قصص عراقية حقيقية بقلم ابو بغداد سائق التكسي المجموعة الثانية

(الخباز)

جانت المضمده ام رياض تعرف وضعنا و حالتنا و تعرف ماعدنا امكانية نعالج امنا و اصلا حتى لو عدنا هم ميفيد …
جانت تجي تنطيها ابر و تبقى تسولف وياها و تروح … الابر  تخفف الوجع على امنا … بس متغير واقع مرضها … اصعب شي عالبشر من كدامه يتلوى و يتوجع اعز ناسة و هو ما بيده شي مثل المربوطه ايده لو مجتف .. جنا اني و خواتي ما نعرف شنسوي مجتفين .. ولو بيدنا نتبرعلها بروحنا بس ميفيد … ايامها معدوده بهل الدنيا … و ميفيدها علاج لان وضعها المرضي متقدم كلش و ميرهلمه شي … هي جانت تتحمل … و تعرف محد يتحمل مسووليتنا كلنا بالبيت غيرها لا كرايب و لا معارف…

قبل منعرف هي مريضه جانت من تتوجع متبين النا هالشي .. بس ورى وفاتها حجتلنا صديقتها الي هي هم جوارينه .. كالت امكم من جانت تتوجع و اكلها روحي دكتور .. تكلي الله الشافي و حرامات اذب فلوس كشفيات و ادوية و روحه و رجعه .. اذب هالفلوس على الجهال … و دائما تكول اوجاعي خفيفة و بقت تكول هيج كل هالسنين لحد موصلت مرحله ما بيها رجعه … و راحت امي و احنا كل شي ما بيدنا … و اني الي عمري بذاك اليوم جان ٢٣ سنة .. استلمت مسوولية بيت بي تلث بنات …
وحده ٢٠ و وحده ١٨ و وحده ١٣ سنة … و كلهن يدرسن …
امي الله يرحمها كومة شغلات اشتغلت ورى وفاة ابوية … و اخر شي فتحت محل صغير من البيت وجانت تكعد بي من الصبح لليل … من هالمحل جنا عايشين … و صح احنا ببيت صغير بس المهم ملك .. يعني والله ماعرف لو بيتنا جان ايجار مادري شجان صار بذيج الفترة … اني بذاك الوكت بطلت من الدراسة .. و لزمت المحل .. جنت اخاف على خواتي كلش و حسيت اني صرتلهم أم و أب … وكمت احاول ادبر شغل بس اشتغله بالبيت .. حتى ما اعوف خواتي وحدهن … و حتى  ابقى قريب من المحل … و بيوم من الايام جنت راجع من سوق الجملة متسوك للمحل … و ابو التكسي الي صاعد وياه و محمل البضاعة فتحلي موضوع عن فكره براسه .. الفكرة جانت يفتح مخبز احسن من سالفة الفرفره بالشوارع و السيارة يوميا عطلانة … و كالي شغل المخابز و الافران ميوكف … الفكرة بقت براسي … و رجعت للبيت و حجيت لأختي و كالت اني اخبز للناس .. كلتلها لا … انتي بس نجحي كل شي ماريد منج …
بس اريد تعلميني شلون اخبز … ضحكت كالت صدك تحجي … كلتلها اي والله … و وكفت اول يوم عالتنور و بحياتي مجنت اوكف .. كلت لاختي الله يساعدج و يساعد امي الله يرحمها و يساعد كل النسوان هاي شلون تتحملون هالنار … كالت هسه تتعلم .. و طبعا بكل كفخة خبز .. يعني بكل مرة جنت انزل المخده و الزك الخبزة بالتنور جنت انجوي … و بعدين علمتني شلون اطلع الخبز بالمنكاش … و شوية شوية تعلمت … كمت اخبز … و قررت الحديقة كلها الغيها لان ممستفادين بالمسافة الصغيرة الباقية … شنسوي بالحشيش و هالوردتين … عندي اصدقائي ولد المنطقة يشتغلون بالبناء … رحت كلتلهم اريد اسوي محل بصف المحل الصغير بس اسوي مخبز .. و بصراحة امكانيتي مو كلش زينه … كالو عمي اذا عالبناء احنا نبنيلك شيرادلها هي .. بس المصيبة بالطابوك و السمنت و سوالف البناء … كلتلهم هواي تكلف .. كالو يعني مو هواي بس انته دتكول ماعندك … و كالو كوم امشي ويانه … و رحنا لرجال عنده سكله اسمه ابو علي بمنطقتنا … حجوله الوضع و طبعا لان هو ابن المنطقة تقريبا عرفنا و تذكر امي … كالهم مو بيتهم مقابيل بيت فلان و عدهم اسواق صغيرة … كالوله اي … و عرفني و كالي اني حذبلك كل الغراض و بعدين من شغل المخبز على كيفك سددني .. و طكينا الحايط ثاني يوم و جاب الطابوك و الغراض و الولد جماعتي الله يرزقهم ساعدوني و بنينا المحل .. وطلعت الموافقات و فتحت المخبز … كمت اخبز للجوارين و للمنطقة و طبعا احلى شي جان برزقي .. ماكو اي مخبز قريب بالمنطقة … و بديت اشتغل و كمت اخبز و ابيع خبز … و الشغل صار قوي و جبت ولد صديقي كعدته بالمحل … و كلت لخواتي ممنوع وحده منكم لا بالمحل تشتغل و لا بالمخبز … انتو اميرات و المطلوب منكم بس تنجحون و تجيبون درجات عالية ..
