روتيڤال🌑♥️

البارت الثامن عشر..(18)

*في بيت جلال*
*ليلى:* بابا إيه رأيك في فستاني؟
*جلال:* قمر بسم الله ماشاء الله.
*أحمد:* وأنا يا بابا إيه رأيك في بدلتي؟
*جلال:* إيه ياعم الشياكة دي!!
*أحمد:* راجل داخل الإعدادية بقا وكدا.
*جلال:* طبعًا يا حبيبي ربنا يوفقك يارب، روح البس شرابك وجزمتك عمّا أخلص أنا كمان.
*أحمد:* ماشي.
*جلال:* إلّا قوليلي يا ليلى، هي طنط والدة بسنت ورسيل جاية الحفلة؟
*ليلى:* اه يا بابا، لما كنت عند ليلى أول امبارح طنط قالتلي إنها هتيجي.
*جلال:* تمام أوي.
*ليلى:*...........
*جلال:* بصي كدا إيه رأيك في شكلي؟
*ليلى:* جميل أوي يا بابا.
*جلال:* كدا كلنا جاهزين؟
*ليلى:* أيوة يا بابا.
*جلال:* يلا بينا، توكلنا على الله.
__________________________________
*في بيت عمرو*
*عمرو:* إيه رأيك يا أمي أنفع عريس؟
*جيهان:* طبعًا يا حبيبي، الله أكبر عليك.
*رنا بصوت واطي:* هه القرد في عين أمه غزال.
(ولكن جيهان مامتها سمعتها)
*جيهان:* والله انتي إلي قردة، في حد يقول على أخوه الكبير كدا!، عيب.
*رنا:* أنا آسفة يا ماما.
*عمرو:* بعيدًا عن أي حاجة، انتي قمر النهاردة.
*رنا بفرحة:* بجد والله؟
*عمرو:* ااه عروسة داخلة الثانوي ماشاء الله.
*رنا:* شكرًا أوي أوي.
*عمرو:* يلا يا امي جاهزة؟
*جيهان:* اه يا حبيبي يلا.
*عمرو:* توكلنا على الله.
__________________________________
*في ساحة المدرسة*
(دخلت أنا وماما وبسنت، انبهرنا بشكل الحفلة، كانت حفلة كبيرة وشكلها حلو جدًا، كانوا مشغلين أغاني النجاح والتفوق، وكانت كل البنات لابسين فساتين وكلهم شكلهم حلو، حلوين أوي، والولاد لابسين بِدَل بردو وبعضهم لابس كاجوال ولايق جدًا عليهم، بسنت شافت صحابها فاستأذنت ماما تروحلهم وماما وافقت، إنما أنا قعدت على طرابيزة كانت موجودة ورا في الركن، محاولة مني اتجنب عيون الناس، وماما التقت بالمدرسين فراحت تسلم عليهم، وبكدا.. أنا قاعدة لوحدي.
__________________________________
*كريم:* ياعم انجز بقا حيرتني معاك.
*نادر:* طوّل بالك بس شوية كمان.
*كريم:* يا فتاح ياعليم يارزاق ياكريم عالصبح.
*نادر:* هاا بقا، إيه رأيك؟
*كريم:* حلوة أوي.. قمر اربعتاشر باخواتي.
*نادر:* لأ لأ بردو مش مقتنع، البدلة إلي متعلقة دي أحسن لحظة هدخل أجربها.
(وكان لسة هيتحرك لقا كريم ماسكه من قفاه وبيزعقله)
*كريم:* نادر يا ابن أم نادر، دي المرة السبعتلاف إلي تغير فيها هدومك ومش هسمحلك للمرة السبعتلاف وواحد، وعلى فكرة أصلًا انت مكونتش ناوي تيجي امبارح، إيه إلي حصل بقا؟؟؟؟
*نادر:* لأ مفيش بس امي ضغطت عليا امبارح أروح.
*كريم:* هو انت عمرك أصلًا سمعت كلام الست الوالدة؟!
*نادر:*............
*كريم:* انت غيرت رأيك لما عمرو جاب سيرة البنات، ف من الآخر كدا تقولي انت رايح عشان مين فيهم.
*نادر:* الحقيقة.... لأ ياعم بطّل هزار.
*كريم:* ياعم ولا يهمك.. أوعى تكون حاطت عينك على بسنت!!
*نادر:* إي دا اشمعنا بسنت؟
*كريم:* عشان هي أجمل واحدة في البنات إلي بنتعامل معاهم تقريبًا.
*نادر:* لأ وبعدين أصلًا أنا عمري ما شفتها جميلة عادي يعني عادية زي كل البنات.
*كريم:* يبقى رنا صاحبة عمرو!
*نادر:* إذا كان أخوها نفسه مش طايقها.. جرا إيه ياعم كريم.
*كريم:* أيوة أيوة عندك حق، البنت عنيفة أوي بصراحة.
*نادر:* طب يلا كفاية بقا عشان نلحق نروح.
*كريم:* ماشي يلا بينا.
__________________________________
(عمرو ورنا ومامتهم وصلوا الحفلة، وخلال ماكان عمرو بيسلم على أصحابه وزمايله شاف رسيل وهي قاعدة ورا على طرابيزة لوحدها، انبهر بيها لأجل إنها اختارت تعيش من خلال مظهرها، كان شايفها حلوة بطبيعتها، لابسة فستان هادي، وتسريحة شعرها جميلة، وكان سعيد لأنها اختارت تجرب طعم الثقة، وأخد على نفسه وعد تام، بإنه هيحاول على قد مايقدر يعزز الثقة دي أكتر وأكتر ويثبتها.. إنتهى وقت التأمل وجه وقت إنه يروح ويسلم عليها)
*عمرو:* أهلًا أهلًا، إزيك يا آنسة رسيل.
*رسيل بابتسامة:* الحمد لله كويسة، انت إزيك؟
*عمرو:* أنا كويس جدًا الحمد لله، شفتي أنا جاي الحفلة متشيك إزاي؟
*رسيل:* ااه شكلك متناسق والطقم بتاعك حلو.
*عمرو:* شكرًا ياستي دا من زوقك والله.
*رسيل بتوتر:* أنا.. أنا.. أنا بس كنت... إيه..
*عمرو:*.......
*رسيل:* آسفة أنا متوترة بس ومش عارفة أرتب كلامي.
*عمرو:* لا ولا يهمك عادي أنا مستنيكي أهو، خدي راحتك متقلقيش.
(فرحتي بالتصرّف إلي حصل مكنتش تتوصف، إزاي هو شخص طيب كدا وقابل يسمعني بكل اللخبطة إلي أنا فيها! أنا نفسي يفضل علطول)
*عمرو:*........
*رسيل:* أنا مرضتش ألبس الشّال والكمامة النهاردة.
*عمرو:* أنا لاحظت كدا فعلًا وحقيقي فخور بيكي لأجل كدا.
*رسيل:* حيث كدا بقا أنا قررت ملبسهمش تاني.
*عمرو بخضة:* لأ طبعًا انتي بتقولي إيه؟؟؟؟
*رسيل:* عفوا!
*عمرو:* أيوة طبعًا الشتا جاي وهتحتاجيهم.
(عارف عزيزي القارئ الكلمتين الحلوين إلي قلتهوملك عن عمرو من شوية؟ انساهم!!)

*استنونا البارت الجااي🌚😁*