روتيڤال🌑♥️

البارت الثاني والعشرون..(22)

*عمرو:* خلي بالك احنا يدوب في ثانوية عامة!
*نادر:* يعني إيه مش فاهم.
*عمرو:* يعني احنا اخرنا نبقى أصحاب وأخوات جامدين أوي كمان، لكن حب وارتباط إيه ياعم إحنا أصغر من كدا بكتير.
*نادر:* طيب لحد ما نوصل بقا للمرحلة دي، رجاء متجيش ناحيتها تاني.
*عمرو:* لأ بقا خد عندك الجديد..
*نادر:* إلي هو إيه بقا؟
*عمرو:* إني أنا حر، أعمل إلي أنا عايزو، زي مانت حر تعمل إلي انت عايزو، ونسيبها هي تختار.
*نادر:* قصدك إنك هتنافسني عليها ولا إيه؟
*عمرو:* أيوة، وصدقني هتبقى منافسة شريفة.
*نادر:* يبقى انت إلي هتخسر.
(واضح كدا اننا هنعيش جو غريب أوي الفترة الجاية يا شباب)
__________________________________
*عمرو:* يلا كلنا نقول اتشيييييييز.
(وبكدا أخدنا الصورة التذكارية إلي كلنا موجودين فيها، رجعنا البيت واحنا مبسوطين جدًا باليوم، أنا عن نفسي مهما يحصل فأنا قوية وأقدر أستحمل، ومش مهم أي حاجة تانية، وطبعًا لإن ربنا كريم وحنين علينا، طبطب على قلبي قبل ما أنام)
*سمر:* يا رسيل.. يا بسنت.. تعالوا يا بنات أنا عايزاكم.
*رسيل:* أيوة يا ماما.
*بسنت:* أنا هنا أهو، في إيه؟
(ماما كانت بصّالة بصة حنينة ولطيفة، حسستني إن في حاجة حلوة في انتظاري.. وقد كان)
*سمر:* اتفضلوا إلي كان نفسكوا فيه أهو.
*بسنت:* الله~~ تليفونات!!!
*رسيل:* اي دا بجد؟ أنا هيبقالي تليفون بجد؟
*سمر:* اه يا حبايبي، أنا وعدتكم وبكدا وكان لازم أنفذ وعدي عشان أنتو تستاهلوا بجد.
(بصيت في الأرض بحزن لحظة مافتكرت إني متكرمتش زيهم)
*سمر:* رسيل يا حبيبتي.
*رسيل:* أيوة يا ماما.
*سمر:* تأكدي إنك اجتهدتي وعملتي إلي عليكي بجد، وحقيقي أنا فخورة بيكي.
(روحت حضنتها وقلتلها إني هفضل أعمل إلي عليا وهحاول اجتهد طول الوقت)
__________________________________
*بعد مرور ٣سنين*
(مش هتصدقوا الفترة إلي فاتت عدت عليا إزاي! حياة الثانوي دي كانت صعبة جدًا، مشوفتش عمرو من آخر يوم كتبت عنه، لأنه كان في ثانوية عامة وبتوع ثانوية عامة مكانوش بيحضروا، ولكن كنا بنتكلم كتير عالفون ثم شوية شوية ثم نادرًا عمّا بنتكلم أصلًا، عدت الفترة إلي فاتت ما بين حاجتين اتنين بس، يا إمّا كنت بذاكر، يا إمّا بقرأ روايات في أوقات الفراغ كلها، وبقالي حاليًا ٣سنين ونص بتعلم إزاي أستغل موهبتي في التعبير الكتابي، وبقيت بتعلم أكتب، وسجلت في ورش كتابية، حددت هدفي ودخلت أدبي، حسيت إني شاطرة في الناحية الأدبية والجانب دا، خلصنا التلت سنين بتوع الثانوي أهو، كبرنا.. كبرنا أوي عن زمان)
*سمر:* بما إن النتيجة ظهرت كل واحدة كدا تيجي تقولي محددة لنفسها هتدخل إيه؟
*بسنت:* أنا هدخل تجارة انجلش.
*سمر:* اشمعنا؟؟
*بسنت:* عايزة ابقى سيدة أعمال في المستقبل ويبقى عندي فلوس كتير.
*سمر:* صدقيني دا ممكن يحصل بالاجتهاد في أي نوع من المجالات، في النهاية لازم تبقي عارفة إنك هتتحملي نتيجة اختيارك لوحدك.
*بسنت:* وأنا موافقة.
*سمر:* وانتي يا رسيل؟
*رسيل:* أنا؟ أنا هدخل آداب.. آداب قسم لغة عربية.
*سمر:* لغة عربية؟ اشمعنا؟
*رسيل:* عشان أنا نفسي أكون كاتبة وليّا نصوص بتتنشر وناس بتقرأها يا ماما.
*بسنت:* بس دا شغل ميأكلش عيش حاف!
*رسيل:* زي ما محدش اتدخل في اختيارك، انتي كمان ملكيش دعوة، اتفقنا؟
*بسنت:*.......
*سمر:* حبيبتي ربنا يعينك ويوفقك وطالما محددة هدفك خلاص.
*رسيل:* إن شاء الله يا ماما.
(عدت أيام كتير عما موقع التنسيق فتح، وجه وقت تسجيل الرغبات وكنت أنا وأختي بنسجل رغباتنا، وعدت الأيام وظهرت نتيجة التنسيق أخيرًا..)

*استنونا البارت الجااي🌚😁*