوووم اااااه.
*جيهان:* خلصت صياح؟
*عمرو:* يا أمي ابنك مضروب خلوا في شوية شفقة على حاله.
*رنا:* ماهو انت إلي بتسيبه يضربك عارف ليه؟
*عمرو:* ليه.
*رنا:* العب باليه.. ويك ويك ويييك.
*عمرو:* أمي شيلي البنت دي من قدامي بدل ما هقوم أضربها.
*جيهان:* اتوكس دا انت مش عارف تتكلم.
(عمرو: شوفتوا أمي بتحبني إزاي؟)
*جيهان:* أنا هقوم أعملكم لقمة تاكلوها.
(وقامت وراحت المطبخ وفضلوا رنا وعمرو لوحدهم)
*رنا:* أخويا حبيبي.
*عمرو:* يا نعم!
*رنا:* عمورة قلب أختك من جوا.
*عمرو:* مش متفائل، قولي علطول.
*رنا:* انت كنت مع نادر النهاردة صح؟
*عمرو:* أيوة كالعادة يعني، خير؟
*رنا:* طب اتكلمتوا في إيه؟ حكيتوا في إيه؟
*عمرو:* انتي حشرية موت انت مالك ومالنا؟!
*رنا:* يا عم انجز بقا.
*عمرو:* مفيش يا رنا هو إحنا عندنا إيه نتكلم فيه غير المذاكرة والأكل واللعب ورسيل.
*رنا:* رسيل؟ وبتتكلموا عن رسيل ليه؟
*عمرو:* مفيش يا رنا عادي يعني مانتي عارفة إنه فضولي ناحيتها شوية.
*رنا:* كدا.. طب ماشي.
(ادايقت رنا جدًا من اهتمام نادر برسيل، وبدأت تغير فكرتها عنها)
__________________________________
(كنت فرحانة جدًا بسبب لما ماما قالت إنها هتجيبلي تليفون ويبقى معايا واحد زي ما كل زمايلي عندهم، وقررت إني هنظم وقتي بعد كدا عشان أذاكر أكتر وأحقق اتفاقي مع ماما، وقبل ما أنام فكرت أروح لبسنت عشان أقولها إلي حصل، يمكن دا يفرحها بردو وأبقى أنا السبب وتفتكرهالي)
*رسيل:* بسنت إنتي لسة صاحية؟
*بسنت:*.......
*رسيل:* كنت جاية أقولك حاجة حلوة تفرحك، ممكن أدخل؟
*بسنت:* ممكن تروحي على أوضتك؟ أنا مش عايزة أتكلم معاكي.
*رسيل:* طب هختصرلك الموضوع وأمشي علطول.
*بسنت:*......
*رسيل:* ماما اتفقت معايا إن لو احنا جبنا مجموع عالي السنادي هتجيبلنا تليفونات جديدة، تصبحي على خير.
(وقفت شوية أشوف رد فعلها على الكلام قبل ما أمشي، بس هي فضلت مدياني ضهرها ومردتش عليا، الحقيقة أنا زعلت بس أنا مفيش حاجة تاني أقدر اعملها، بس إلي حصل إن الزعل ملحقش يهوب نحيتي، ودا بسبب فكرتي الجميلة إلي فكرت فيها وهبدأ في تنفيذها من بكرة، تفتكروا إيه هي؟؟)

*استنونا البارت الجااي🌚😁*