قصص عراقية حقيقية بقلم ابو بغداد سائق التكسي المجموعة الثانية

قصة

نزلت من القطار و ما بجيبي غير بس كم يورو و تلفون نوكيا ما بي سم كارت و اضيف فوكاهن اللغة الانگليزية و التركية الي اعرفها هم اعتبرها بالجيب … خوف ما عندي لان اني جاي من تركيا و بتركيا عشت كم سنه يعني گلبي ميت من سالفة شرطة لو سجن و اصلا انسجنت اكثر من مره بطريق وصولي  … بس اني حاليا محتاج الشرطة ليش .. لان علموني بالعراق و بتركيا (العراقيين المغتربين) علموني هالجملة الشهيره .. سلم نفسك للشرطة … و بديت ادور على الشرطة و طبعا طريقة التواصل وياهم باللغة الانگليزية … و هولندا تقريبا تسعين بالميه من شعبها يحچي انگليزي .. شفت شرطي على حصان رحت عليه … گلتله اني جاي من الحرب و بعدني ممكمل گال اي لازم تروح لمركز تسليم اللاجئين بمنطقة اسمها (تيرابل) و طبعا اني ما اندلها لهل المنطقة … و گلت خلص اجه وكت التلفون و رحت ادور اي محل عربي و مو صعب على اي واحد بامستردام يشوف عرب لان متروسه ترس عرب … گدرت اشتري سم كارت و اتصل على صديقي (مشتاق العزاوي) الي حاليا عنده قاعة بناء اجسام بالاعظمية و هو بطل من ابطال العراق بلعبة كمال الاجسام … خابرته وطلع ساكن بمحافظة بعيدة عن امستردام … گالي راح انطي رقمك لولد عراقي ساكن بامستردام .. يجي ياخذك و تبات يمه و باچر الصبح يركبك قطار و تجي يمي … گلتله تمام و اجاني الولد و اخذني لشقته ... لحد هسه اتذكر الدرج چان خشب و العماره قديمة كلش و هو چان عنده شغل شفت ليلي ... خطيه چان محضرلي اكل و اكلت و نمت و گعدت ثاني يوم على صوت مفتاح الشقة .. و دخل و گالي تتريگ .. گلتله لا اشكرك اريد الحگ عالقطارات ... ضحك گالي يمعود اربع و عشرين ساعه القطارات هنا ... و اخذني ركبني بالقطار و انطاني التذكره و گالي انتبه على اسم المنطقه ... بذاك الوكت القطارات چان ما بيها شاشات مثل هسه .. هسه الوضعيه سهله بهواي امور ... اكو شاشه يطلع بيها اسم المنطقه و اكو تلفون يطلع موقعك .. على وكتي هالامور ماكو ... لازم ابقى منتبه عالشباك مال قطار بكل محطه .. لان اسم المحطه موجود بعلامة چبيره .. وصلت للمنطقه و لگيت مشتاق و وياه ولد عراقي صديقه منتظريني .. و خطية جايبين وياهم بايسكل اليا حتى اسوقه للكامب .. و طبعا سلمت على مشتاق و الولد و ركبنا بايسكلات و رجعنه .. طبينا للكامب متروس ترس عراقيين و صوماليين .. عوائل عراقية .. صعدني فوگ لغرفته و چانت مشتركة بيها ست نفرات بس ثنين منهم يجون بس عالتوقيع .. لان بهولندا اكو نظام توقيع او (بصمه) اسبوعيا حتى تثبت وجودك انت باقي بالكامب .. يعني عندهم سريرين بالشقه فارغات .. و طلعنه بره نتمشى و مشتاق فرحني بسالفة الاقامة .. گالي ليث الاقايم هنا اقصى شي ست اشهر .. و گام يصيح الموجودين و قريبين منه و يسألهم بكم شهر اخذتها ؟؟؟