و لان نيتي جانت خير و لان امي جانت تدعيلي الله يرحمها و تدعي لخواتي … شغلي جان كلش زين و وفيت الدين مال ابو علي و انطيت هالقاسمة الله لجماعتي الي وكفو وياي  … 
خواتي يوم ورى كامو ينجحون و يجيبون اعلى درجات .. الاصغر مني صارت مهندسة و توظفت … و الاصغر منها هم تخرجت و توظفت بالمحكمة مال بغداد جديدة … و الصغيرة كلش هم تخرجت و توظفت بالطابو الي بالمشتل … واني عزلت الاسواق الغذائية و بقيت بس عالمخبز … و جتي قسمة الجبيرة و تزوجت و جتي قسمة الصغيرة و الوسطانية هم ورى الصغيرة بفترة تزوجت … رياجيلهم كلهم ينحطون عالجرح يطيب … حبابين و متربايين …
اني من زوجت خواتي قررت اتأهل … وبوقتها اجاني شغل بمطعم بنص بغداد … مطعم كلش راقي .. يسوي سمج مسكوف و تقريبا كل الاكلات العراقية … المخبز فلشته و فلشت الاسواق و سويت اسواق جبيرة كلش بمكان المخبز و مكان الاسواق القديمة … و رتبتها ترتيب يخبل و جبت ولد جان يشتغل وياي بالمخبز و كفته بي و اني بديت بشغلي بالمطعم … بالمطعم جان شغلي بس جوى يعني بالمطبخ  …
و مرات اطلع برى ادخن و ارجع … و مره واحد وكف بصفي هم يدخن اني عبالي يشتغل جوى لان لبسه كلش بسيط … سألني انته شنو تشتغل هنا … كلتله اي .. كال شنو شغلك كلتله اني الخباز … كال هااا انته الي جابك ابو رضا … عاشت ايدك خبزك يخبل … كلتله اشكرك … و رجعت سألته انته شنو تشتغل … كال احزر … كلتله تقدم عالصالة .. كال بس تقريبا وصلت … كلتله المحاسب … كال لا … كلتله لعد ابو الكراج الي توكف السيارات بي ههههههه … كال هم لا و كام يضحك … كلتله لعد منو .. كال تعرف ابو فلان … كلتله طبعا اعرفه الله ينطي الصحه هذا ابو المطعم … كالي اني فلان ابنه … كلتله اهلا و سهلا تشرفت بيك … كال والله اني الي اتشرفت بيك … و من يومها كام كل ميجي للمطعم يجي يسلم عليا و مرات نوكف نحجي … و بيوم من الايام جيت للشغل كالعادة لكيت ابو رضا الي شغلني و العمال واكفين و المطعم معزل … عرفت بيومها ابو المطعم توفى … انقهرنا عليه لان الرجل كلش طيب و مداري الكل .. رحنا للفاتحه و قمنا بالواجب و وراها بفترة رجع المطعم فتح … ابن ابو المطعم هو الي لزم المطعم و طبعا هو خبرته بهل المواضيع مو قوية … و جان يجي مرات للمطعم بس اخر فترة من ابوه تمرض … كام يجي وياه بس هو اي علاقة بمواضيع المطاعم ماعنده … و كل شي مخلي بيد ابو رضا الي هو قنعني و جابني للشغل و طبعا هو من منطقتنه … بوقتها علاقتي صارت قوية وي ابن ابو المطعم ..
