*بعد أسبوع*
*رسيل:* بسنت ممكن آخد منك قلم؟
*بسنت:*.........
*رسيل:* ممكن؟؟
*بسنت:*.........
*رسيل:* طب مش هتيجي تاكلي معايا؟
*بسنت:*.........
*رسيل بحزن:* خلاص يا بسنت أنا آسفة.
(من أول يوم إمتحانات لحد يومنا هذا بحاول أتكلم مع بسنت بس مهما أقول هي مش بترد خالص، كإنها مش سامعاني، كإني مش موجودة خالص، وطبعًا لإننا ما زلنا في فترة امتحانات ف ماما مانعة الخروج من البيت وبكدا بسنت قاعدة في أوضتها طول يوم، لوهلة فكرت ليها في عذر إنها مش عايزة أي حاجة تشوشها عشان تعرف تذاكر كويس وتجيب نِمَر كويسة.. ربنا معاها)
__________________________________
*بالليل في بيت نادر*
*نادر:* يلا كفاية كدا، قوموا روحوا.
*عمرو:* حاسس كدا إني بتطرد.
*كريم:* مش هنراجع شوية كمان ولا إيه؟
*نادر:* لا كفاية كدا ابقوا راجعوا في بيتكم.
*عمرو:* أنا هبات معاك النهاردة إيه رأيك بقا!
*نادر:* النهاردة بالذااااات مش هينفع.
*كريم:* اشمعنااا بقااا، قول قول متتكسفش.
*نادر:* تعبان أوي ومحتاج أنام وأرتاح كويس وكدا انتوا عارفين إن الامتحان بكرة ولازم أكون مركز.
*عمرو:* عم نادر دا الامتحان الرابع ولسة بادئ تركز!!
*كريم:* شكله كدا يا ولا يا عمرو عامل عملة ومش عايز يعرفنا.
*نادر بصدمة:* أنا؟؟؟ أنا يابني؟؟؟؟؟؟ لا طبعًا تؤ تؤ تؤ دا أنا صاحبكم حبيبكم بردو عيب تشكوا فيا كدا.
*عمرو:* هيييييح يا صاحبي، أنا كدا أصلًا شكيت فيك زيادة!
*كريم:* خلاص يا عمرو سيبه براحته، تعالى نلم حاجتنا ونمشي.
*عمرو:* ماشي يا نادر ماااااشي، بس اعمل حسابك هبات عندك ليلة الامتحان الجاية ماشي ياااا؟!
*نادر:* البيت بيتك تنور في أي وقت.
(طبعًا تصرفات نادر في اليوم دا مكنتش مريحة أبدًا بالنسبة لكريم وعمرو، ولكن احترامًا لخصوصية صاحبهم إلي عمرها ما كانت موجودة أصلًا قرروا يسيبوه على راحته، أوشك عمرو وكريم إنهم يمشوا بعيد عن بيت نادر بشوية صغيرين ولكن فوجئوا بحاجة صدمتهم جدًا، فقرروا يرجعوله تاني)
__________________________________
*في بيت جلال*
*أحمد:* بابا.. يا بابا.
*جلال:* أيوة يا حبيبي، عايز إيه؟
*أحمد:* أنا جعان.
*جلال:* ماشي أنا قربت أخلص تحضير العشا أهو، روح يلا نادي أختك عشان نتعشى.
*أحمد:* حاضر.
(جري أحمد على أوضة ليلى عشان يناديها تتعشى معاهم، وقعد يخبط على الباب لكن ليلى مش بترد عليه، قرر يفتح الباب يشوف فيه إيه!)
*أحمد:* ليلى!!!!!
___________________________________
*جيهان:* مش هتيجي تاكلي لقمة قبل ماتنامي؟
*رنا:* لأ.
*جيهان:* ليه كدا يا رنا يا بنتي؟ هتنامي من غير عشا؟
*رنا:* أيوة يا ماما مش عايزة آكل، يلا تصبحي على خير.
*جيهان:* وانتي من أهله يا بنتي، عمومًا الأكل موجود في المطبخ لما أخوكي يجي ابقي اتعشي معاه.
*رنا:* إيه دا لسة مجاش؟
*جيهان:* لأ لسة، تصبحي على خير.
*رنا:* وانتي من أهله.
(حست رنا بالغيرة من أخوها وفضلت تقول في نفسها:
*رنا:* يا بختك يا عمرو، ليل نهار قاعد مع نادر، عمومًا أنا مسيري أعرف أتعامل معاه، صبركم عليا بس.