واحد يگول سبعه واحد يگول سته بس بالنهاية الاقايم سريعه ... فرحت كلش على هالشي و طلعنه افترينا بمحافظته و گلتله اذا هيج الاقايم سريعه خلي باچر اروح اسلم روحي ... گالي يابه درتاح كم يوم شعندك مستعجل .. گلتله مشتاق اخاف يطلع قانون لو شي و الاقايم تنسد لو تتاخر .. و مقبل هو بس اني ركبت راسي و گلتله باچر رايح ... طبعا وداني اشترينه تذاكر و رجعنه للكمب و ثاني يوم من الصبح وصلني للمحطه وررحت .. طبعا مشتاق چان ماخذ اقامه بذاك الوكت ... و ثاني يوم رحت و علمني مشتاق گالي من توصل للمنطقه القريبة من تيرابل (يعني من انزل من القطار) گال تركب باص رقمه هلگد و راح تشوف وياك صومالين و عراقيين ينزلون بمكان يتمشون انت انزل وياهم و تمشى و اسال منو جديد راح يعلموك وين تسلم نفسك ... و صدك والله الباص چان متروس صومالين و عراقيين .. و سالتهم گالو تعال ويانه .. و نزلنه و تمشينا مسافة عشر دقايق تقريبا و گالولي انت تروح من ذاك الباب تسلم نفسك .. و رحت وحجيت وي ابو الاستعلامات و سألني كم سؤال و دخلت .. طبعا سحبو مني التلفون و الجنطه و رحت گعدت بقاعه .. بعدين حولونه كلنه لمكان ثاني بس بنفس الموقع .. مكان كله كرڤانات ... و فرزوني على غرفه بيها سريرين واحد فوگ الثاني ... اني وزني مو مال اصعد عالسرير الفوگ .. الي وياي بالغرفه ولد كردي اسمه هيمن من اهل اربيل .. يحچي تركماني و كوردي و قليل كلش عربي .. بس الحلو لان يحچي تركماني يعرف يحجي تركي لان التركماني قريب عالتركي .. اني بسبب بقائي بتركيا كم سنه تعلمت احچي تركي ... چنت احچي وياه بالتركي .. الولد چان حلاق درجة اولى و طبعا هم حاليا هو باربيل فتح حلاقه كلش ضخمه و لحد الان عندي اتصال بي ... بوقتها گام يزين الناس بالكامب مقابل شيشه مال نوتيلا ههههه لو چيس صمون لو جبن مثلثات لو باكيت جكاير ... لان بذاك الوكت تقريبا خلصنا فلوسنا و راتب بعدنا ماعدنا و منگدر نشتغل .. و اني چنت المترجم بينه و بين العرب ههههههههههه ... طبعا بذاك الوكت اني چنت عشرينات .. و بديت اكون صداقات لان بقينا كم اسبوع هناك .. تعرفت على ولد اسمه سيد امير و على ولد اسمه منهل و على ولد اسمه روني ... تلاثتهم من بغداد ... امير من اهل الشعب و منهل من حي الحمراء القريبة من العامريه و روني من اهل الدوره ... و تعرفت على عائلة خالة ام سجا ... خالة ام سجا .. و طبعا علاقتنه چانت كلش حلوه و نبقى نلعب منضده لنص الليل لو نسولف على احلامنه و شراح نصير و شلون لازم نتعلم اللغة باسرع طريقة .. و اجه يوم التبصيم و وراها يرحلونه هم لكامب مؤقت ثاني ومنه يحولونه لكامب ثابت .. بصمونه عشر اصابع و نقلونه لكامب اسمه (ايندهوڤن) الكامب الجديد چان اكو يمه مطار اسمه مطار ايند هوڤن ... چانت متعتنا كلنا نروح العصريه نگعد هناك و نشوف شلون الطيارات الضخمه تهبط ... و طبعا تعرفت بايند هوڤن على شباب هواي و هم كونت علاقات ... و هناك تعرفت على ولد من اهل زيونه ... اسمه علاء ... علاء ميحچي هواي و بيوم من الايام اكو ولد مغربي يدخن جكاير مروانا ... المروانا نوع من انواع المخدرات الخفيفه الي مسموح بيها بهولندا و تنباع هي و الحشيش بشكل رسمي ... المهم ... اكو مصطبات ينگعد عليها من الصفحتين ... يعني ناس تگعد مقابيل ناس ... حاطين من هالمصطبات كومه بالكامب ...  