قصص عراقية حقيقية بقلم ابو بغداد سائق التكسي المجموعة الثانية

باسم

چنت اصعد وياه فوگ السطح .. شغلي چانت الف الخيط على القوطية .. قوطية فارغه مال حليب كيكوز الي نستخدمها لشرب المي ..

چنت اوگف يم تانكي المي لان اكو فيي حتى رجلي لا تنچوي من حرارة السطح وماعرف ليش چنت اصعد حافية و كل مره انسى البس نعالي (مكرم القارئ) .. و هو يجر الخيط و اني بسرعه بسرعه الف الخيوط عالقوطية …

چان يكيف و كل شويه يركض يبوسني من الفرحة ..

حتى بالبايسكل شبعت وگعات بالگاع و كومة تجرحت ركباتي و چف ايدي لحد ماتعلم يسوق  بايسكل بتايرين …

و كل لعبه چان يلعبها لازم اني اساعده بيها … و يوم ورى هالطفل الصغير گام يكبر و العابة تكبر وياه … چان يحبني اكثر من ماما والله .. كلش متعلق بيا و من يفوت للبيت ميسأل ماما وين .. يسأل وفاء وين ..

بدراسته چنت اني اسمعله و امتحنه و اقري و الله العظيم چنت مرات اترزل من المدرسة لان ما الحگ احفظ واجبي هلگد ما التهي وياه ..
و لحد هسه اتذكر فرحته بنجاحه من السادس علمي .. بيومها اخذني عزمني و تعارك هههههه لأن واحد صچمني عبالهم صديقته ميدرون اخته الچبيره .. وبالگوه اهل المحلات جروه ..

و تخرجنه اني وياه هو خريج قانون و اني خريجة صيدلة … طبعا ورى تخرجي تزوجت صيدلاني تعرفت عليه بالكلية و فتحنه صيدلية بمنطقة بيت اهلي ..

باسم اخويه بذاك الوكت هم متخرج و چان يشتغل وي محامي معروف ببغداد .. و يوميا يجي يمي و يم زوجي بالصيدلية ..

فد يوم اجاني گالي اني حبيت وفاء … گلتله منو و طبعا هالشي حچالياه قبل ميحچي لماما …

گال بنت المحامي الي اشتغل وياه .. وگام يوصفلي شكلها و شلون حبابه و طيوبه .. و گام يسألني شلون يتصرف وشنو يحبون البنات و هالسوالف ..

حبيبي چانت الفرحة بعينه .. و مكيف كلش … و خطبها .. ورى ما خطبها بفترة عافها و بطل من المحامي … و تغير وي الكل … حتى وياي و شگد ردت افتهم الي ديصير وياه ما گال .. صار حچيه قليل كلش و ميطلع من البيت و لحيته و شعره طويل ..

