روتيڤال🌑♥️

البارت السابع عشر..(17)

*بعد انتهاء السنة الدراسية*
(طبعًا حصل حاجات كتير جدًا متعرفوهاش، بعد اليوم إلي اتكلمت فيه مع نادر وعمرو، حسيت إني مش على استعداد إني استجيب لكلامهم، فرجعت تاني زي ماكنت، رجعت مروحش الامتحان معاهم في الباص، لأ كنت بروح مع ماما قبل الامتحان علطول، وكنت بخرج من الامتحان أروح مع ماما علطول من غير ما أكلم أي حد، مفيش نتايج بتظهر إلّا آخر السنة، لذلك قضيت الأجازة كلها مرتاحة في البيت وكانت ليلى بتزورني مرتين في الأسبوع، والحقيقة لقيتني حبيتها جدًا وبتكلم وأضحك معاها كتير، خلاص الفصل الدراسي التاني بردو مروحتش المدرسة إلّا أيام الإمتحانات بس، ولأن المواد كانت صعبة فكانت ليلى بتيجي وتشرحلي وتذاكر معايا، وماما كانت بتساعدنا كتير، وكنت بروح الامتحان بنفس النظام القديم، نادر كان بيحاول يلحقني ساعات قبل ما أروح البيت بس أنا كنت بهرب منه، مرة في التانية في التالتة استسلم ومعدش بيقربلي، معرفش واحد زي دا عايز مني إيه، مع إني كنت عايزة عمرو هو إلي يكون قريب، برتاحله وحسّاه فاهمني، متكلمناش إلّا تلت أو أربع مرات، بحس وقتها إني مبسوطة عادي، شخص فرفوش وبيتكلم معايا بخفّة بسيطة، وبشوفه علطول بيحاول يديني طاقة إيجابية، ومن غير ماحس بلاقيني مُقْبِلة أكمل لقدام، وأذاكر واجتهد لوقت أكبر... بكرة بقا، بكرة أهم يوم، لأنه يوم ظهور النتيجة وإعلان الأوائل، عاملين حفلة كبيرة في المدرسة والإدارة بتاعت كل مدرسة خاصة بكل مرحلة دراسية باعتة دعوة لِوَلي الأمر عشان يحضر هو وابناءه الطلاب، متحمسة جدًا اسمي ينزل في قائمة الأوائل، أكيد هينزل لأني عارفة إني تعبت كتير واستاهل أكون منهم، يا ترى هلبس إيه بكرة؟)
*سمر:* رسيل انتي فين؟
*رسيل:* أنا هنا في أوضتي يا ماما.
*سمر:* طب تعالي عشان عايزاكي.
(قفلت مذكراتي إلي كنت بكتب فيها كل دا، وحطيتها تحت مخدتي كالعادة، وروحت لماما بعدها)
*رسيل:* أنا جيييت.
*سمر:* وفين بسنت؟
*رسيل:* تقريبًا لسة في أوضتها.
*سمر:* ماشي روحي ناديها.
*رسيل:* حاضر.
(نسيت أقولكم إن العلاقة بيني وبين بسنت مبقتش زي الأول، العلاقة بقت سطحية وكلامنا سوا قليل جدًا، معادتش بتدايقني بالكلام ولا بالتصرفات، كل واحدة بترد عالتانية بالمختصر وخلاص)
*رسيل:* ممكن أدخل.
*بسنت:* اتفضلي.
*رسيل:* طيب ماما عايزانا.
*بسنت:* حاضر، جاية أهو.
_________________________________
*عند نادر:*
*عمرو:* أنا مبسوط أوي ياجدعان، متخيلين إنها سنة واحدة وندخل الكلية إلي عايزينها!!
*كريم:* أنا مبسوووط جدًا جدًا بردو.
*عمرو:* طيب متكلمناش بقا في حفلة بكرة، هنعمل إيه؟
*كريم:* بص أنا رتبت إني هلبس طقم حلو كدا، قول بنطلون أسود وقميص بيج وكوتشي أبيض.
*عمرو:* تصدق وأنا هلبس بدلة كاجوال، وكوتشي أبيض بردو.
*كريم:* أنا أمي وأبويا جايين.
*عمرو:* وأنا أمي وأختي بس إلي هيجوا.
(كان نادر قاعد ساكت لوحده، مش عاطي أي اهتمام لكلامهم، ومكنتش مهتم بردو للي بيقولوه)
*كريم:* نادر.
*نادر:* نعم؟
*كريم:* مالك يا عم انت مش مبسوط زينا ولا إيه؟
*نادر:* لأ مبسوط عادي.
*كريم:* مالك يا صاحبي فيك إيه؟
*نادر:*.........
*عمرو:* شكلك محلتش في الامتحانات كويس وخايف متطلعش من الأوائل زي كل سنة.
*نادر:*..........
*عمرو:* انت لسة زعلان بجد؟
(بصله نادر شوية بحزن، وبعدين هز راسو بمعنى أيوة، ساعتها بطّل عمرو حس الفكاهة بتاعو، وراح طبطب على صاحبه)
*عمرو:* طب يا حبيبي خش في حضن أخوك، تعالى تعالى.
*نادر:*!!!
*عمرو:* خلاص والله، قولي بقا، مين جاي معاك الحفلة بكرة؟
*نادر:* أنا أصلًا مش رايح.
*كريم:* ليه يا عم ماتيجي معانا وانبسط وغير جو وأهو بالمرة تعرف نتيجتك.
*نادر:* ابقوا هاتوها معاكو وانتوا راجعين من هناك.
*عمرو:* خلاص متضغتش عليه يا كريم سيبه براحته، احنا نبقى نروح ونحتفل لوحدنا مع ليلى وبسنت ورنا و..... رسيل.
*نادر بصدمة:* مين؟!
*عمرو:* لا متاخودش في بالك دول حبة بنات بس هنقعد معاهم.
*نادر:* أنا جاي معاكو بكرة.
*عمرو:* أقعد ياعم هنا على جنب، يلا بينا نمشي يا عم كريم.
*نادر بعصبية:* خلاص هقعد بجد ومش جاي.
*عمرو ببرود وسخرية:* هييييح براحتك.. تصبح على خير.
*نادر:*... هه ولا هرد عليك.
__________________________________
*تاني يوم الصبح*
(ماما اتكلمت معانا في الليلة إلي فاتت إنها راضية عننا مهما كانت النتيجة، لأنها كانت عارفة وشاهدة علينا قد إيه تعبنا في مذاكرتنا وبذلنا مجهود كفاية، ولأجل خاطر تفرحنا بكدا، جابت لكل واحدة فينا فستان حلو يليق بشخصية كل واحدة فينا، ساعتها كانت نقطة تغيير في حياتي، هبدأ بيها من جديد، لبست الفستان وظبطت شعري وكان دراعي من تحت الكوع باين وقلعت الكمامة كمان، قررت إني هظهر بطبيعتي، مفيش حاجة تستاهل استخبى منها، البقع إلي في جسمي بقيت متقبلاها تقبل تام، واعتمدت إنها حاجة جميلة جدًا ربنا انعم عليا بيها وأنها بتميزني.)
*سمر:* جاهزين؟
*بسنت ورسيل:* جاهزين.
(تفتكروا هيكون رد الفعل على رسيل عامل إزاي؟)

*استنونا البارت الجااي🌚😁*