و تقريبا اني وياه من نفس العمر .. بذاك الوقت اني جنت تقريبا ٣٦ سنة و بعدني ممتزوج … و عايش وحدي … لان خواتي متزوجات و ملتهيات بحياتهم بس نتواصل و يجون زيارات من اكون بالبيت …
عالعموم … علاقتي زادت بي و كمنا مرات نطلع … فد يوم كالي اريد اتزوج و كل بنات كرايبي رافعات خشمهم و اصلا علاقتي بيهم رسمية و بصراحة ما احب اتزوج كرايب … كلتله ادري معقولة ما حبيت قبل … كالي حبيت بس ما رهمت … كلتله والله شكلك اكو هواي بنات بمنطقتنا حبابات و ميدورن غير بس الستر و العافية … كالي دمشيلي بالسالفة … كلتله سهلة .. و كلفت اختي هم تشوفله مريه و هم تشوفلي اليا مرية … و يا سبحان الله افترت الدنيا و اجتني اختي كالتلي بنات المرحومة ام رياض خوش بنات و حبابات و دارسات … كلتلها لا تكولين ام رياض الي جانت تجي تنطي ابر لأمي ؟ كالت اي هي … كلتلها اتذكر توفت بس ولا ادري عدها بنات … كالت اي عدها تلاثه وحده تزوجت و بقو ثنين … و رحنا تقدمنا و طبعا رياض اخوهم و هو المسوول عنهم … وافق عليا بس على ابن ابو المطعم ما وافق الا يسأل عنه … كلتله بركبتي … و اني تصدرتله و صرت بوجه المدفع …
و قبل رياض و تزوجت اني و هو هم تزوج … اني الحمدلله توفقت بزواجتي و ارتاحيت بس للأسف ورى سنة ونص و ورى ما جابت اخت زوجتي طفل … انفصلت من رجلها و الصوج منه … جان يدور علاقات و هي لاكفته اكثر من مرة و جانت تسكت .. اخر مرة من لكفته ضاربها و هي متحملت … و رجعت للبيت و انفصلو … طبعا زعلت منه و بطلت من الشغل و بذاك الوقت اني جنت بمكان ابو رضا يعني الادارة كلها بيدي مال المطعم … بس لان طلكها و لان الصوج منه و لان اني الي زوجته و هيج تسرع و طلكها .. كلتله لو تنطيني ذهب بعد ما ابقى وياك ولا اريد اعرفك ساعة … هو هم ركب راسه و سمعني حجي محلو و تعاركنا بالمطعم و وصلت للضرب و ضربني و ضربته … و عفت كل شي وطلعت … ورجعت لمحلي اني كعدت بي و اصلا جان عندي سيارة هم … و اصلا ممحتاج شي لان شغل المحل كافي .. و البيت ملك .. و جنت مخلي فكرة براسي افتح مطعم بس للامانة ما اكدر وحدي .. جنت ادور شريك … و لكيت شريك … بس بذاك الوكت جنت من اشوف اخت مرتي لو اشوف اخوها رياض عيوني تنكسر و اتهرب منهم … لان مستحي منهم كلش و اني السبب .. صح كل شي قسمة و نصيب بس اني الي كلتله لرياض هالرجال بركبتي … شمعرفني راح توصل الامور لهل المواصيل … و لكيت الشريك مثل ما كلت و بدينا نرتب مكان و لكينا المكان و كمنا نرتب بي … و بيوم من الايام ساعة وحدة بليل تقريبا اندكت باب بيتي … طلعت لكيته ابن ابو المطعم … كاعد عالرصيف يم بابنا و مطفي سيارته … كلتله شتريد؟؟ كال هيج تستقبل العابريلك خطوه .. كلتله علساس جايني من الفاو .. كال لا بس صاحب خطوه اني و جايك ضيف .. كلتله هلا بيك و عندك حق تعال فوت جوى … كال لا هنا اريد احجي وياك .. كلتله احجي .. اشو هذا حضني و طك من البجي .. بجي بجي …
المشكلة الرجال من يبجي من كل كلبه صوته لان خشن يصير واضح و احنا بنص الليل و الناس نايمه … جوارينا جان بالطرمة من سمع البجي طلع بسرعة و شافه حاضني و يبجي .. ركض كالي خير شكو عباله ميت احد … كلتله ماكو شي و كمت اسكت بي … جان يسكت كالي اني غلطان والله و كل هالوقت اني جنت غلط … و شتفصل اني البس عسى ما هسه تضربني بلي برجلك … كلتله كول يا الله ياخوية حشاك شهل الحجي … كال لا اني غلطان … اريد نروح لرياض هسه … كلتله بهل الليل .. كال اي اي بهل الليل … و قفل الا نروح للرجال … كلتله زين عالاقل خلي اتصل بي .. كال لبيته … كلتله