امي تگلي شوفي اخوج شبي و ابويه هم و حتى زوجي نفس الشي … و هو اگعد اسأله يگلي ما بيا شي .. زين لحيتك ليش متزينها شعرك ليش متزينه ؟؟
يگول هيج مرتاح و عوفوني اني مرتاح ..
و گام يضعف و المصيبة ميقبل احد يتدخل بي .. و الناس و حتى الگرايب گامو يطلعون دعايات .. شي يگولون مسحور شي يگولون راكبه جني شي يگولون مصدوم شي يگولون مشربينه … و تالي بليله ويوم اختفى .. ما خلينه مكان ما دورنه عليه بي .. مستشفيات و مراكز شرطة و حتى صورته بالجريده بذاك الوكت نزلناها .. و تالي ورى ٩ أشهر صدفه واحد من جوارينه رايح لفاتحة بالديوانية و شايفه حافي بدشداشه مشگگه يمشي بالشارع و مصعده غصب بالسيارة و جابه النا … و من شفناه تخبلنه .. امي رادت تموت بيومها والله .. و غسلناه و رتبناه و وديناه لدكتور نفسي و طبعا الدكتور سألنه كومة بس ما نعرف شنجاوبه لان اصلا ما نعرف ليش هيج صار بي .. و گامو ينطوه علاج و ادوية و جلسات بس ما استعدل و الادوية بس گامت تثبته بمكانه يعني ما يطلع من البيت و ابعد شي يروحله للحديقة و يظل گاعد ساعتين تلاثه اربعه صافن و امي تفوته للبيت لو ابويه .. و من يفوت للحمام يتاخر ساعتين لان يصفن و ابوي و امي شالو القفل مال حمام و التواليت و هالحجي بعد استشارة الدكتور … من يتاخر يطبون عليه و يطلعوه … و ورى وفاة ابوية امي تعبت و متگدر وحدها … و زوجي لان يحبني قدر الموضوع و اجه انتقل هو و جهالي لبيت ابوية الله يرحمة و يرحم والديكم … و بقينه نداري و فهمنه جهالنه نفس النظام الي ابوية و امي چانو يسووه و ابني الچبير عمره ١٤ سنه طبعا يحب خاله كلش و هو يتمشى وياه و فجاة بليله و يوم والله العظيم و الله شاهد على كل حرف .. الصوره الي بالصالة مال ابويه لگيناها مشيوله من مكانها .. و ابني طب لغرفة باسم لگاه حاضن الصوره و گاعد .. من گالي ركضت عليه گمت احاچي گلتله تتذكر من چنت اني وياك نطير الطياره فوگ .. اشو اندار عليا گالي ليش منو گالچ ناسي … يمه گلبي راد يوگف گمت حضنته گالي ريحتج دهن شطابخة بزازين .. رجع بلحظة باسم الي اعرفه … گمت اهلهل والله من الفرح …
و ابني راح صاح ابوه و رجع … و طبعا رتب نفسه و گام ويانه ولا عبالك كل هالمده هو چان شبه مموجود … سالناه گلناله انت تعرف شصار و انت شسويت .. گال اذا اگلكم كل الي صار چنت احسه مثل الحلم من نحلم بي و منسيطر على افعالنه بداخله متصدگون .. گلناله شنو يعني ؟؟

گال اني كل الي صار اتذكر منه شغلات بس مثل الحلم عبالك چنت بحلم … اتذكر حتى ابويه الله يرحمه من يفوت للحمام يطلعني لو من التواليت (مكرم القارئ) و اتذكر من امي تزين لحيتي لو صلاح الحلاق يجي للبيت يزين شعري كل فتره .. بس ماعرف ليش ماچنت اكدر احجي و ما اعرف بالضبط شچان بيا والله .. و لا تگولون اني مصدوم بشي او شفت شي .. و الله العظيم كل شي ما صار مميز بحياتي حتى تصير بيا صدمة .. بس هيچ فجاة دخلت بهل الدوامة … و سألنه الدكتور گال العقل حاله حال اي عضو بجسم الانسان يمرض و يرجع يطيب بس مشكلة العقل اذا تمرض يدمر الانسان و يخلي افعاله غير موزونه و باسم تمرض و فجاة تشافى … بس علميا محد يگدر يتنبأ انو راح ترجعله الحاله او تنتهي منه للأبد …

بيومها جبنه طليان ذبحنه و عزمنه كل الي نعرفهم و ياهو الي يشوف باسم ميصدگ صار زين .. و سألناه على الديوانية شلون وصل هناك .. يگول والله العظيم ماعرف بس اتذكر چانو الجهال يضحكون عليا و چانت اكو بنيه تطردهم و تنطيني اكل دائما …
گلناله تندلها ؟؟
گال لا ..
و رجع بسومي حبيبي طبيعي و عاف العلاج تدريجيا و رجع اندمج ويانه و مرت سنتين ورى رجعته لعقله و قرر يتزوج .. و قبل شهر من اليوم چان عرسه حبيبي … بس المصيبه كل عائلتنه حتى أمي يوميا من الصبح تصيح زوجته من فوگ تگلها باسم موجود ؟
وهو يصيح اتذكركم اتذكركم هههههههههههههه و الحقير سوى بينا مقلب قبل كم يوم خلى زوجته تنزل تگول باسم ميعرفني .. هبطنه و تاليها نزل يضحك ..
الله يحفظه و يبعد عنه كل سوء والله العظيم مو ذوله ولدي اخاف عليه اكثر من ولدي ..
(باسم)
انتهى
اخوكم ابو بغداد سايق التكسي
#ابو_بغداد