___________________________________
*عند رسيل*
*سمر:* رسيل يلا تعالي عشان تتعشى.
*رسيل:* طب هي بسنت مش هتتعشى معانا؟
*سمر:* أقعدي هي جاية أهه.
(وفعلًا جت بسنت بعدي بشوية وقعدت معانا السفرة، كلامها كله كان مع ماما بس، مش بتتكلم معايا خالص، حاولت أجرب اتكلم معاها تاني قدام ماما يمكن ترد عليا)
*رسيل:* بسبوووووسة، ذاكرتي كويس عشان امتحان بكرة؟
*بسنت:*..........
*رسيل:* ط.. طب في حاجة وقفت عليكي أساعدك فيها؟
*بسنت:*..........
*رسيل:* ماما هي بسنت مش بترد عليا ليه؟
*سمر:* بسنت بقها واجعها بقالوا فترة فمش عايزة بس تتكلم كتير.
*رسيل بعصبية:* بقها بيوجعها بس لما بتيجي تتكلم معايا، لكن معاكي ومع صحابها في المدرسة بتتكلم عادي صح؟؟؟
*سمر:* رسيل اهدي لو سمحتي.
*رسيل:* لأ مش ههدى، هي بقالها أسبوع بالظبط مش بتتكلم معايا ولا حتى بتدايقني بالكلام كعادتها.
*سمر:* يا رسيل قلتلك اهدي.
*رسيل بعياط:* على فكرة يا بسنت، أنا مش بلومك على كرهك ليا، يمكن لو كنت مكانك وانتي إلي كنتي عندك البهاق ومغرّق جسمك في كل حته زيي يمكن كنت هبقى قاسية ناحيتك زي مانتي بتعملي معايا دايمًا، ويمكن كنت هبقى قرفانه منك ومن شكلك زي مانتي علطول بتحسسيني بكدا، بس الفرق إلي بيني وبينك إني عمري ماكنت هنسى إنك أختي وأختي التوأم كمان، وعمري ما كنت هوجعك بالكلام سواء كنا لوحدنا أو قدام أي حد، وكمان أنا حابة أفكرك بحاجة واحدة، إن دا مش اختياري عشان أندم عليه، ولا ليكي الحق إنك تحسسيني بالذنب في حاجة زي كدا.
(سبتهم وجريت على أوضتي وقفلت الباب بالمفتاح، ودخلت جوا سريري حضنت مخدتي وقعدت أعيط، أنا اه كنت بتدايق جدًا من تنمرها عليا وكلامها الوحش إلي طول الوقت بيجرح فيا وبيوجعني، بس هي وحشتني ووحشني كلامها، بس هي في نفس الوقت جت عليّا جامد، قعدت أعيط كتير أوي لحد ما دخلت في النوم)
__________________________________
*سمر:* ياريتك تحسي بحجم الأسى إلي سببتيه لأختك.
*بسنت:* الله!! ماما أنا نفذت كلامك بالحرف مش أكتر، مش حضرتك إلي من أسبوع نبهتي عليا وقولتيلي متكلمش مع رسيل خالص؟ طب أنا عملت كدا.
*سمر:* أنا كان كلامي واضح، أنا قلتلك إني أخدت قرار إني مش هسمحلك تجرحي أختك تاني، مش مسموحلك تقوليلها كلمة وحشة ولا تجرحيها سواء لوحدها أو قدام أي حد، وممنوع تجيبي سيرتها على لسانك قدام حد.
*بسنت:* وأنا نفذت كلام حضرتك بالحرف، ومحيتها من تفكيري خالص.
*سمر:* للدرجادي معندكيش كلمة حلوة ليها! تجبري بخاطرها طيب!! افتكري إنها في النهاية أختك، أختك التوأم!
*بسنت:* أنا اسفة يا ماما، تصبحي على خير.
__________________________________
*أحمد بصمة:* الحق ليلى يا بابا..
*جلال:* في إيه مالها ليلى؟!
*استنونا البارت الجااي🌚😁*
أنت تقرأ
روتيڤال🌑♥️
Roman d'amour"السلام عليكم ورحمة الله وبركاته" ممكن قبل ما نبدأ نستغفر مع بعض بنية الفرج.. يلا نقول مع بعض: 🧡أستغفر الله العظيم رب العرش العظيم واتوب اليه🧡" ______________________________________ يلا نقول "بسم الله".. "لازم كلنا نبقى عارفين حاجة مهمة أوي، وهي...