امشي .. رحنا دكينا الباب جان يطلع رياض … بس شافه كلب خلقته و فوكاها فاز من النوم … المهم بالكوى خليتهم يحجون و طبعا هو الكعدة كلها يتوسل و يبوس بيا و برياض .. كال اني غلطت … و اني مو مثلكم .. انتو تتحملون لان من صغركم متحملين مسوولية .. اني جنت مدلل … مكظيها طلعات و طبات و سفرات … اقصى شي تعبت بي هو الايام الي داومت بيها عسكرية من ابوية دفعلي بدل .. و هم مجانن هواي و بسرعة خلصو .. هاي اقوى تجربة دخلتها بحياتي .. انتو من هالشي و قيسو .. كلناله بس انته رجال هسه .. و سالفة الطلاق مو سالفة هذا فايخ و هذا مجفف .. مو سالفة هذا مدلل و هذا لاحس الكاع علمود رزقة .. كال اي غلطت .. متحملت واحد يكلي لا .. متحملت … متحملت تتعارك وياي هي .. متحملت يوميا سين و جيم و وين جنت و ليش تاخرت و و و … كلناله بس هاي ام ابنك … انته تعرف شنو زواج .. زواج معناها كل الدنيا بجفه و زوجتك و اهل بيتك بجفه ثانية .. احنا مو اصدقائك و اخوتك … اذا صارت معادلة بميزان .. و اني و رياض بكفه و مرتك و ابنك بكفه .. طز بينا روح اختار زوجتك و ابنك … احنا اول و تالي علاقتنا بيك برى .. بس هي البيت .. هي الطمأنينه .. هي الحضن الي من تخلص يومك تروح تخلي راسك عليه و تشحن طاقتك من جديد .. انته شلون طلكتها بهل السهولة .. ما فكرت راح يجي يوم و توكف هالوكفه كبالنه ؟
و هم رجع يبجي .. من كام يبجي هيج رياض ضحك وسبني و كاله خلص اسكت فضحتنا .. و ورى كم يوم رجع كل شي لمكانه .. و الحمدلله كام يمشي مثل ميل الساعة  … و مدلل زوجته و جهاله لان صارو تلاثة .. و اني صار عندي ثنين … و الحمدلله عايشين و مرتاحين و ممحتاجين غير بس العافية و الصحة و الرزق .. طبعا اني ما رجعت لشغلي وياه و سالفة المطعم فتحنا و مشتغل و عزلناه و شوية خسرنا .. و رجعت لمحلي و عايش و مرتاح … الي اتمناه اليوم بس شي واحد .. كل واحد يعامل زوجته و اهله بيته تعامل يختلف كل الاختلاف عن اصدقاءه لو معارفه … لان الزوجه و الاهل و البيت شي .. و البره شي ثاني .. يعني اني مو على حساب ونستي و اصدقائي و سوالفي … البيت يسوى كل الي ذكرته .. لان بالنهاية كل الي تذكرهم همه مو اهلك … و علاقتك بيهم مو مثل علاقتك بأهلك .. و الاهم من كل شي .. الف رحمه على روحج يمه .. جانت تكلي قوي علاقتك بخواتك دائما .. و لا تعاملهن بخشونه … دائما اسمعهن و لا تقلل من قيمة مواضيعهن حتى لو مواضيعهن تافهه .. لان هنه ماعدهن غيرك و اذا انته رجال البيت متسمعهن و متتناقش وياهن منو راح يسمعهن .. تقبل يروحن للغريب ؟؟ و اني والله العظيم وروح امي الراحت بمرضها و مجانت تحسسنا بي .. و تراب كبرها من جانو خواتي يحجون على الخياطة لو على الدشاديش اشاركهن و اكلهم لو هاي مشجره احلى لو هاي ساده احلى .. جنت اشاركهن بكل مواضيعهن و اركز بأدق التفاصيل .. وهسه خواتي يتعاملون وياي على اني ابوهم مو اخوهم .. و يحبوني لدرجة ثنين منهم قفلو يسمون ولدهم على اسمي و سموو ولدهم على اسمي بس الثالثة الله مرزقها بولد و تكول اذا اجاني ولد اسمي عليك .. هاي حصتي من الدنيا … و هاي حروفها ..
(الخباز)
انتهى
اخوكم ابو بغداد سايق التكسي
#ابوـبغداد

روابط صفحات قصص ابو بغداد سايق التكسي

صفحة الانستغرام للقصص المصورة و القصص القديمة  …
https://www.instagram.com/iraq.txei/
صفحة اليتيوب للقصص المسموعة لذوي الهمم و للاخوة و الاخوات الي نظرهم قليل …
https://www.youtube.com/channel/UCER9QkmohGeDKgFFQ8WNAxA

و صفحة السناب بالصورة الشخصية للصفحة و شكرا لكم ..