احنا چنا بالقاعه نلعب دومنه و من رجعنه لگينا علاء گاعد وي المغربي ... رحنا گعدنا اني و امير و ويانه بنيه تونسية اسمها قمر .. گعدنا و فاتت بنيه روسية اسمها روكسانا اخذت قمر و راحو و بقينا بس اني و امير و علاء و الولد المغربي ... علاء گاله للمغربي شنو هاي ريحة جكارتك اشو مو طبيعيه ... گاله هاي مروانا او مرغوانا ... گاله انطيني ... گاله انت مدخن قبل ... علاء گاله لا ... گاله متفيدك ... علاء گاله شنو تخاف عليا انطيني ... انطاه و دخن علاء و بالضبط اقل من عشر دقايق چان علاء گام يبچي و گال تدرون اني بگت فلوس ابويه و جيت بيها تهريب ... احنا سكتناه واخذناه للغرفه ... گال ابويه اكبر كلب ابن كلب (مكرم القارئ) يفرق بيني و بين اخوتي من زوجته الصغيره ... و دائما يگلي انت تطلع عيون اخوتك و وين ماكو شغله زفره تعلمهم عليها ... واني حسبتها حساب گلت اذا اني امي ميته و ابوي دائما يصف وي جهاله من زوجته و ويصف وي زوجته معناها كل شي مراح احصل منه بالمستقبل ... گلت شعندي باقي بالعراق خلي اروح لاوربا ... ابويه وضعه المادي كلش زين و بيوم من الايام باع قطعة گاع و فلوسها حولهن ورق لان راد يروح للزرگة بعمان يجيب سيارات ... اني اخذتهن و طفرت للشمال و مناك طلعوني تهريب لتركيا و كملت لحد ما وصلت لالمانيا و عشت بيها فتره و منطوني اوراق و جيت هنا ... گلناله يعني عندك بصمة المانيا؟؟؟
گال اي ... (طبعا الي عنده بصمة اي دوله اوربيه و تطلع بالتبصيم يرجعوه الها ورى فتره و علاء رحلوه ورى كم شهر من ذاك اليوم) و گال شسوي هناك مينطون .. المهم بيومها اني صار عندي ردة فعل ما اگعد يم اي احد يدخن هالسوالف لان مو زينه و تخلي الواحد يخربط و اصلا ادمان و ما اصدك من واحد يگلي مو ادمان لان مسموح بيها ... عالعموم ... بقينا فتره و هم فرقونا وراها و طلع تسفيرنا للكامب الدائم ... و ركبونا باص و ودعنا الشباب و طبعا چانت السالفه تأذي ... لان تتعرف على ناس و بعدين فجاه تتفرقون ... رحلوني اني و منهل و روني لكامب جديد اسمه كامب (الميلو) و بالطريق بالباص .. الباص يوگف على كمبات ينزل ناس ... يعني مو كل الي بالباص لكامب الميلو ... و گفنه يم كامب اسمه (زڤولا) و ابو الباص گال نزلو دخنو .. چان الكامب حلو و بي اوراق اشجار هواي واگعه منظر عبالك فلم اجنبي .. و اكو مريه شكلها عربي دتدخن و وياها جاهل يلعب على بايسكل ... اني جداحتي متشتغل خربت .. طلبت منها نار و سالتها منين انتي طلعت عراقية .. گلتلها شنو جدد انتو .. گالت لا صارلنه سبع سنين ... گلتلها جايه زياره لاحد هنا لان اكيد متجنسه .. گالت لا عدنا رفض ... گلتلها شنو ؟؟؟
گالت عندي رفض سبع سنوات ... و عايشه بالكمب ... طبعا بعدني ممكمل الحچي صاحنه ابو الباص ... من صعدت للباص گلتلهم شوفو هاي المريه صارلها سبع سنوات بالكمب ... كلهم گالو اكيد عندها مشاكل و اني گلت والله لو ابقى سنتين بدون اوراق و اقامة اكتل روحي و غيري گال اني ارجع للعراق و ذاك گال اني ارجع لمصر ...
و مشى بينا الباص و وصلت لكامب الميلو ...
و طبعا هالكامب بقيت بي ١١ سنه بدون اوراق و بهل ١١ سنه تعرفت على قصص و قصص و قصص و جايكم بيها وحده وحده
يتبع
(١)
انتهى
اخوكم ابو بغداد سايق التكسي
#ابو_بغداد